إزاي كامل الوزير هيصنع الدولار في مصر؟.. اعرف التفاصيل
![كامل الوزير]( /UploadCache/libfiles/5/6/600x338o/930.jpg)
يا ترى إيه سر التصريح الغامض للفريق كامل الوزير، وليه قال الكلام ده دلوقتي، وهل تصريحه له علاقة بقرار لجنة السياسات النقدية البنك المركزي المرتقب يوم الخميس الجاي ولا لأ.. هنعرفك التفاصيل في التقرير دة.
امبارح وزير النقل الفريق كامل الوزير طلع في مقابلة تلفزيونية، وقال مجموعة من التصريحات المهمة، واللي منها "هانصنع الدولار في مصر، وهيوصل ل 10 جنيه".
ومن هنا نقدر تقولك إن الفريق كامل الوزير، كان يقصد بهذا التصريح.. تطوير الصناعة المصرية، وتحويل قطاعاتها لقطاعات رابحة تقدر تكفي الاحتياجات المحلية، وتصدر كمان للخارج، وبالتالي تقدر تجذب الدولار الأمريكي اللي هتصدر بيه البضائع المصرية، وبدل ما نشتريه.. سعر ينزل عندنا وممكن يوصل ل 10 جنيه زي ما قال الوزير.
الفريق كامل اللي هو بيشغل دلوقتي منصب نائب رئيس الوزراء للتنمية الصناعية ووزير النقل والصناعة، قال إن عنده توجيه من الرئيس عبدالفتاح السيسي بالتوسع بالصناعة، لأنها مستقبل مصر، وأكد أنه شغال على تطوير الصناعة عشان ينعكس ويعود على الأمور الحياتية والمعيشية للمواطن يوميا بالإيجاب، وأكد كمان أن : "عندما نطور الصناعة ونزود إنتاجنا من الصناعة، سنصنع الدولار، بمعنى سيكون لدينا دولار زيادة”.
كمان الوزير اتكلم على أن تخفيض قيمة الجنيه في الفترة الحالية بيعطيه كمصنع ووزارة صناعة ومستثمرين أفضلية، وده اللي قاله له كتير من المصنعين والمستثمرين، يعني انخفاض سعر الجنيه المصري أمام الدولار حاليا بيعتبر فرصة كبيرة لتشجيع الصناعة وتقوية الجنيه أمام الدولار.
ببساطة التصريحات دي، بتؤكد أن في نية واضحة وجهد كبير مخطط له من الفريق كامل، لإدارة وزارة الصناعة بشكل أفضل، وحل أزمات قطاعاتها المتعثرة وتحويلها إلى جهات رابحة، وده تكليف واضح من القيادة السياسية لتعزيز الاقتصاد المصري وتخفيف الضغط على العملة المحلية.
خطة الوزير لتصدير الدولار، كمان شاملة تحسين جودة المنتجات المحلية المصرية عشان تقدر تنافس المنتجات التانية في الأسواق الأوروبية والعالمية، يعني لو فعلا نجح هيقدر يسحب البساط من العملات الأجنبية ويعيد لينا عصر قوة الجنيه المصري.
زيادة التصدير وتقليل الاستيراد.. كانت كمان من ضمن التصريحات المهمة للفريق، واللي اعتبرها أحد الحلول الرئيسية لتحقيق التوازن المطلوب في سوق العملات، ومن هنا المصانع هتشتغل والإنتاج يزيد ونوسع في التصدير.. يعني هنصنع الدولار اللي هيحل أزمات الكهرباء والعيش، عشان نخقق الاكتفاء وزيادة.
الوزير، كمان فتح الباب للمستثمرين اللي لهم دور مهم في تحقيق التوازن للجنيه المصري، وقال لهم نصا: إن
انخفاض قيمة الجنيه المصري أمام الدولار يمثل فرصة استثمارية كبيرة لتعزيز الصناعة المحلية وجذب المزيد من الاستثمارات، وبكده نقدر نقول إن ده هينعكس بالايجاب على تحسين الحياة اليومية للمواطنين وتوفير فرص عمل جديدة وزيادة الدخل.
وفي النهاية عزيزي المشاهد، تفتكر كامل الوزير هيقدر يصنع الدولار في مصر ؟