3 أخبار سعيدة في ملف الدولار.. هل انتهت أزمة العملة الصعبة فى مصر؟
يا ترى أزمة الدولارفي مصر خلاص بتنتهى فعلا ولا ايه الدنيا؟ وايه الـ 3 أخبار السعيدة اللى حصلت وبتقول ان مصر فى الطريق الصحيح؟ وازاى الحكومة ممكن تستفيد من اللى بيحصل وتعظم عوايدها من الدولار؟
فى الكام ساعة اللى فاتوا تم الاعلان عن 3 أخبارمهمة وحاسمة فى ملف أزمة الدولار فى مصر .. وال 3 اخبار بيقولوا ان فيه تحسن ملحوظ بيحصل فى واحد من أخطر الملفات اللي كانت مصدر قلق للحكومة وللناس فى اخر سنتين.
والخبر الأول كان من البنك المركزي اللى كشف عن ارتفاع تحويلات المصريين العاملين بالخارج للشهر التالت على التوالي خلال شهر مايو 2024 بمعدل 73.8% (على أساس سنوي) لتصل إلى حوالي 2.7 مليار دولار مقابل نحو 1.6 مليار دولار خلال شهر مايو 2023.
وارتفعت تحويلات العاملين بالخارج بمعدل 26.6% مقارنة بشهر أبريل 2024 واللي سجلت خلاله حوالى 2.2مليار دولار.
طب الكلام ده معناه ايه وايه تأثيره على أزمة العملة وسوق الصرف؟
الكلام ده معناه بوضوح ان الجهاز المصرفي فى مصر استعاد من جديدثقة المصريين فى الخارج ورجعوا تانى يحولوا فلوسهم على البنوك بعد ما كانوا بيحولوها بعيدا عن القطاع المصرفي وسبب ده نجاح البنك المكركزي فى توحيد سعر صرف العملات الجنبية وعدم وجود أكتر من سعر للدولار والقضاء بشكل نهائي على السوق السودا للدولار
وطبعا ده هيكون ليه تاثير ايجابي على سوق صرف العملات الجنبية فى مصر لأن اى توافر للدولار بيساهم فى انخفاض سعر العملة الأمريكية لأن كل ما المعروضمن الدولار بيزيد وفقا لقوانين العرض والطلب السعر بيقل
الخبر السعيد التانى كان منالمجلس التصديري للصناعات الغذائية اللى أعلن إن صادرات الصناعات الغذائية خلال الشهور الخمسة الأولى من 2024 بلغت 2.7 مليار دولار محققة نسبة نمو قدرها 30% وقيمة نمو 616 مليون دولار مقارنة بصادرات نفس الفترة من 2023، اللي بلغت 2.1 مليار دولار ودي أعلى قيمة صادرات وأكبر نسبة نمو يحققها القطاع في تاريخه
وتربعت الصادرات إلى الدول العربية على قائمة أهم المجموعات الدولية المستوردة للأغذية المصنعة المصرية خلال الأشهر الخمسة الأولى من 2024، بقيمة 1408 مليون دولار، تمثل 52% من إجمالي الصادرات الغذائية، محققة نسبة نمو في القيمة 30%. يليها الاتحاد الأوروبي بقيمة 598 مليون دولار بنسبة نمو 58% وتمثل 22% من إجمالي الصادرات، الدول الإفريقية غير العربية بقيمة 191 مليون دولار وتمثل 7% من إجمالي الصادرات، وحققت نسبة نمو في قيمة الصادرات بلغت 11%، والولايات المتحدة الأمريكية بقيمة 129 مليون دولار وتمثل 5% من إجمالي الصادرات، محققة نسبة نمو بلغت 28%، وباقي المجموعات الدولية بقيمة 370 مليون دولار، والتي تمثل 14% من إجمالي الصادرات الغذائية المصرية خلال نفس الفترة، محققة نسبة نمو 7%.
أما الخبر السعيد التالت فكان من المجلس التصديري للملابس الجاهزة اللى كشف إن صادرات قطاع الملابس بلغت 1.08 مليار دولار خلال الفترة من يناير حتى مايو 2024، مقارنة بـ912 مليون دولار في نفس الفترة من 2023 بنسبة ارتفاع 19%.
ووفقا للتوقعات ممكن صادرات الملابس الجاهزة تحقق 3 مليار دولار بنهاية 2024 بالتزامن مع خطة المجلس التصديري لاستهداف أسواق جديدة وزيادة الصادرات للأسواق الرئيسية للقطاع زي السوق الأمريكي والسوق الأوروبي.
