اوعي المونوريل.. أول وسيلة مواصلات في مصر هاتشتغل من غير سواق.. يا ترى إيه الحكاية؟
![مونوريل]( /UploadCache/libfiles/5/6/600x338o/731.jpg)
كتير مننا سمع في الفترة الأخيرة عن المونوريل، في جزء من الناس يعرف إيه هو، لكن الأغلبية لسه مايعرفوش أي حاجة عنه.
إحنا بقى هنقولك في الفيديو ده، إيه هو المونوريل، وإيه سر التسمية؟.. وكمان مين اللي هيستفاد بيه.
بص يا سيدي، كلمة مونوريل عبارة عن جزئين، الجزء الأول (مونو) يعني صغير، و(ريل) يعني سكة حديد، يعني فيما معناه قطر سكة حديد بس صغير.
المونوريل، اللي حضرتك بتسمع عنه، بيتنفذ في مصر لأول مرة في التاريخ، وهو وسيلة نقل جماعية زي مترو الأنفاق كده.. عصرية وسريعة وهايشتغل بالكهربا يعني هايخفض معدلات التلوث، بس الفرق الوحيد بينه وبين المترو أنه هيمشي على خط أحادي.. نعم!! يعني إيه خط أحادي حضرتك؟
بص يا سيدي، الخط الأحادي ده عبارة عن كمرة خرسانة مبنية على مسار علوي.. يعني فوق سطح الأرض بحوالي 4 أمتار، واحدة رايحة وواحدة جاية، يعني مش سكة مسطحة زي قطر السكة الحديد أو المترو.
خد المفاجأة، المونوريل هايشتغل من غير سواق، والقطر عبارة عن 4 عربيات هتعمل رحلات "رايح جاي" وبتشتغل بالكمبيوتر، أو عن طريق حاجة كده اسمها غرفة تحكم مركزية.
طب ده أمان يا مان؟ ولا هنركب واحنا خايفين؟
ماتقلقش يا سيدي، المونوريل متوافر فيه كل عناصر الأمان، يعني اركب وأنت مش قلقان.
طب هيتشغل امته، وفين؟
ركز معانا، دلوقتي وزارة النقل نفذت خطين للمونوريل، الأول من القاهرة لحد العاصمة الإدارية الجديدة، وده اسمه خط شرق النيل وطوله 56 كيلو متر.
وهي دي محطاته: ( الاستاد، هشام بركات، جامعة الأزهر، الحي السابع، المنطقة الحرة 1، المنطقة الحرة 2، مسجد المشير، شارع التسعين، المستشفى الجوي، فندق تويست، جامعة المستقبل، إعمار، ميدان النافورة، البروة، بيت الوطن، مسجد الفتاح العليم، الحي السكنية، الدائري الإقليمي، ابعاصمة الإدارية، فندق الماسة، الحي الحكومي، حي السفارات، مدينة العدالة)
وخط العاصمة الإدارية ده، معدلات إنجازه زادت عن 75%، ومن المقرر افتتاحه وتشغيل للركاب في شهر نوفمبر السنة من الجاية 2025.
وماتنساش إن مونوريل العاصمة هيقف في محطة عدلي منصور التبادلية، يعني ممكن حضرتك تنزل هناك، ومن المحطة دي تاخد مترو أو قطر سكة حديد أو أتوبيس سوبر جيت يوصلك لأي محافظة في مصر.
طب بالنسبة للخط التاني.. إيه ظروفه؟
الخط التاني للمونوريل، بيسموه خط غرب النيل، وبيربط القاهرة وتحديدا منطقة المهندسين بمدينة 6 أكتوبر.
طول الخط ده 43 كيلو متر، وبيضم 13 محطة، وكمان بيتبادل الخدمة مع الخط الثالث للمترو في محطة بتتنفذ دلوقتي اسمها "وادي النيل"، وكمان بيتبادل الخدمة مع القطر السريع في محطة اسمها "نقابة المهندسين" الموجودة في 6 أكتوبر.
طب محطاته هتكون فين؟
محطاته حضرتك عددها 14 محطة، وهي: (أكتوبر الجديدة - المنطقة الصناعية - السادات - جهاز مدينة 6 أكتوبر - نقابة المهندسين - جامعة النيل - محطة هايبر وان - طريق القاهرة الإسكندرية الصحراوي - بشتيل - المنصورية - المريوطية - الطريق الدائري – وادي النيل)، وبالتالي كل اللي ساكنين في الأماكن دي هيستفادوا من المونوريل.
أما عن موعد افتتاحه أو تشغيله للركاب، فده هيكون في شهر أكتوبر من السنة الجاية للمشروعين مع بعض.
طبعا، حضرتك هتسألني عن سعر التذكرة، في الحقيقة هي لحد دلوقتي ماتحددتش، لكن كانت في مصادر في الوزارة، بتقول إنها هتبقى 50 جنيه، بس وزارة النقل كذبت كل ده، وقالت لهم: بطلوا هري.
وفي النهاية متابعينا الكرام، لو هتركب المونوريل هتستخدم أي خط، وهتنزل في محطة إيه؟