هيخش الأرياف.. حكاية شبكة مترو الأنفاق الجديدة.. اعرف التفاصيل
![كامل الوزير]( /UploadCache/libfiles/5/6/600x338o/855.jpg)
يا ترى إيه اللي بيحصل في وزارة النقل اليومين دول، وليه مابيفوتش يوم غير لما يكون لها بصمة واضحة بتتكلم عنها وسائل الإعلام.. هنعرفك التفاصيل في الفيديو ده.. تابعنا للنهاية.
في الحقيقة وزارة النقل بقيادة الفريق كامل الوزير، شغالة دلوقتي على مشروع مهم جدا، وهو دخول مترو الأنفاق للأقاليم، يعني بعيدا عن القاهرة والمناطق الراقية، يعني المترو هيوصل الأرياف..
الموضوع باختصار، هو إن وازرة النقل ممثلة في الهيئة القومية للأنفاق، بتعمل دلوقتي شبكة مترو صغيرة في محافظات بعينها.
طبعا، كلنا عارفين إن مترو الأنفاق هو أكتر وسيلة مواصلات مستخدمة داخل القاهرة، وده مش عشان أنه سريع وبينجزك وموجود في أي وقت، لأ ده كمان عشان طريقه سالك وأعطاله قليلة جدا بالمقارنة بأي وسيلة مواصلات تانية بخلاف عامل الأمان وقدرته على حمل عدد ضخم من الركاب وايصالهم لأعمالهم في مواعيدها.
عشان كده فكرت وزارة النقل في تنفيذ شبكات مترو جوه الأقاليم، وده طبعا بس في المناطق المزدحمة أو بيسموها "المدن المليونية"..
ومن أهم المدن دي، هي مدينة المنصورة في محافظة الدقهلية، وكشفت مصادر مسئولة في وزارة النقل، أنهم بيفكروا ينفذوا شبكة مترو صغيرة في المنصورة، ودي من المخطط لها تربط المنصورة القديمة بالمنصورة الجديدة.
ومن المنصورة لقليوب في محافظة القليوبية، كمان وزارة النقل قررت تمد الخط الثاني للمترو، اللي هو ( شبرا / الجيزة) أو ( شبرا المنيب) ، لمنطقة قليوب، وده هيكون من خلال 5 محطات بتبتدأ من محطة شبرا الخيمة وبتمر بمحطات جديدة اسمها: (ميت نما- ميت حلفا- الطريق الدائري- قليوب).
الخطة دي مازالت تحت الدراسة هي كمان، ومن المقرر البت في بدء تنفيذها قريب جدا.
كمان هيئة الأنفاق، بتفكر تمد الخط الأول للمترو المعروف بمترو (حلوان / المرج) لمنطقة شبين القناطر في محافظة القليوبية، عشان تخدم المواطنين وكمان العاملين بالمناطق الصناعية في شبين القناطر.
الوصلة دي مفترض أنها تكون بطول 19 كم، وتنقل حوالي 500 ألف راكب يومي، وتم طرح المشروع للدراسة من خلال مكتب فرنسي اسمه (سيسترا) عشان يشوف.. هل لها جدوى اقتصادية للتنفيذ ولا لأ، وبناء عليه يتم تنفيذ المشروع من عدمه.
ومن القليوبية لإسكندرية، عروس البحر المتوسط، طبعا حضرتك هتسألني إسكندرية مدينة ساحلية وتحتها أصلا مدينة أثرية كاملة، هينفع مترو الأنفاق يشتغل فيها؟
بص يا سيدي.. المترو هيشتغل في إسكندرية إزاي، الجزء الأول منه بيتم فيه استبدال خط قطارات سكة حديد أبو قير، وتحويله لخط مترو.. يعني هيغيروا السكة نفسها والمحطات عشان تكون شبه محطات المترو، أما الجزء التاني فهتمشي فيه قطارات المترو فوق سطح الأرض، يعني ببساطة على كباري علوية، مش في أنفاق تحت المدينة.
ومترو إسكندرية، مخطط له إنه يمتد من محطة أبو قير حتى محطة مصر بالإسكندرية بطول 21.7 كم، وهيشمل 20 محطة، وكمان هيتم إضافة 5 محطات جديدة بالمسار هي "باب شرق – سبورتنج - ميامي – كفر عبده - محمد نجيب" مع
وهيخدم المناطق دي (أبو قيرـ طوسون ـ المعمورة ـ الإصلاح ـ المندرة ـ المنتزه ـ العصافرة ـ ميامى ـ سيدى بشر ـ محمد نجيب ـ فيكتوريا ـ غبريال ـ السوق ـ الظاهرية ـ كفر عبده ـ سيدى جابر ـ سبورتنج ـ الحضرة ـ باب شرق ـ محطة مصر).
دلوقتي المشروع شغال وتم رفع سكة قطر أبو قير عشان خط المترو الجديد، ومن المقرر الانتهاء من أعمال تنفيذ المشروع بالكامل خلال سنتين.