كامل الوزير صرف الـ2 تريليون جنيه فين.. يا ترى إيه الحكاية؟
![كامل الوزير]( /UploadCache/libfiles/5/6/600x338o/887.jpg)
يا ترى إيه قصة الـ2 تريليون جنيه اللي اتصرفت على مشروعات وزارة النقل، وليه رغم المبلغ الضخم ده، الوزارة مازالت بتقترض من الخارج.. اعرف الحكاية بالتفصيل في التقرير التالي.
الشهر اللي فات، وزارة النقل أعلنت في بيان رسمي، إن حجم مشروعات في مختلف قطاعات الوزارة سواء طرق وكباري أو سكة حديد أو مترو الأنفاق. أو غيرها من شبكات القطارات الكهربائية والسريعة، وصلت لـ 2 تريليون جنيه.
وأكدت كمان إن المبلغ ده هو حصيلة الخطة الشاملة اللي بتنفذها الوزارة ممثلة في الفريق كامل الوزير، لتطوير وتحديث عناصر منظومة النقل في مصر، وبدأ التطوير من سنة 2014 ومستمر لحد السنة دي 2024، وده كانت حصيلته الإجمالية 2 تريليون جنيه.
المبلغ ده موزع كالتالي: ( 530 مليار جنيه للطرق والكباري – 225 مليار جنيه للسكة الحديد – 1100 مليار جنيه الأنفاق والجر الكهربائي – 129 مليار جنيه للموانئ البحرية – 15 مليار جنيه الموانئ البرية والجافة والمناطق اللوجيستية – و4 مليار جنيه للنقل النهري ).
وبالفعل، تم خلال العشر سنوات الماضية إنجاز مشروعات كتيرة جدًا في هذه القطاعات، من أهمها: في مجال «الطرق والكباري».. المشروع القومي للطرق، اللي الهدف منه ربط شبكة الطرق بخطط التنمية الاجتماعية والاقتصادية للدولة وتعزيز فرص التكامل الاقتصادي مع الدول المجاورة، وكمان تحقيق الاستغلال الأمثل لثروات مصر القومية ممثلة في مناطق التعدين والسياحة والمساهمة في الخروج من الوادي الضيق.
وتم التخطيط لإنشاء طرق جديدة بإجمالي أطوال 7000 كم بتكلفة 175 مليار جنيه، وتم الإنتهاء من تنفيذ 6300 كم منها بتكلفة 155 مليار جنيه، وجاري العمل في 700 كم، كمان تم التخطيط لتطوير وازدواج ورفع كفاءة 10 آلاف كم من شبكة الطرق الحالية بتكلفة 130 مليار جنيه، وتم الإنتهاء من تنفيذ 8400 كم منها بتكلفة 110 مليار جنيه، وجاري العمل في 1600 كم.
ومن أهم الطرق اللي تم إنجازها، طريق ( كفر الشيخ – دسوق)، و طريق (طنطا – السنطة – زفتى)، والطريق الدائري الأوسطي بطول 156 كم وتكلفة 5 مليار جنيه، وطريق هضبة الجلالة وطريق السويس، وكمان 21 محور في الصعيد والوجه البحري، وده غير طرق تانية كتير في كل محافظات مصر.
ومن الطرق والكباري لـ«السكة الحديد»، اللي تم وضع خطة شاملة لتطويرها هي كمان، لأن القطارات المصرية بتنقل 1,5 مليون راكب في اليوم، وقطاع نقل البضائع بينقل حوالي 5 مليون طن سنوياً، ومستهدف وفقًا للخطة نقل 2 مليون راكب بنهاية السنة دي 2024، وكمان 8 مليون طن بضائع
كمان تم استيراد 210 جرار أمريكي جديد،و1300 عربة قطارات روسية ومجرية، بالإضافة إلى 6 قطارات أسباني فاخرة، وده غير تطوير المزلقات والمحطات وغيرها من مهمات السكة الحديد عشان يرفع معدل السلامة ويقلل الحوادث، وكمان ينقل أكبر عدد من الركاب بقطارات السكة الحديد.
نروح لقطاع مترو الأنفاق، اللي شهد هو كمان طفرة كبيرة جدًا، فتم افتتاح المرحلة الثالثة من الخط الثالث لمترو الأنفاق من العتبة إلي الكيت كات، إمبابة شمالاً و جامعة القاهرة جنوباً بطول اجمالي للمرحلة 17,7 كم وعدد 15 محطة، وكمان تم افتتاح المرحلة الرابعة من الخط الثالث للمترو ( هارون– عدلي منصور) بطول 11,5 كم وعدد10 محطات بتكلفة 28,4 مليار جنيه .
بالإضافة إلى افتتاح مرحلتين الأولي والثانية من القطار الكهربائي الخفيف LRT ( السلام – العاشر – العاصمة الإدارية ) بطول 70 كم وعدد 12 محطة بتكلفة 26,3 مليار جنيه، وجاري استكمال تنفيذ المرحلتين الثالثة والرابعة ليصل إلي 105 كم .
وده بجانب إفتتاح محطة عدلي منصور المركزية علي مساحة 15 فدان بتكلفة 1,3 مليار جنيه، واللي فيها يتم فيها تبادل الخدمة بين عدد 5 وسائل نقل ( القطار الكهربائي الخفيف LRT – الخط الثالث لمترو الأنفاق – خط سكة حديد " عدلي منصور / السويس " – السوبرجيت – الأتوبيس الترددي " عدلي منصور / السلام" ) .
كل ده، غير تنفيذ 3 خطوط من شبكة القطار الكهربائي السريع بإجمالي أطوال 2000 كم وعدد 60 محطة، وتنفيذ خطين للمونوريل.
ماننساش المواني.. هي كمان كان لها نصيب من ميزانية وزارة النقل، وبالفعل تم إنشاء مشروعات جديدة.. زي محطة تحيا مصر متعددة الأغراض وبتكلفة إجمالية 7 مليار جنيه، وكمان رصيف تداول الأخشاب والغلال ومحاور لربط ميناء الإسكندرية بمحور الفريق أبو ذكري " محور التعمير "، و(محور 54 – محور 27 – محور الدخيلة ).
ودلوقتي، جاري إنشاء محطة متعددة الأغراض علي رصيف 100 ، وده غير الموانىء البرية واللي تم فيها افتتاح ميناء 6 أمتوبر الجاف السنة دي.
أخيرًا.. قطاع النقل النهري ، اللي شهد طفرة هو كمان في عهد كامل الوزير، حيث تم تطوير الطريق الملاحي القاهرة / الإسكندرية عبر الرياح البحيري – ترعة النوبارية، وإنشاء كباري هويس المالح وتكريك ترعة النوبارية في المسافة من كم صفر الي كم 100 ، وغيرها من المشروعات لإزالة الإختناقات الملاحية بمن نهر النيل وصيانته عشان يقدر يستوعب نقل حاويات البضائع من خلاله.
وبكده نقدر نقول إن ميزانية وزارة النقل اللي وصلت 2 تريلون جنيه، موزعة على كل المشروعات دي، اللي هتخلي مصر في حتة تانية خالص، وده هيحصل قريب جدًا.
.