رعب الدولار يشعل سوق الدهب.. والعيار هيعدي الـ6 آلاف جنيه
ايه اللي بيحصل في سوق الدهب اليومين دول وإيه مصير الاسعار في الشهور الجاية وايه الصدمة اللي منتظرة المصريين وكمان إيه علاقة دا بالدولار في مصر.. تابعونا وهتعرفوا التفاصيل في الفيديو دا
قلنا قبل كده كتير في بانكير إن الدهب ياجماعة طالع ومش نازل لغاية السنتين على الاقل اللي جايين ودي توقعات دقيقة وبيانات وحسابات عملتها أكبر المؤسسات المالية والبنوك المركزية في العالم واللي الدهب بيمثل جزء مهم جدا في احتياطي النقدي بتاعها وعشان كده فيه اهتمام كبير بدراسة سوق الدهب.
كل التوقعات أجمعت إن اسعار الدهب هستمر في الصعود لغاية نهاية 2026 وده لعوامل كتير موجودة على الارض ومش في علم الغيب يعني المؤسسات الدولية دي بتتكلم على اسباب منطقية موجودة تخلي الدهب سعره يستمر في الطالع أولها التوترات بين الصين وروسيا من ناحية وبين الولايات المتحدة والغرب من ناحية تانية وسياسة الصراع الاقتصادي بينهم وفرض العقوبات ودا عمل توتر اقتصادي كبير في العالم انعكس على مخاوف الاسواق والبنوك المركزية من تصعيد الأزمات وبدأت بنوك كتيرة خاصة المركزي الصيني في شراء كميات كبيرة من الدهب وصلت لمعدلات شراء قياسية على مدار الـ24 شهر اللي فاتو ولسه الصين بتشتري دهب وكمان أكتر من 20 بنك مركزي عالم أعلن نيته شراء كميات كبيرة من الدهب لتعزيز الاحتياطي وتأمين نفسها ماليا مع التوترات اللي في العالم ومنها اللي بيحصل في الشرق الاوسط.
الأصعب من ده كله حسب الدراسات إن الطلب العالمي على الدهب بيزيد في وقت فيه نقص في المعروض وصعوبة التنقيب عن المعدن من الشركات العالمية.
كمان اتجاه بنك الاحتياطي الفيدرالي الامريكي لخفض الفايدة في الاجتماعات الجاية بعد تثبتها في اجتماعه الاخير من ساعات خلي سوق الدهب يولع وفيه توقعات إنه خلال الايام الجاية الاوقية هتوصل 2500 دولار وهتستمر وتيرة الزيادة بشكل كبير جدا وهتوصل الذروة في منتصف 2025 وبدايات 2026 يعني الأيام اللي جاية كلها زيادة في اسعار الدهب لانه البنوك المركزية بتعتبره ملاذ آمن وسط كل المشاكل اللي في العالم دلوقتي.
في مصر الأمر مش هيختلف عن بره والاسعار هتستمر في الزيادة وده اللي كشفته شعبة الدهب في مصر، واللي قالت إن الزيادة في الاسعار مستمرة رغم انخفاض الطلب نسبيا ودي حاجة غريبة لأنه المفروض سعر الدهب ينزل مع تراجع الطلب لكن الشعبة فسرت ده إن المصريين بستمروا في الشراء وقت الأزمات وإن في مصر بالذات لما السعر يرفع تلاقي إقبال رهيب من الناس ودي عادة مصرية قديمة أووي والغريبة لما السعر ينزل الاقبال على الشراء بيزيد.
وقالت الشعبة إن الدهب هايعلى وهايعلى وفي غضون آخر السنة هيوصل ما بين 3 و4 آلاف جنيه، وفيه توقعات بارتفاع أسعاره في 2026 إلى 6 آلاف جنيه للجرام.
وقال عضو شعبة الدهب باتحاد الغرف التجارية كمان إن فيه توقعات بزيادة سعر الدهب بنسبة 100% وإن عيار 21 في الصاغة هيوصل 4000 جنيه بنهاية السنة الحالية، وهيوصل 6 الاف جنيه في سنة 2026 زي ماقلنا.. وعشان كده ياريت تلحق تشتري وتخزن لو عاوز فلوسك تزيد النص في أقل من سنتين.
وفيه سبب تاني بتخلي الناس تجري تشتري دهب في مصر وهي الزيادة المفاجئة في سعر الدولار ودا بيخلي الناس تشتري دهب عشان تحفظ قيمة فلوسها من الهبوط بسبب انخفاض سعر الجنيه أمام العملة الامريكية.
