رأس حكمة تاني في مصر .. مشروع إماراتي جديد يقلب الساحل الشمالي
![الساحل الشمالي]( /UploadCache/libfiles/5/6/600x338o/475.jpg)
ايه اللي بيحصل في الساحل الشمالي تاني وليه قلنا إنه كنز الاستثمار في مصر وايه المفاجأة الجديدة اللي هتعملها الامارات في المنطقة اليومين دول.. تعالوا نشوف إيه الحكاية
من ساعات بانكير طلع في تقرير مصور واتكلم على مستقبل الساحل الشمالي المصري وقلنا ليه بقي قبلة الاستثمار العقاري والترفيهي والسياحي والتسوق العالمي وليه هيبقي مركز لتوطين الشركات العالمية وقلنا إن ده بسبب البنية الأساسية الحديثة اللي عملتها مصر على طول الساحل الشمالي من طرق ومحاور وموانئ ومطارات وبناء العلمين الجديدة بخلاف الإصلاح المالي بتحرير سعر الصرف واللي بيعتبر مهم جدا للاستثمار ولا يقل أهمية عن مشروعات البنية التحتية اللي اتعملت وكانت سبب في استثمارات بالمليارات واللي هتوصل 185 مليار دولار في مشروعين بس وهما رأس الحكمة الإماراتي ومشروع شركة طلعت مصطفى العالمي.
ليه بنتكلم دلوقتي تاني عن الساحل الشمالي المصري ؟
عشان زي ما قلنا إنه بقي محل اهتمام كبار المستثمرين والصناديق السيادية والشركات العالمية في العالم وهتشوف في الفترة الجاية استثمارات جديدة وضخمة على طول الساحل الشمالي واللي الحكومة أعلنت مشاركه القطاع الخاص في كتير منها بالمنطقة لأنها بقت منجم مليارات واخر المشروعات الجديدة هو المفاوضات اللي بتعملها دلوقتي شركة سكاي أبوظبي للتطوير العقاري، الذراع العقاري لمجموعة دايموند الإماراتية في مصر، ودي شركة عالمية كبيرة للحصول على قطعة أرض في الساحل الشمالي خلال الفترة الجاية.
وحسب تصريحات مصطفى صلاح الرئيس التنفيذي للقطاع التجاري بالشركة إن سكاي ابو ظبي بتفاضل حاليا بين مجموعة من العروض المقدمة للحصول على مساحة تتراوح بين 200 إلى 600 فدان بخلاف أن الشركة بدأت في الأعمال الإنشائية لمشروع متكامل بمنطقة الجولدن سكوير بمدينة القاهرة الجديدة، على مساحة 50 فدانًا بإجمالي استثمارات 8 مليارات جنيه ونرجع لمشروع الساحل الشمالي واللي لسه مفهوش تفاصيل كتير لكن من مساحة المشروع وموقعه نقدر نقول إنه هيكون مشروع إماراتي عالمي في الساحل والاستثمارات فيه مش هتكون أقل من 5 مليارات دولار حسب التوقعات وهيكون مشروع عقاري سياحي ترفيهي وتسويق وتسوق كمان .
مش بس الامارات الوحيدة المهتمة بالاستثمار في الساحل الشمالي لكن شركات وبراندات أوربية هتعمل مشروعات بالمليارات هناك زي مشروعات جرجوب بجوار مرسي مطروح واللي هيتعمل فيها مشروعات ب24 مليار يورو بعد توقيع الهيئة العامة لميناء الإسكندرية وهيئة تنمية واستخدام الطاقة الجديدة والمتجددة اتفاقية مع تحالف شركة (ديمي هايبورت إنرجى إن في البلجيكية)؛ لإقامة مشروع لإنتاج الهيدروجين الأخضر ومشتقاته والأمونيا الخضراء بالمنطقة وحسب وزير النقل، الفريق كامل الوزير، التكلفة الاستثمارية للمرحلة الأولى للمشروع تبلغ 3 مليارات يورو، وهتتمول بالكامل بمعرفة الشركة لتصل التكلفة الاستثمارية للمشروع ككل إلى 24 مليار يورو لمراحل المشروع التلاتة وقال كمان إن المشروع يعتبر ضمن المشروعات المشتركة مع الاتحاد الأوروبي، وفي إطار خطط وزارة النقل لتوفير ما يصل إلى 2 مليون طن سنويا وقود أخضر بما يوفر الاحتياجات الأساسية لدول الأتحاد الأوروبي من الطاقة، كما يحقق المصالح المشتركة مع دولة بلجيكا كونها تمتلك ميناءً من أهم الموانئ بالقارة الأوروبية، واللي هيتصل بشكل مباشر مع ميناء جرجوب بالساحل الشمالي الغربي لمصر.