إيه اللي هيحصل بعد رفع سعر الوقود.. وتأثيره على الدولار

النهاردة لجنة تسعير المواد البترولية رفعت سعر البنزين بأنواعه والسولار والكيروسين.. ياترى إيه اللي هيحصل في الاسعار والاسواق اليومين الجايين وايه تأثير القرارات الاخيرة على سعر الدولار.. تابعونا للأخر وهتعروفوا التفاصيل في التقرير التالي.

زي ما شفنا من ساعات لجنة تسعير المواد البترولية رفعت اسعار البنزين والسولار والكيروسين مابين جنيه ونص و2 جنيه وبنسب تتراوح ما بين 11.5% إلى 15% وأكيد القرارات دي هيكون ليها تبعات على أغلب الأسواق.
لكن التأثير الاكبر هيكون على اسعار الخضار والحبوب والفاكهة ودا لأن الفلاحيين بيعتمدوا بشكل كبير على السولار في ري اراضيهم وحسب تأكيد نقيب الفلاحين تكلفة الرية الواحدة هتزيد 60 جنيه وإن زيادة أسعار السولار والمحروقات هتؤثر بشكل مباشر على الفلاحين وهتزيد الأعباء عليهم خاصة مع ارتفاع تكاليف جميع منتجات القطاع الزراعي، إضافة إلى تأثر الفلاح في الأساس بنقص الإنتاجية بسبب درجة الحرارة.
كمان زيادة السولار هنعكس على زيادة أسعار الحرث، وتكاليف النقل، وغير إن ارتفاع أسعار السولار بيتزامن مع زيادة أسعار الأسمدة ولأن كمان استخدام السولار في كل المحاصيل بشكل يومي وتوقع نقيب الفلاحين، أن تنعكس زيادة أسعار السولار بأعباء تصل إلى 15%، ومن المتوقع زيادة أسعار الأسمدة المدعمة من 4800 جنيه إلى 6200 جنيه أي بنسبة 30% وده هينعكس بدوره على الاسعار النهائية للمحاصيل غير هامش ربح تاجر الخضار والفاكهة والبقالين وضيف عليهم تكلفة النقل اللي هتزيد بسبب زيادة اسعار البنزين واتوقع إن الزيادة في اسعار المحاصيل مش هتقل عن 30 في المية.
طيب ايه تأثير رفع أسعار الوقود على تعريفة المواصلات؟
هنا هنتكلم عن أكتر من تأثير أولها إن طبيعي اسعار تعريفة المواصلات تزيد مع زيادة اسعار البنزين وتاني حاجة تعريفة النقل بشكل عام هترفع اسعار كل السلع تقريبا اللي بتعتمد على النقل بالسيارات وفي النهاية المستهلك الأخير اللي هو المواطن هو اللي هيتحمل فروق الزيادات دي لأنها بتضاف على سعر المنتج النهائي.
وبالنسبة لتأثير زيادة اسعار الوقود على الدولار.. فلازم نكون عارفين إن الزيادة الاخيرة في اسعار الوقود بانواعه جت استجابة لاتفاقية القرض مع صندوق النقد الدولي عشان يصرف بقية قرض ال8 مليار دولار وطالما الحكومة نفذت شروط الصندوق يبقي هتصرف الشريحة التالتة وده هيكون ليه تأثير ايجابي على سعر الدولار لأن ملايين الشريحة التالتة هتضيف 820 مليون دولار للمعروض النقدي دا غير إن سريان اتفاق صندوق النقد من غير مشاكل هيجذب الاستثماات الساخنة والمباشرة واللي بتتأثر بقرارات صندوق النقد واتفاقه مع الحكومات وأي تعثر في الاتفاقية بيكون ليه اثر سلبي جدا في سوق الاستثمارات والسندات والتصنيف الائتماني كمان للاقتصاد المصري ودي شيء مهم جدا في سوق الاستثمارات العالمي.