مصر بتعمل قطر سريع.. اعرف هيشتغل امته وهيخدم مين؟
![صورة ارشيفية]( /UploadCache/libfiles/5/6/600x338o/756.jpg)
في الفترة الأخيرة، طلعت كلمة القطر السريع تريند اكتر من مرة، ومن هنا ناس كتير قعدت تسأل يا ترى ايه هو القطر السريع، هل زي قطر السكة الحديد ولا المترو، ولا حاجة جديدة خالص ماشوفنهاش قبل كده في مصر؟
احنا هنا هنقولك التفاصيل..
اللى حصل إن وزارة النقل اللي بيقودها الفريق كامل الوزير، بتنفذ 3 خطوط لشبكة القطر الكهربائي السريع في مصر، واللى المفترض أنه هيخدم كل المحافظات
مش بس كده، القطر السريع مش هيتشغل لنقل الركاب أو المسافرين بس، لأ ده كمان هينقل بضايع وهيخدم على المواني
طب هيشتغل امته، وايه المناطق اللي هيمر بيها؟
بص يا سيدي، دلوقتي القطر السريع اتنفذ منه أول خط بنسبة 60%، وكراكات وزارة النقل نزلت الصحرا وحفرتها، وده كان بالظبط في منطقة غرب حلوان
المنطقة دي بقى، هيكون فيها أول محطة للقطر السريع داخل القاهرة، وده في الخط الأول المعروف باسم (العين السخنة / العلمين الجديدة / مرسى مطروح)، والخط ده بيسموه الخط الأخضر لأنه وسيلة نقل آمنة وصديقة للبيئة، يعني من الآخر مفيش تلوث
-طب إيه محطاته؟
كل الناس اللى ساكنه أو بتتردد على العين السخنة هتستفيد منه، وكمان سكان محافظات بتبدأ من القاهرة مرورا بالجيزة وبعدها الفيوم ثم بني سويف واسكندرية لحد مرسى مطروح.
وبالنسبة للي هيركب الخط الأول للقطر السريع، فهي دي محطاته: (العين السخنة ــ العاصمة الإدارية ــ محمد نجيب - القاهرة ــ جنوب الجيزة -" تفريعة للعياط - الفيوم- بنى سويف"ــ حدائق أكتوبر ــ 6 أكتوبر ــ سفنكس ــ السادات ــ وادى النطرون ــ النوبارية ــ الإسكندرية ــ برج العرب ــ العامرية ــ الحمام ــ العلمين ــ سيدى عبدالرحمن ــ الضبعة ــ سوان ليك ــ رأس الحكمة ــ ألماظة باى ــ مطروح).
يعني هتركب أكتر من 25 محطة عشان توصل من العين السخنة لحد مطروح؟
طب الوقت قد إيه؟
3 ساعات بس من القاهرة لمطروح، وهتحس نفسك في رحلة سياحية
طب بالنسبة لحبايبنا أهل الصعيد، هيستفادوا ازاي من القطر السريع؟
بص يا سيدي، دلوقتي وزارة النقل شغالة على الخط التاني من القطر السريع، واللي هو ( أكتوبر – أسوان – أبوسمبل ) وطوله 1100 كيلو مترو
وكمان بتخطط دلوقتي لتنفيذ الخط الثالث، اللي هو ( قنا – الغردقة – سفاجا ) بطول 225 كيلو مترو كمان.. فعمرها ما تنسى الصعايدة
ومن هنا نقدر نقول، إن المشروع كله طوله ألفين كيلو متر وعدد محطاته 60 محطة.. يعني من الآخر هيخدم كل المحافظات، وأي مسافر من شمال مصر لجنوبها ومن شرقها لغربها؟
طبعا، حضرتك هتسألني عن سعر التذكرة؟
لحد دلوقتي الجهات المعنية محددتش سعر لتذكرة القطر السريع، وقالوا هاتتحدد بعد ما نخلصه ونشغل أول خط على الأقل.. وقالوا كمان ماتقلقوش من سعر التذكرة، هتبقى مدعمة وهيراعوا فيها دخل المواطن.
وفي نهاية التقرير، قولنا في التعليقات أنت منين، وهنقولك القطر السريع هيجيلك ولا لأ؟