قرض السيارة المستعملة 2024.. 3 بنوك هتحققلك حلمك.. اعرف التفاصيل
يا ترى إيه قصة قرض السيارات المستعملة اللي بتقدمها البنوك دلوقتي، وهل القرض ده متاح لكل الناس ولا لفئات معينة، هانقولك كل التفاصيل في الفيديو ده.
بص يا سيدي، لو نفسك تجيب عربية عشان تقضي مشاويرك وتسهل تنقلاتك، ولو بتفكر تبدأ بالمستعمل عشان تتعلم فيها وكمان عشان بتبقى رخيصة شوية، فمن هنا في بنوك كتير بتقدملك قرض السيارة المستعملة، بشروط تمويل بسيطة، وأسعار فائدة قليلة.
أول البنوك دي هي البنك العربي، اللي بيقدم تمويل بيوصل إلى 100% من قيمة السيارة، وبأسعار فائدة ثابتة، تتراوح بين 28.5% وحتى 36%.
والتمويل بيوصل ل 900 ألف جنيه مع فترات سداد 5 سنوات، وكمان بيوفرلك تأمين على الحياة، وأسعار خاصة للتأمين على العربية كماه.
ومن أهم مميزات القرض ده، سرعة الإجراءات يعني الفلوس هتبقى في إيدك بسرعة، وكمان هتستلم الدفعة الأولى من غير تعب كتير.
ومن البنك العربي لبنك البركة، اللي هو كمان بيوفرلك قرض ميسر لشراء السيارة المستعملة.
والقرض ده بيوصل ل 750 ألف جنيه، ومن أهم مميزاته أن أسعار الفايدة ثابتة وبتتراوح ما بين 29% لحد 35%.
وميزة قرض بنك البركة، أنه بيوفرلك القرض للموديلات الأوروبية والأمريكية واليابانية بحد أقصى 4 سنوات من سنة الصنع، والعربيات الكورية بحد 3 سنوات.
وبتوصل مدة التمويل إلى 84 شهرا، علمًا بأن القرض ده بيتوافق مع أحكام الشريعة الإسلامية.
تالت قرض للسيارات المستعملة، بيجي من بنك قطر الوطني QNB، واللي بيتمتع بمجموعة مزايا، أولها أنه بيوصل ل 750 ألف جنيه، وبيغطي 75% من قيمة السيارة العادية، و70% من السيارات الكهربائية.
وسعر العائد على قرض ده تنافسي وبفايدة ثابتة من 28% لحد 35%، كمان بيتم خصم الأقساط أوتوماتيكيا من الحساب الجاري، دون تدخل من العميل.
ومدة قرض Qnb، بتوصل ل 60 شهرًا، يعني هتسدد وأنت مستريح.
ولو ماتعرفش، بنك قطر الوطني بيمول كمان جميع أنواع السيارات المستعملة ما عدا الماركات الصينية، علما بأن الحد الأدنى لتاريخ التصنيع لا يتجاوز 7 سنين.
وفي النهاية عزيزي المشاهد، لو هتجيب عربية مستعملة، هتروح على بنك إيه؟
.
