إيه اللي هيحصل لو مصر قالت لصندوق النقد شكرا مش عاوزين قروضك
إيه اللي كان هيحصل لو وزير المالية امبارح اتهور وقال للست مدير صندوق النقدة الدولي احنا كفاية كده وشكرا ومش عاوزين قروض تاني منكم والقرشيني اللي ليكم عندنا هتخدوهم في مواعيدهم.. تعالي نقولك ايه اللي هيحصل
ناس كتير مش بتكون عارفة خطورة القرار السياسي أو الاقتصادي خاصة لو معندهاش المعلومات الكفاية يعني تلاقي في اي مجلس أو قعدة بين الناس يقولك ليه الحكومة بتغلي الاسعار وليه مدبولي مايوقفش التعامل مع صندق النقد اللي خرب بيتنا وليه الحكومة بتشيل الدعم وليه قناة السويس ماتبقاش بالجنيه المصري وحاجات كتير بالشكل ده لكن الأمور مابتتخدش كده ومفيش طبعا حكومة عاوزة تزعل الشعب بتاعها ولا تاخد قرارات صعبة من نفسها لمجرد ما تعكنن على الناس عيشتها ومفيش اسهل من المسكنات والكلام الحلو لكن دا في النهاية بيودي لكارثة حضرتك.. إزاي؟.. عشان سيادتك مصر مابقتش ال60 مليون نسمة اللي عايشين كافيين خيرهم شرهم وتقريبا العدد دا اتضاعف ومصر داخلة على 120 مليون لو ضفت عليهم اللاجئين والمقيمين ومصر زادت 650 ألف بني أدم في 5 شهور تقريبا يعني إنت كل 5 سنين بتتولد عندك دولة بحجم دول الخليج ومش هينفع تاخد نفسك في المشروعات والتنمية ... وعشان كده القرارات العنترية مبقتش تنفع ولا إننا نمشي على قدنا زي زمان وإلا هتحصل عندك كوارث ومجاعات أومال الملايين دي هتاكل وتشتغل منين يبقي مفيش حل قدامك غير إنك تشتغل صح وتأسس اقتصاد قوي بحق وحقيق وغير كده يبقي بنلف في دايرة هتودينا للهلاك حرفيا.
طيب ايه اللي بتعمله مصر أو الحكومة عشان منوصلش للنقطة الحرجة اقتصاديا وإيه علاقة دا بالسلف والاقتراض من صندوق النقد الدولي؟
شوف يافندم مصر بدأت مع حكم السيسي والكلام دا معروف وموجود على ارض الواقع إنها تعمل دولة حقيقية قايمة على اقتصاد قوي وعلى صناعات واسعة ومتطورة وزراعة كبيرة وتصدير وتصنيع وتعهيد ودا مكانش هيحصل غير بإنك تعمل بنية اساسية قوية ودا اللي حصل فعلا وسبق وقلناه لكن حكمت الظروف واضطريت كدولة تلجأ لمؤسسات التمويل الدولية عشان تخرج من أزمة عالمية خارجة عن الارداة وإلا كل اللي عملته ملهوش لازمة وراحت مصر واقترضت من صندوق النقد وبناء على الاتفاق دا مصر حررت سعر الصرف والمؤسسات الدولية اصدرت تقارير ايجابية عن الاقتصاد المصري وبدأت الاستثمارات الاجنبية تهل من كل حتة وحصلت اتفاقيات راس الحكمة وصفقات الاتحاد الاوروبي وكلها بالمليارات..
لو حصل ومصر قالت شكرا دلوقتي لصندوق النقد الدولي اول حاجة سعر الدولار هيولع في البنوك وهتظر السوق السودا تاني لأن التمويل الخارجي هيتاثر بشدة والمستثمرين الدوليين هيخافوا لأن طبعا الصندوق هيطلع بيانات مخيفة ساعتها عن مصير الاقتصاد المصري وهتطلع وكالات التصنيف الدولية وتضرب تصنيفك الائتماني في الارض ومؤشر مخاطر الديون المصرية في الخارج هيقفز وهتطلع تقارير واشاعات كتيرة ساعتها هتدمر كل الاستثمارات الجاية غير إن الاستثمارات المباشرة هتهرب منك تاني وهنرجع نلف حولين نفسنا من تاني.
