وكلاء السيارات يستغيثون بمدبولي.. إيه اللي حصل في السوق

ايه اللي بيحصل في سوق السيارات اليومين دول وإيه حكاية النافذة الجمركية المعطلة وليه التجار خبطوا واستغاثو بمصطفي مدبولي عشان ينقذ الموقف.. تعالوا نشوف إيه الحكاية تابعونا للنهاية

لسه الحكاية والأزمات ماخلصتش في سوق السيارات رغم الانفراجة الاخيرة في الاسعار وبدء دخول السيارات اللي كانت محجوزة في المواني والناس قالت خلاص السوق استقر ونستني الاسعار لما تنزل أكتر لكن صدر تصريح امبارح صادم من شعبة السيارات قالت فيه بالبلدي كده اللي مش هيشتري عربية النهاردة هيندم بكرة ومن ساعة التصريح ده والدنيا مقلوبة.
طيب ليه شعبة السيارات حذرت من ارتفاع الاسعار مع إن فيه انفراجة حصلت اليومين اللي فاتوا؟
شوف ياسيدي السؤال ده جاوب عليه اللواء عبد السلام عبد الجواد، عضو شعبة السيارات باتحاد الغرف التجارية، وقال إن السوق بيتجه نحو الزيادة وليس الانخفاض زي ماكان بيتردد إن الاسعار هتنزل الارض بداية من يوم 25 يوليو الحالي وفسر عضو الشعبة رأيه الصادم بتراجع المعروض لعشرات العلامات التجارية وخاصة المستوردة.

وشرح مسئول الشعبة وقال إن تخفيض أعداد السيارات المفرج عنها لصالح الوكلاء، ووقف الإفراج بشكل تام عن سيارات الاستيراد الشخصي ذوي الاحتياجات الخاصة نتج عنها نقص كبير بالمعروض، وشرح كمان إن الزيادات المرتقبة بالأسعار ملهاش علاقة بتوافر الدولار ولكن بنقص السيارات في السوق وزيادة الطلب، خاصة إن الوقت ده من السنة بيعتبر موسم لشراء السيارات والراجل الحقيقة اتكلم بالارقام وقال إن معدلات المبيعات لسه بتتراجع سنة بعد سنة إونه قبل 5 سنين كانت المبيعات السنوية تصل إلى 240 ألف سيارة ووصلت السنة اللي فاتت 102 ألف سيارة يعني نزلت النص بالظبط.
طيب ايه الجديد في أزمة السيارات بعد كلام عضو الشعبة الصادم؟
شوف ياسيدي في الساعات الاخيرة تجار ووكلاء شركات السيارات في مصر اجتمعوا مع بعض وحصلت اتصالات واتفقوا إن السوق داخل على كارثة لو محصلش تحرك من الحكومة ورجعت تدخل الشحنات الجديدة من غير تعقيدات في الجمارك واتفقوا كمان إنه هيخاطبوا الدكتور مصطفي مدبولي ويبعتوله رسالة أو مذكرة عاجلة بتقوله إلحق السوق قبل مايوقف ويتجمد تامي والمذكرة العاجلة دي فيها مطالب واضحة من الوكلاؤ أولها إعادة تفعيل منظومة التسجيل المسبق للشحنات الواردة على النافذة الجمركية أو «ACI» الموحدة، بعد  توقفها أو تعطلها لفترة امتدت لأكتر من شهرين وكمان إعادة النظر في القرارت الاخيرة بوقف استيراد سيارات المعاقين حتي لو مؤقت والغاء شرط تحديد حصص الاستيراد من الخارج لأن السوق في حالة عطش شديد وفيه نقص في المعروض وفي نفس الوقت الناس مستنية الاسعار تنزل أكتر يعني فوضى كبيرة في سوق السيارات.. ياترى ايه اللي هيحصل بعد المذكرة دي.. هنشوف في الايام الجاية وهنقولكم على التفاصيل أول بأول.