كيف نجحت مصر فى اجهاض مؤامرة صندوق النقد؟
![صندوق النقد الدولي]( /UploadCache/libfiles/5/7/600x338o/113.jpg)
هو ايه اللى حصل فى الساعات الأخيرة بين مصر وصندوق النقد الدولي؟ وليه الصندوق تأخر فى اعلان ادراج مصر على جدول اجتماعات 29 يوليو؟ وازاي البنك المركزي ووزارة المالية اجهضوا المؤامرة اللى كانت بتتعمل على مصر؟
امبارح حصل لعب على كبير مع مصر من جانب المسئولين فى صندوق النقد الدولي وحاول الصندوق ينفذ مخطط لاحراج الدولة فى ملف مهم وهو ملف المراجاعت اللى بعملها على برنامج الاصلاح اللى بتنفذه مصر
طب ايه اللى حصل ؟
صندوق النقد بيعلن كل فترة عن جدول اعمال اجتماعاته وامبارح الصبح أعلن عن الجدول من غير ما يحط اسم مصر على طاولة الاجتماع اللى جاى وده اللى خلا ناس كتير تجتهد وتأكد أن المجلس التنفيذي لصندوق النقد الدولي استبعد مصر من جدول اجتماعات المجلس للمرة التانية فى أقل من شهر وده كان معناه ان موعد صرف الشريحة التالتة البالغ 820 مليون دولار هيتم تأجيله الى وقت لاحق وأجل غير مسمى
وبمجرد نشر التقارير دي الحكومة اتحركت فورا ونشرت تأكيدات على لسان مصدر مسئول ان مفيش اى تغيير فى جدول اجتماعات مجلس الصندوق وان مصر وبرنامجها الاصلاحي مدرجين على جدول اعمال الصندوق فى اجتماع يوم 29 الجاي .. والتحرك ده كان مهم جدا وساهم فى اجهاض المؤامرة من بدايتها
طب الصندوق موقفه كان ايه ؟
بعد نشر النفي من جانب الحكومة الصندوق عمل تحديث لجدول أعمال اجتماعه الجاي وأدرج مصر بالفعل على طاولة المناقشات وبكده مصر هتصرف الشريحة التالتة من قرض ال 8 مليار فى موعده وهتستكمل باقي المراجعات فى مواعيدها المعلن عنها قبل كده من غير أى تغيير
وايه سبب البلبلة اللى عملها الصندوق؟
الصندوق بيوصل رسايل للحكومة وبيحاول يمارس ضغوط على المسئولين لتسريع وتنفيذ الشروط الصعبة اللى طلبها زي رفع الدعم عن الكهرباء والبنزين والسولار وتسريع برنامج بيع الاصول وتخارج الدولة من النشاط الاقتصادي وفتح المجال بشكل أوسع واكبر قدام القطاع الخاص
ورغم ان مصر التزمت باهم شرط وهو تحرير سعر صرف الجنيه قدام العملات المجحلية الا ان الصندوق لسه شايف ان مصر معملتش كل المطلوب منها .. لكن البنك المركزي ووزارة المالية كانوا صاحيين للترتيبات اللى بتحصل من جانب المسئولين فى الصندوق وقدروا يجهضوا المؤامرة في أسرع وقت