أخطر 24 ساعة.. إيه اللي هيحصل لمصر في واشنطن؟
يا ترى ايه اللى هيحصل بكرة فى واشنطن خلال اجتماعات صندوق النقد الدولي؟ وهل المجلس التنفيذي للصندوق هيعلن الموافقة على المراجعة التاتلة لبرنامج الاصلاح اللى بتنفذه مصر وبالتالى صرف شريحة جديدة من قرض ال 8 مليار دولار ولا ممكن يحصل قرار غير متوقع؟ وايه طبيعة الخلافات بين الصندوق ومسئولى الحكومة المصرية؟
خلاص فاضل أقل من 24 ساعة وهيعقد المجلس التنفيذى لصندوق النقد الدولى واحد من أهم اجتماعاته بالنسبة لمصر فى 2024 بعد حالة من الشد والجذب والمناوشات بسبب ألاعبيب الصندوق اللى وضحت لما استبعد مصر من جدول اعمال اجتماع بكره قبل ما يرجع يعمل تحديث ويعيد القاهرة الى جدول أعماله.. وده اللى خلا ناس كتير تقول ان أكيد فيه خلافات بين الحكومة ومسئولى الصندوق وان الصندوق بيعاقب مصر وان فيه حاجات تم الاتفاق عليها لسه لحد دلوقتى ما اتنفذتش
الحكومة المصرية وقتها نفت على لسان مصدر مطلع استبعاد مصر من جدول اجتماعات المجلس التنفيذي للصندوق وقالت ان المواعيد المعلنة من قبل ماشية زي ما هي ومفيهاش اى تغيير وده اللى حصل فعلا .. والمفروض فى اجتماع بكره المجلس التنفيذي للصندوق هيناقش برنامج مصر وبنسبة كبيرة هيتم الاعلان عن الموافقة على المراجعة التالتة ومصر هتصرف الشريحة الجديدة بقيمة 850 مليار دولار.
طب بعيدا عن الدربكة والضرب تحت الحزام اللى حصل فى مسألة وضع مصر على جدول اعمال اجتماع صندوق النقد .. ايه اللى بيحصل فى الكواليس بين الحكومة ومسئولى الصندوق؟
بص يا سيدي .. صندوق النقد الدولى بيراجع كل فترة وبشكل دوري الرسوم اللي بيفرضها على المقترضين ومن بينهم مصر وده بعد ما أثارت بعض الدول مخاوف من أن التكاليف أصبحت غير معقولة بسبب ارتفاع أسعار الفائدة.
وفى نص الشهر ده ناقش مجلس إدارة الصندوق المكون من 24 عضوبيمثلوا 190 دولة مقرضة الخيارات المتاحة لمنح الدول إعفاء من الرسوم الإضافية وبتنطبق الرسوم على الدول اللى بتقترض أكثر من حصتها المخصصة أو تستغرق وقت أطول لسداد القروض بموجب برامج صندوق النقد الدولي.
طب هل فيه شروط مصر ما التزمتش بيها فى اتفاقها مع الصندوق؟
لحد دلوقتى كل الشروط اللى تم الاتفاق عليها اتنفذت ومفيش اى شروط جديدة طلبها الصندوق زي ما فيه ناس كتير بتقول.
بس فيه خبراء اقتصادكتير قالوا ان سبب تأجيل صرف شريحة القرض المرة اللى فاتت كان الانتظار لحين تحريك أسعار الوقود والكهرباء .. وفعلا الحكومة قررت مؤخرا رفع اسعار البنزين والسولار بنسب وصلت الى 15% بعد تصريحات لرئيس الحكومة مصطفى مدبولي قال فيها إنه لابد من تحريك أسعار الوقود وبعض الخدمات التانية بشكل تدريجي لعدم قدرة الدولة على تحمل عبء الدعم.
