أيام صعبة والأسعار هتوصل السحاب.. تقرير مرعب عن مصير الدهب
![الذهب]( /UploadCache/libfiles/5/7/600x338o/178.jpg)
ياترى الدهب رايح على فين في مصر والعالم وايه حكاية التقرير الخطير اللي صدر من كام ساعة وإيه اللي هيحصل في الاسعار الأيام والشهور الجاية وإيه أنسب وقت تستثمر فيها في المعدن الأصفر .
العالم كله مشدود عن أخره وفيه تقريبا حالة طواريء في البنوك المركزية العالمية دلوقتي بسبب حالة القلق والترقب المالي والازمات المنتظر حدوثها في أكبر اقتصاد في العالم وهو الاقتصاد الامريكي وأخطرها ارتفاع مستويات الديون الأميركية لأقام مخيفة واللي عزز من جاذبية الدهب، واعتبرته 80% من البنوك المركزية في الشرق الأوسط و48% منها حول العالم فرصة لاكتناز المعدن الأصفر
من ساعات صدر تقرير خطير من شركة إدارة الاستثمارات "إنفيسكو ودي شركة عالمية استشارية قالت فيه إن معظم البنوك المركزية في الشرق الأوسط ناوية ترفع احتياطياتها من الدهب خلال الـ3 سنين الجاية وهتشتري كميات ضخمة من المعدن النفيس عشان تأمن نفسها من مؤشرات انهيار الدولار مع اتجاه بنك الاحتياطي الفدرالي الامريكي لتخفيض سعر الفايدة من ناحية ومن ناحية تانية مخاوف تفاقم أزمة الديون الامريكية زي ما قلنا واللي وصلت لحوالي 33 تريليون دولار.
وحسب التقرير 78 في المية من البنوك المركزية في الشرق الأوسط، مقارنةً بـ37 في المية منها حول العالم، بتستهدف زيادة حيازتها للدهب زي ما قلنا خلال السنين الجاية، وده وفق إحصاء أجرته "إنفسكو" شمل 57 بنك مركزي حول العالم كمان فيه 70% من البنوك المركزية في المنطقة، و35% منها حول العالم، رفعت مستوى احتياطيات الذدهب لديها خلال ال3 سنين اللي فاتوا... وإن فيه 20 بنك مركزي قرر زيادة حيازات الدهب السنة الجاية، بدافع من المخاطر الجيوسياسية والمالية المتزايدة، وده حسب تقرير صادر عن مجلس الذهب العالمي.
والأخطر في سوق الدهب إن فيه توقعات باستئناف بنك الشعب الصيني لمشتريات الدهب بكميات ضخمة ضمن سياسة تاني أكبر اقتصاد في العالم لتنويع احتياطياته والتحكم بعملته ضمن النطاق المدار..
يعني ايه الكلام ده وايه اللي هيحصل مع كميات المشتريات الضخمة للدهب عالميا؟
طبعا دي مش عاوزة كلام لأن اي زيادة في الطلب على الدهب في وقت المعروض منه قليل في العالم معناها قفزات كبيرة في اسعار المعدن الاصفر محليا وعالميا طبعا وشفنا إزاي أسعار الدهب زادت بأكتر من 20% تقريباً في خلال 6 شهور بس من 2024، مدعومة بالمشتريات الكبيرة من البنوك المركزية، وشهية المستهلكين القوية في الصين، والطلب على أصول الملاذ الآمن مع تصاعد التوترات الجيوسياسية، ووصل سعر الأونصة لحوالي 2400 دولار ومتوقع وصولها لأكتر من 3000 دولار.
ودا معناه زيادة كبيرة في سعر الدهب في الصاغة المصرية على مدار الشهور الجاية لأن سعر الدهب عندنا مرتبط بالدولار العالمي وعشان كده بنقولك دي أنسب فترة لو ناوي تستثمر في الدهب إنك تشتري وتخزن لأن متوقع الاسعار تضاعف في الفترة الجاية مع عمليات الطلب المتزايد على الدهب عالميا.