مشروع العمر.. شوف الدولة هتبدأ تصدر كهرباء امتي للسعودية
![كهرباء]( /UploadCache/libfiles/5/6/600x338o/934.jpg)
كلنا عارفين اننا عندنا مشكلة في الكهرباء، وبتقطع بالساعات عن كل بيوتنا، لكن هل تعرف ان فيه مشروع ضخم جدا حاليا شغالين عليه للربط الكهربائي بين مصر والسعودية هيدخل مليارات الدولارات لمصر، يا تري اية تفاصيل المشروع ده واية الاستفادة بتاعته
الجمهورية الجديدة اللي الحكومة والقيادة السياسية شغالين عليها قائمة في المقام الأول علي تعظيم الاستفادة الاقتصادية من كل نواحي وموارد الدولة، وحاليا جه الدور علي الكهرباء وتحويلها من قطاع مستهلك محتاج دولارات وصرف كتير من الدولة لقطاع بيدخل مليارات الدولارات لخرينة الدولة المصرية، وده هيحصل عن طريق المحطات والمنشات اللي اشتغلت عليها الدولة علي مدار 10 سنين فاتوا، وفعلا مصر بقت عندها بنية تحتية كبيرة جدا في مجال الطاقة هتحولها لمركز إقليمي لتبادل الطاقة في افريقيا والشرق الأوسط .
طيب أية اللي بيحصل دلوقتي في قطاع الكهرباء وازاي مصر هتتحول لمركز اقيليمي لتبادل الطاقة؟.
حاليا الدولة بنسبة اكثر من 90% انتهت من حل مشكلة تخفيف الاحمال وبداية من الأسبوع اللي جاي مش هيكون عندنا ازمة تخفيف احمال تاني ومفيش كهرباء هتقطع عن البيوت بخصوص تخفيف الأحمال، والدنيا هتنور تاني والحياة ترجع لطبيعتها، وبعد النجاح ده ومع وجود حكومة جديدة واهداف اقتصادية جديدة الحكومة كملت خطة الربط الكهربائي مع الدول اللي وقعنا معاها اتفاقيات طاقة أول الدول دي هيا الممكلة العربية السعودية واللي الدولة وقعت معاها اتفاقية للربط الكهربائي بقدرة 3000 ميجاوات وات.
طيب اية هيا تفاصيل مشروع الربط الكهربائي بين مصر والسعودية؟.
مشروع الربط الكهربائي بين مصر والسعودية هو أول خطوة فعلية لتحويل مصر لمركز عالمي لتبادل الطاقة والمشروع ده هيربط أكبر شبكتين للكهرباء في الوطن العربي مع بعضهم وهيوصل حجم تبادل الطاقة بين البلدين لـ 3 آلاف ميجا وات فى أوقات الذروة .
حاليا مصر والسعودية شغالين بكل قوة للانتهاء من تنفيذ وانشاء البنية التحتية للمشروع واللي وصلت لـ60% من اجمالي التنفيذ، والمتوقع أن المرحلة الأولى من التشغيل للمشروع هتبدأ في يوليو 2025 بتكلفة هتوصل لـ 1.8 مليار دولار، والدولتين هيكملوا التشغيل الكلي للمشروع بقدارت 3000 ميجاوات مع بداية عام 2026.
وزارة الكهرباء حاليا شغالة في مرحلة وضع المواسير الضخمة اللي هيعدي منها كابلات الربط الكهربائي واللي هتوصل لـ8 كابلات من خلال البحر الأحمر بإجمالي طول هيوصل لـ22 كيلومتر.
وزارة الكهرباء قالت كمان، ان تشغيل المرحلة الأولى من المشروع هتكون بقدرة إنتاجية 1500 ميجاوات في يوليو 2025 والمرحلة التانية هتكون في بداية عام 2026 وكابلات الكهرباء هتعدي تحت الشعب المرجانية في البحر الأحمر في منطقة خليج العقبة.
الكهرباء قالت ان المشروع بيتكون من 3 محطات محولات ضخمة الأول منهم هيكون في شرق المدينة المنورة والثاني هيكون في مدينة تبوك في السعودية والثالث هيكون عندها هنا في مصر في مدينة بدر شرق القاهرة، والمحولات دي هيربط بينها خطوط هوائية هيوصل طولها لـ 1350 كيلومتر ده غير الكابلات البحرية اللي هتربط شبكات الكهرباء بين البلدين وبتنفذها تحالفات لـ 3 شركات عالمية علشان المشروع يخدم الخدمة واللي هيكون لها عوائد اقتصادية كبيرة علي مصر والسعودية.