تفاصيل الأيام العجاف في حكومة مدبولي.. سر إصرار صندوق النقد على إلغاء الدعم.. وسر خلطة الوزير في النهوض بالصناعة.. وإيه اللي بيحصل في العلمين الجديدة
متابعينا الكرام في كل مكان أهلا وسهلا بكم وتحليل جديد لأهم التقارير اللي قدمتها وحدة أبحاث بانكير على مدار اليوم الخميس الأول من أغسطس 2024..
البداية مع التقرير الأهم اللي قدمته منصات بانكير وكلن بيتكلم عن الايام الصعبة اللي جاية..
ولفت التقرير الضوء على في تصريحات اخيرة لرئيس الحكومة مصطفى مدبولى واللي أكد فيها ان الدولة خلال الفترة الجاية هتبدأ ترفع بشكل تدريجي اسعار بعض الخدمات والسلع وقال ان الدولة مش هتقدر تتحمل فرق التكلفة بين السعر الحقيقي والسعر المدعم لخدمات اساسية ومهمة زي الكهربا والبنزين والسولار.
وأوضح التقرير إنه ما فاتش ايام كتيرة الا وقررت الحكومة فعلا رفع اسعار الوقد بنسب تراوحت بين 10 و15% وبعدها بايام كمان تم الاعلان عن رفع اسعار تذاكر المترو والقطارات بنسب وصلت الى 25% ..
وشرح بانكير إن المؤشرات بتقول ان اسعار الخدمات فى مصر على اخر 2025 هتوصل لمستويات قياسية ما وصلتلهاش قبل كده وان التضخم هيرتفع بصورة غير مسبوقة تحديدا بعد تحريك اسعار الكهرباء والبنزيبن والسولار وباقي الخدمات بشكل تدريجي وصولا الى الغاء الدعم بشكل كامل عن كل الخدمات اللى بتقدمها الحكومة للمواطنين
وكشف بانكير اسباب لجوء الحكومة للحلول الصعبة على الناس وقال إن الحكومة عندها أزمة كبيرة فى عجز الموازنة العامة يعنى بشرح بسيط الفلوس اللى داخلة للحكومة مش قد الفلوس اللى بتصرفها وعشان تسد الفرق بين الايرادات والمصروفات راحت تستلف من صندوق النقد .. والصندوق قال للحكومة معنديش مشكلة اديكي الفلوس اللى انتى عاوازاه بس اضمن ازاى انك هتسددي الحكومة قالت هعمل برنامج اصلاح اقتصادي هرفع فيه الضرايب والغى الدعم وابيع شركات مملوكة للدولة واوسع نشاط القطاع الخاص واعوم الجنية .. الصندوق شاف البرنامج ووافق عليه وكل شوية بيتابع مع الحكومة وبيلح على تنفيذ الشروط اللى الحكومة هي نفسها اللى حددتها
وقال التقرير إن كل السلع والخدمات العامة هتزيد وزيادات مش قليلة لأن الصندوق رابط صرف شرايح القرض بتاعه لمصر بتنفيذ الغاء الدعم وتخفيض قيمة الجنيه والحكومة مضطرة انها توافق عشان تاخد الفلوس وتسد عجز الموازنة اللى عندها.
التقرير التالي اللي قدمته منصات بانكير كان عن مشروع ضخم في المنطقة الصناعية في العلمين الجديدة وباستثمارات بتوصل ل7 مليار دولار..
وأضاف التقرير إن فيه جهود كبيرة بتحصل في وزارة البترول مع وصول الوزير الجديد كريم بدوي واللي عمل لقاءات كتيرة جدا في الفترة القليلة اللي فاتت مع شركات عالمية لتسريع وتيرة التنقيب عن البترول والغاز والثروات في مصر وفعلا بدأت البشاير تهل .
وكشف التقرير إن فيه شركات عالمية كتير قررت ضخ استثمارات ضخمة للتنقيب عن البترول والغاز في مصر زي شركة ايني الايطالية واللي بتحفر دلوقتي في امتياز شروق جمب حقل ظهر وغيرها من الشركات العالمية اللي بتحفر في 145 موقع على مستوى الجمهورية وفي انتظار البشاير.
ولفت تقرير بانكير إنه في الساعات اللي فاتت وزير البترول والثروة المعدنية قعد مع ممثلى شركة تشارد كابيتال الإنجليزية ودي شركة عالمية وشهيرة جدا وناقش مقترح الشركة الإنجليزية لإقامة مجمع البتروكيماويات بالمنطقة الصناعية بالعلمين الجديدة، بتكلفة استثمارية تقديرية 7 مليار دولار.. ايوا زي ماحضرتك سمعت كده الرقم 7 مليار دولار مرة واحدة في مشروع واحد.
المهم المشروع ده بيعتبر أهم المشروعات الجديدة اللي الشركة القابضة للبتروكيماويات التابعة لوزارة البترول كانت بتروج ليه وسط الشركات العالمية فى إطار الاستراتيجية القومية لزيادة إنتاج البتروكيماويات.. وإحنا عارفين أهمية صناعة البتروكيماويات في الدول لأنها بتعتمد على استثمارات ضخمة وبتطلع منتجات كتير جدا.
ولفت التقرير إن المشروع البريطاني الجديد هو جزء من مخطط وزارة البترول والثروة المعدنية للإستثمار في مشروعات تعظيم القيمة المضافة واللى بتنفذه الشركة القابضة للبتروكيماويات بمنطقة العلمين الجديدة وبيشمل كمان مجمع العلمين للبتروكيماويات تحت الترويج واتنين مجمع لإنتاج الصودا آش والسيليكون ومشتقاته في مراحل التنفيذ.
وحدة أبحاث بانكير قدمن تحليل جديد لإصرار صندوق النقد أصر على رفع سعر البنزين والسولار وتذاكر المترو.
وشرح التقرير إن صندوق النقد شايف ان ارتفاع تكلفة المعيشة المستمر على المصريين على مدار 18 شهر بيكشف الحاجة إلى تدابير ضرورية لتخفيف العبء عن الفئات الأكتر تضررًا، وان التجارب السابقة أثبتت أن دعم الوقود كان بيفيد الأثرياء غالب وعشان كده إلغاء هذه الإعانات أو الدعم وإعادة توجيه الموارد إلى برامج دعم مباشر للفقراء والفئات الكادحة هيساهم في تحقيق العدالة الاجتماعية وتخفيف الأزمات المعيشية...
وشرح التقرير إن الصندوق شايف إن الحل في الخروج من الأزمات الاقتصادية هي منح القطاع الخاص فرصة كبيرة وإن الناس تشتغل ومتستناش الدعم وعشان كل اللي قلناه ده الصندوق مصر يرفع الدعم الكامل عن الخدمات والسلع المدعمة عشان الاقتصاد يبقي حر وتخفيف اي حمل على الموازنة العامة للدولة عشان الحكومة بعدين يكون عندها سيولة كافية ومن غير ضغوط لتوجيه الدعم والخدمات بشكل مختلف للفئات المحتاجة.
منصات بانكير قدمت كمان تقرير عن خلطة كامل الوزير لإنعاش الصناعة
وسلط التقرير الضوء على خطط الفريق كامل الوزير نائب رئيس الوزراء ووزير النقل والصناعة، للنهوض بقطاع الصناعة، وبدأها من إطلاق نظام أو منصة تتضمن قاعدة بيانات دقيقة للصناعة، وهيبقي اسمها "منصة مصر الرقمية الصناعية".
وأشار التقرير إن بيتم حاليا تجهيز الخريطة الصناعية للتسهيل على المستثمرين وتقليل الإجراءات والإسراع بها لتعزيز مناخ الاستثمار والانطلاق بقطاع الصناعة إلى النهوض والتنمية.
وقال التقرير كمان إن كل الإجراءات دي هتوفر المعلومات للمستثمر الصغير أو المتوسط أو الكبير (محليا كان أو أجنبيا)، وبتتمثل في المعلومة التي تنور ليه الطريق وتحفظ له استثماراته من الضياع أو التبديد.
وشرح بانكير إن الاجراءاءت دي هتساعد الدولة في إدارة رؤوس الأموال وحفظها من التسرب بلا انتفاع من جميع الأطراف عشان تقدر تجني ثمار زيادة الناتج القومي، وهتفسح المجال لأي حد عايز يصخ فلوس أو استثمارات في مصر، وبالتالي ده هينعش الاقتصاد القومي وهيعود على حياة المواطن بالخير.
ولفت التقرير في النهاية إن المنصة اللي بيعملها الوزير بتعتبر شبكة بنية تحتية معلوماتية ضرورية، مهم العمل عليها بمنتهى السرعة والدقة، ولازم يتم إضافة خريطة مصر الصناعية على هذه المنصة للتسهيل على المستثمرين البحث عن أفضل الأماكن المناسبة لاستثماراتهم.
