أخر تحذير.. إيه اللي بيحصل في سوق السيارت وسر الخطاب الأخير

إيه اللي بيحصل في سوق السيارات اليومين دول وإيه حكاية الانذار الاخير اللي قدمته الشعبة النهاردة للحكومة واتحاد الغرف وليه الحكومة مصرة توقف الاستيراد ومصير الاسعار الفترة الجاية.. هنعرف كل التفاصيل في التقرير  ده خليكم معانا للنهاية
 

الحقيقة اللي بيحصل في سوق السيارات اليومين دول حاجة تحير ومش مفهوم وفيه لغز كبير إزاي الحكومة من ناحية بتسهل التجارة وتوفر الدولار وعاوزة الاسواق تستقر وفي نفس الوقت وقفت استيراد في اهم سوق في مصر وهو سوق السيارات وده رغم إن الحكومة سبق وقالت إن المشكلة اتحلت والدنيا رجعت زي الاول والاستيراد شغال لكن مش ده اللي حصل.
إيه الجديد في سوق السيارات وليه الموزعين والتجار بيحذرو من كارثة؟
شوف حضرتك النهاردة اللواء نور الدين محمد درويش، رئيس شعبة وكلاء وموزعي وتجار السيارات بالغرفة التجارية بالقاهرة، قدم على وجه السرعة خطاب عاجل إلى أحمد الوكيل، رئيس الاتحاد العام للغرف التجارية، عشان ترفعه للدكتور مصطفي مدبولي وعرض فيه المشاكل والتحديات الكتيرة اللي بتواجه قطاع السيارات في مصر، واللي بتهدد بتعطيل مسيرته ونموه.
‏‎قبل تقديم الخطاب الخطاب شعبة وكلاء وموزعي وتجار السيارات اجتمعت في مقر الغرفة التجارية بالقاهرة  لمناقشة كل المشاكل بشكل مستفيض وبحث حلول جذرية ليها.
‏‎
المهم شعبة السيارات قالت في خطابها لمدبولي إن في الوقت اللي الرئيس عبد الفتاح السيسي بيوجه وينبه الحكومة على التصدي للمشكلات والصعاب بروح من الشفافية والواقعية والمصداقية الكاملة لكن لسه فيه أزمة كبيرة في قطاع السيارات ومتحلتش.

طيب ايه المشاكل اللي عرضها التجار نهاردة على الغرفة وعلى الحكومة؟

‏‎ الخطاب اتكلم بشكل مستفيض عن 3 مشكلات رئيسية بتُواجه قطاع السيارات حاليا، وهي التوقف الكامل لمنظومة ACI لإصدار الرقم التعريفي ACID لبند سيارات الركوب، إضافة إلى صعوبة آلية تنفيذ القرار الوزاري رقم (9) واللي بيشترط وجود مراكز صيانة معتمدة طبقا للتوزيع الجغرافى تتناسب طاقاتها الاستيعابية للخدمة مع عدد المركبات المباعة سنويا بالسوق المحلى، وتوافر قطع الغيار الأساسية ذات الصلة بجداول الصيانة الصادرة من الشركات المنتجة بحيث تغطى بحد أدنى نسبة 15% من عدد المركبات وذلك لضمان شروط السلامة والأمان.. وكمان شمل الخطاب تأثير الكتاب الدوري رقم (100) والخاص بنقل معارض السيارات خارج الكتلة السكنية على مستوى الجمهورية بسبب تكلفته المادية الكبيرة  على أصحاب معارض السيارات داخل هذه المناطق.
ودي كانت كل مطالب التجار والوكلاء في سوق السيارات واللي بتقول باختصار إن الحكومة موقفة الاستيراد من خلال تعطيل سيستم تسجيل الدخول وغير القرارات التانية اللي بتصعب الامور على التجار واللي طالبوا الحكومة بحل كل المشاكل دي على وجه السرعة قبل ما تحصل الكارثة والاسعار ترجع تولع تاني ويرجع معاها الاوفر برايس بسبب النقص الشديد في المعروض ودا كله وقف حال التجار وأصحاب محال وورش قطع غيار السيارات.