بتوجيهات رئاسية.. قرارات جديدة لمواجهة ارتفاع الأسعار

ايه اللي الحكومة بتدرسه دلوقتي عشان تخفف عن الناس من ارتفاع الاسعار في الاسواق بعد زيادة اسعار البنزين والسولار يوم الخميس اللي فات.. وايه هي تعليمات الرئيس السيسي الجديدة للحكومة.. تعالوا نشوف التفاصيل في الفيديو ده... خليكم معانا
 

طبعا كلنا عارفين اللي حصل الصبح بدري الخميس اللي فات بعد قرارات لجنة تسعير المواد البترولية واللي رفعت ٍأسعار البنزين والسولار بنسبة 15 في المية وبعدها ارتفعت اسعار وسائل المواصلات ونقيب الفلاحين قال إن كل أسعار المحاصيل والخضروات والفاكهة هتزيد من 20 الى 30 في المية بسبب ارتفاع السولار تحديدا لأنه بيستخدم في الزراعة والري بشكل كبير جدا..
ومعروف بردو إن اي زيادة في الاسعار دولوقتي بتعتبر عبء جديد على الأسرة المصرية والمواطن اللي أصلا مش عارف يلاقيها منين ولا منين بعد الظروف الصعبة اللي بيمر بيها من فبراير 2022 وده تاريخ اندلاع الازمة الروسية الاوكرانية واللي قلبت العالم كله ورفعت الاسعار دولية وكانت بداية الازمات في مصر بسبب اعتمادها بشكل كبير على استيراد السلع الغذائية والاستراتيجية والمواد الخام اللازمة للتصنيع ولأن الاسعار العالمية اتضاعفت أكتر من مرة كان طبيعي الأسعار في مصر تزيد اضعاف بسبب تسعيرها بالدولار.
ورغم إن الامور استقرت بعد قرار التعويم في مارس اللي فات والدولار اتوفر وانتهت السوق السودا لكن الحكومة اضطرت ترفع الدعم على مراحل من الخبز والمواد البترولية والكهربا ولسه عندها خطة رفع الدعم لغاية اخر 2025 ودا اللي قاله الدكتور مصطفي مدبزلي رئيس الحكومة نفسه وقال إن ده جزء مهم من برنامج الاقتصاد المصري وخطوة لازم تتعمل عشاان السوق يبقي حر وكل سلعة تتباع بسعرها الحقيقي والحكومة كمان تفوق من الاعباء والمليارات اللي بتدفعها كل سنة في دعم المواد الغذائية والخدمات.
طيب وبعدين المواطن هيعمل ايه وايه الحكومة اللي هتعمله للناس عشان تواجه غول الاسعار؟
أكيد طبعا الدولة أو الحكومة والرئيس كمان مش هيبسبو المواطن لمصيره الصعب لكن أكيد فيه خطوات وقرارات واجراءات على الارض وزي ما حصل قبل كده وأصدر الرئيس السيسي قرارات بمضاعفة الحدود الادني للأجور وده غير الدعم المباشر لكل فئات المجتمع وزيادة برامج الحماية الاجتماعية من خلال حزمة قرارات بزيادة المرتبات والمعاشات وزيادة الأسر المنضمة في برامج تكافل وكرامة وده غير الاعفاءات الضريبية وغيرها كتير من اللي اتعمل الحقيقة في الفترة اللي فاتت.

طيب الحكومة هتعمل ايه للمواطنين الفترة الجاية؟
شوف حضرتك فيه توجيهات رئاسية مستمرة للحكومة بتخفيف الاعباء على الناس ودا أساس عمل الحكومة على فكرة تشوف المواطن تعبان من ايه وتحل مشكلته وحسب المعلومات اللي وصلت بانكير فيه حزمة حماية اجتماعية جديدة جاية في الطريق هتشمل زيادة المرتبات والمعاشات واعفاءات تانية مالية للمواطنين وده بخلاف هيكون فيه مبادرات تساعد الناس وخاصة الشباب في عمل المشروعات وحماية الفئات الاشد احتياجا... وحسب المعلومات هيتم الاعلان قريب اووي عن القرارات الجديدة واللي بيتم تحضيرها وصياغتها دلوقتي.