السيسي قال عاوز 145 مليار دولار.. شوف هنجيبهم منين
حكومة جديدة وخطة جديدة لدعم الصادرات المصرية لكل دول العالم.. يا تري مصر مستهدفة تحقق كام مليار دولار .. وهتوصل للرقم ده ازاي وايه تعليمات الرئيس في الملف دا.
التعديل الوزاري الأخير واللي تضمن تغيير اغلب وزراء الموجودة الأقتصادية جاي بامال جديدة ومستهدفات جديدة لزيادة الصادرات علشان توصل لـ 145 مليار دولار في 2030 بدلاً من 100 مليار دولار ودي تعليمات الرئيس بالعمل على زيادة الصادرات لاقصى درجة.
طيب مصر بتعمل اية علشان توصل لتحيق 145 مليار دولار في 2030؟.
الحكومة في الفترة الرئاسية الجديدة بتستهدف مضاعفة معدل نمو الصادرات بمعدل ميقلش عن 15% سنويا علشان تحقق 145 مليار دولار في 2030، من خلال الاعتماد على الحوافز التصديرية وحوافز القطاعات الإنتاجية وتعميق التصنيع المحلي ودعم الإنتاج، وعلشان مصر تحقق الرقم ده اخذت شوية إجراءات مهمة جدا زي زيادة الاعفاءات الضريبة لمدة 5 سنوات ورد 50% من قيمة الأرض الصناعية المخصصة لاقامة المصانع والمشروعات الاستثمارية في حالة إنجاز المشروع خلال نصف مدة التخصيص، وإعفاءات الضريبة واللي بتوصل لـ 10 سنين في بعض القطاعات ذات الأولوية التي تساهم في الحد من فاتورة الاستيراد، وبرامج للحوافز التصديرية تصل إلى 6 مليار جنيه سنويا.
طيب اية اللي احنا هنعمله علشان نوصل ل 145 مليار دولار ايرادات من الصادرات ؟.
بيانات الرقابة على الصادرات كشف ارتفاع الصادرات المصرية السلعية في 5 شهور الأولي من2024 وسجلت 16 مليارا و551 مليون دولار بزيادة مليار 477 مليون دولار عن الرقم اللي حققته الصادرات المصرية في نفس الفترة دي من السنة اللي فاتت، وعلي فكرة دي أول مرة الصادرات المصرية توصل للرقم ده في 5 شهور من السنة .
الحكومة كمان بتستهدف في الفترة الرئاسية الجديدة زيادة الصادرات السلعية بمب الأسواق الخارجية عن طريق زيادة جودة وتنافسية المنتجات المصرية بالسوق المحلي والأسواق الخارجية، وده هيكون طريق الدولة لتحقيق 145 مليار دولار سنوياً.
طيب اية هيا اكبر الأسواق اللي بتستورد كنا بضائع دلوقتي .
في أسواق كتيرة حول العالم بتستورد منتجات من مصر لكن اكبر الأسواق دي هيا المملكة العربية السعودية واللي استوردت منتجات وسلع بمليار و391 مليون دولار، وبعدها تركيا اللي استوردت منا منتجات بمليار و310 مليون دولار، وبعدها والإمارات العربية المتحدة اللي استوردت منتجات بمليار و133 مليون دولار، ثم إيطاليا اللي استوردت منتجات ب 974 مليون دولار، واخيرا الولايات المتحدة الأمريكية واللي استوردت منتجات ب 904 مليون دولار.
طيب اية هيا اهم الحاجات اللي مصر بتصدرها للخارج؟.
مصر بتصدر حاجات كتير جدا للخارج، لكن اهم القطاعات التصديرية اللي شكلت هيكل الصادرات السلعية المصرية لمصر في الـ5 شهور اللي فاتوا جت مواد البناء في المرتبة الأولي بقيمة 3 مليار و869 مليون دولار، وبعدها والصناعات الغذائية ووصل إجمالي تصديرها ل2 مليار و644 مليون دولار وبعدهم المنتجات الكيماوية والأسمدة واللي وصل إجمالي تصديرهم ل 2 مليار و491 مليون دولار، وبعدهم الحاصلات الزراعية واللي وصل إجمالي الصادرات لهم ل2 مليار و269 مليون دولار، ثم السلع الهندسية والإلكترونية واللي وصل إجمالي تصديرهم ل 2 مليار و181 مليون دولار، وبعدهم الملابس الجاهزة واللي وصل إجمالي الصادرات لهم لمليار و77 مليون دولار، ثم المفروشات والغزل والمنسوجات ووصل إجمالي تصديرهم ل 717 مليون دولار، ثم منتجات الطباعة والتغليف والورق والكتب والمصنفات الفنية واللي وصل إجمالي الصادرات منهم ل 393 مليون دولار، وبعدهم الصناعات الطبية ووصل إجمالي الصادرات منهم ل267 مليون دولار، وبعدهم جه الأثاث واللي وصل إجمالي الصادرات منهم ل112 مليون دولار، و وبعدهم جت الصناعات اليدوية وصل إجمالي الصادرات المصرية منهم ل87 مليون دولار، واخيرا الجلود والأحذية والمنتجات الجلدية ووصل إجمالي الصادرات المصرية منهم ل 49 مليون دولار.
مش كده بس لا ده كمان صادرات مصر من الموالح الطازجة والمجففة ارتفع ل 721 مليون دولار، وكمان صادرات الأسلاك ارتفعت ووصلت ل 353 مليون دولار والزيوت النفط المصنعة ارتفعت هيا كمان ووصلت ل 186 مليون دولار.
