هتنفذ ولا زي اللي قبلها.. إيه المختلف في حكومة مدبولي التانية

 
 
ياترى تصريحات وزراء حكومة مدبولي التانية قابلة للتنفيذ ولا كلام للاستهلاك المحلي ولو حصل إزاي شكل مصر هيتغير وايه الجديد في حكومة مدبولي ومكانش في الحكومات اللي قبل كده.. تابعونا لآخر التقرير وهنعرف التفاصيل 
 
من ساعة حكومة مدبولي التانية ماحلفت اليمين والناس بتسمع تصريحات وردية عن الاقتصاد والتنمية والاسعار وغيرها من الوعود والناس مستنية التنفيذ لأن الكلام مفيش اسهل منه.. لكن خلونا نمشي مع الأرقام ونقارنها بالتصريحات اللي اتقالت هنبدأ بكلام الوزير كامل الوزير وزير النقل والصناعة واللي قال فيها إن مصر تقدر تحقق طفرة صناعية تقفز بأرقام التصدير واتكلم إن الصناعة لوحدها كفيلة تخسف بسعر الدولار من 50 جنيه ل25 و10 جنيه كمان لو الطفرة دي حصلت ونظريا الوزير بيتكلم صح لأن التصدير الكتير واللي مش هيكون أقل من 200 مليار دولار ودي أرقام أقل من دولة زي تركيا صادراتها داخلة على 300 مليار دولار ومعندهاش الإمكانيات والقدرات الاقتصادية زي اللي في مصر.

لو قدر كامل الوزير يشغل ال13 ألف مصنع اللي واقفين وينهي البيروقراطية والروتنين اللي لتعطل استثمارات الصناعة وقدر يتوسع في الصناعة بالشكل المطلوب الدولار فعلاً هينزل ساعتها للمستويات دي لأن ساعتها معروض العملة هيكون أكبر بكتير من الطلب بجانب أن التصنيع هينسف فاتورة الاستيراد واللي بتستنزف العملة الأمريكية يعني الدولة هتوفر دولار من ناحيتين من تقليل الاستيراد ومن زيادة التصدير وده غير تشغيل ملايين الشباب في المجمعات الصناعية الجديدة وزيادة معروض السلع في الأسواق وفي الحالتين لما الدولار ينزل ولما السلع تزيد اسعارها هتنزل بشكل حقيقي المرة دي ووزارة الصناعة أصدرت  152 ترخيصاً صناعياً جديداً خلال شهر يناير 2024 يعني في 30 يوم بس وده بيأكد إن القطاع ده حسب كلام الوزير قادر يغير شكل الدولة المصرية.

والحقيقة فيه حالة تفاؤل لأن كامل الوزير سبق وعمل نهضة كبيرة وغير مسبوقة في قطاعات وزارة النقل من طرق ومحاور وموانئ وبسببه مصر احتلت المرتبة 18 في مؤشر جودة الطرق العالمي يعني المستحيل ممكن مع الوزير.
كمان تصريحات وزير البترول والثروة المعدنية الأخيرة عن حجم اللي بيحصل في القطاع كلها بتدعمها الأرقام والاتفاقيات سواء في التنقيب عن البترول والغاز والمعادن وعدد الرخص اللي اطرحت وشغالة بالفعل بشركات مصرية وأجنبية في القطاع بتأكد أن فيه خطة حقيقية بتتنفذ عشان مصر ترجع تبقي مركز للطاقة في المنطقة وحسب الأرقام وزارة البترول بتخطط لحفر 110 آبار استكشافية بإجمالي استثمارات 1.2 مليار دولار خلال 2024 - 2025، و586 بئرا استكشافية بإجمالي استثمارات 7.2 مليار دولار حتى 2030.
طيب ايه المختلف في حكومة مدبولي الجديدة ؟.. اللي مختلف حضرتك أن الكلام هنا عن خطط وارقام ورؤية بتتنفذ بالفعل على أرض الواقع ومواعيد تسليم واستثمارات معروفة مش مجرد وعود وتصريحات وخلاص .