هدية مدبولي ومفاجأة المركزي.. ومصير سعر الدهب.. وإيه للي بيحصل في ملف الغاز والبترول.. وتفاصيل ساعات الرعب في فودافون كاش.. وحكاية دولار كامل الوزير
![البنك المركزي المصري]( /UploadCache/libfiles/5/6/600x338o/987.jpg)
أسبوع مليان مفاجأت اقتصادية ومالية وأخبار حلوة .. ياترى إيه أهم الأحداث اللي عاشها المصريين اليومين اللي فاتوا .. خليكم معانا للأخر وهنعرف التفاصيل.
أول وأهم حدث مفرح للمصريين كان اعلان الحكومة أخيرا وقف العمل بتخفيف الاحمال بداية من الاحد اللي جاي يعني بعد 48 ساعة من دلوقتي يعني مفيش قطع كهربا الفترة اللي جاية وشهور الصيف كلها ودا كان الحدث الاهم لأن المصريين عانوا كتير جد من قطع الكهربا بسبب زيادة الاستهلاك مع موجة الحر الغير مسبوقة.
مدبولي فسر قرار وقف العمل بخطة تخفيف الاحمال بتوافر السولار والغاز اللازم لتشغيل محطات انتاج الكهربا بعد استيراد الدولة لكميات كبيرة من الوقود على مدار الايام اللي فاتت ووجه رئيس الحكومة الشكر للمصريين لانهم استحملو قطع الكهربا في عز الحر.
الحدث الاهم التاني في تقريرنا النهاردة كان بخصوص قرار لجنة السياسة النقدية في البنك المركزي واللي قررت تثبيت سعر الفايدة واللي جت في نفس التوقعات اللي قال عليها بانكير بثبيت سعرى عائد الإيداع والإقراض لليلة واحدة عند 27.25%، 28.25% على الترتيب، أو ربما تخفيض محدود لسعر الفائدة.
من بين الاحداث المهمة اللي عاشتها مصر في الاسبوع اللي فات هو حالة الرعب اللي أصابت أصحاب محافظ الكاش بعد الخلل اللي حصل في خدمات فودافون كاش ووصول رسايل للعملا في صباح الاربعاء الباكر بسحب أموال من محافظهم دون أن يقوموا بأي تحويلات.
وحسمت خدمة العملاء لـ"فودافون كاش" الجدل واعترفت بوجود عطل وارتباك في الخدمة، مما أدى لإرسال رسائل بسحب مبالغ مالية من حسابات العملاء لكن أكدت إن مفيش عمليات سحب أو تحويل فعلية للفلوس تمت وإن الأرصدة في المحافظ الالكترونية محمية بشكل تام وإن الحكاية كان فيه تحديث في التطبيقات وفعلا المشكلة اتحلت على اخر النهار والناس اتطمنت علي فلوسها.
من بين الأحداث المهمة في الايام اللي فاتت كان تصريحات الفريق كامل الوزيروزير النقل والصناعة عن الدولار واللي سببت حالة من الجدل على مواقع التواصل الاجتماعي والسوشيال ميديا وخاصة تصريحه عن امكانية وصول سعر الدولار لـ10 جنيه لو البلد ركزت أكتر على التصنيع والتصدير.
كامل الوزير ظهر فى برنامج تلفزيونى كان بيتكلم فيه عن مسئوليته عن ملف الصناعة الفترة الجاية وقال انه عنده توجيهات وتعليمات مشددة من الرئيس السيسي في التوسع بالصناعة، لأنها مستقبل مصر وقال إن مصر هتصنع الدولار وتوفره من خلال توسيع وتنويع التصنيع وزيادة التصدير.
الحدث التالي اللي شغل تفكير المصريين كلهم كان اللي بيحصل في سوق الدهب والارتفاعات الكبيرة في الاسعار على مدار الايام اللي قاتت واقترابه عالميا من 2500 دولار ووصوله في الصاغة لذروة الارتفاع وسجل 3315 حنيه لعيار 21 في نهاية تعاملات الخميس.
وبتشير التوقعات إلى استمرار ارتفاع الدهب عالميا لغاية صدور قرار بنك الاحتياط الفدرالي الامريكي يوم 27 يوليو الجاي والتوقعات بانتهاج الفدرالي لسياسة خفض الفايدة على الدولار في اجتماعاته الجاية.
من بين التقارير المهمة كان التطور الكبير في ملف التنقيب عن البترول والغاز..
وزي ما احنا متابعين الحكومة دلوقتي مهتمة جدا بتحقيق طفرة كبيرة في مجال التنقيب عن البترول والغاز والثروات المعدنية واللي مصر حاليا حاطة عليه امل كبير في زيادة كميات الانتاج وبالتالي توفير فاتورة الاستيراد الخارجي وتقليل نزيف العملات الاجنبية وخصوصا من الدولار لاستيراد شحنات من الوقود لتحقيق الاكتفاء والاستهلاك الداخلي .
وزير البترول والثروة المعدنية كريم بدوين قال إن فيه حالياً 145 اتفاقية التزام سارية في مجال البحث والاستكشاف عن الزيت والغاز، وقعتها الحكومة مع 40 من الشركاء الخارجيين، وإنه مخطط حفر 110 بير استكشافية للغاز والزيت بإجمالي استثمارات 1.2مليار دولار خلال العام المالي الحالي، ده غير حفر 586 بير استكشافي للغاز والزيت بإجمالي استثمارات 7.2 مليار دولار حتى 2030.