هتزيد 25% وارتفاع الأوفر برايس.. توقعات صادمة لأسعار السيارات
هو صحيح أسعار السيارات هتزيد تاني وكمان الأوفربرايس هيرفع تاني وايه اللي بيحصل في السوق وايه علاقة ده بالجمارك واخر تطورات الأزمة.. تعالوا هنعرف التفاصيل من الفيديو ده خليكم معانا للآخر
في الأيام الأخيرة كنا أول منصة تتكلم عن أزمة احتجاز السيارات في الجمارك بمايزيد عن 30 ألف سيارة تم التعاقد عليها من الخارج ومدخلتش السوق وتم احتجازها في المواني أو مدخلتش من بره بسبب تعطل نظام التسجيل المسبق حسب شعبة السيارات ونفي وزارة المالية وطلع بعدها إن الأزمة في التلاعب بإجراءات التسجيل خاصة لسيارات ذوي الاحتياجات الخاصة وتابعنا الموضوع لحظة بلحظة لانه بسببه أسعار السيارات رجعت تزيد تاني وكمان ظهر الأوفربرايس على بعض الماركات وده سبب أزمة كبيرة في السوق بسبب نقص المعروض وكمان بسبب الطلب المتزايد على السيارات بعد تحرير سعر الدولار وانخفاض أسعار كتير من الطرازات قبل الأزمة الأخيرة.
طيب ايه الجديد في أزمة سوق السيارات ؟
شوف حضرتك أسامة أبو المجد، رئيس رابطة تجار السيارات، طلع واتكلم تاني وقال إن فيه زيادة في أسعار السيارات اليومين دول لأن لسه عدد كبير من السيارات المستوردة مدخلش السوق وده لان الاستيراد التجاري والشخصي وذوي الاحتياجات الخاصة كان متوقف في الجمارك، وبعد مراجعة إدارة الجمارك كانت الردود بأن هناك تعديلات على النافذة وعدم القدرة على تسجيل السيارات وده عمل مشكلة كبيرة في السوق وانعكس فورا على أسعار السيارات اللي موجوده في المعارض ومع التجار
وقال رئيس الرابطة كمان إن خروج السيارات من الجمارك بدأ من يوم الأربعاء وإن زيادة الأسعار مش في صالح المستهلك أو التاجر، والصدمة بقي إنه توقع زيادة 25% بأسعار السيارات الفترة دي ولغاية الإفراج عن كل السيارات المحجوزة وتيسير دخول الشحنات اللي تم الاتفاق عليها ومدخلتش وبعدها كمان الحكومة مطالبة بتيسير استيراد السيارات في الفترة الجاية للسيطرة على الأسعار وفي نفس الوقت تلبية الطلب الكبير وتغذية السوق وزيادة المعروض وغير كده هترجع الأزمة تاني واتوقع ريس الرابطة زيادة في أسعار السيارات وعودة الأوفر برايس لأن الأمور لسه غامضة بالنسبة لإجراءات الاستيراد والتسجيل الجديدة.
لكن في نفس الوقت خبراء السوق توقعوا أنه تحصل انفراجة كبيرة في سوق السيارات بعد انتهاء أزمات الجمارك واعتماد التعديلات في إجراءات الاستيراد لسد ثغرات التلاعب واكدوا أن الأزمة وقتية ومش هتستمر كتير وإن الجمارك هتسمح بالاستيراد لتلبية الطلب على الشراء وإن الدولة مش من مصلحتها تحصل أزمة في سوق السيارات ولا التجار كمان.
طيب الأزمة بدأت ازاي ؟
شوف وزارة المالية اكتشفت من خلال هيئة الجمارك في المواني أن فيه تلاعب كبير بيحصل في إجراءات استيراد ودخول سيارات المعاقين وأنها بتروح التجار بأسعار رخيصة جدا لأن الدولة بتعفيها من الرسوم والجمارك دعما لذوي الاحتياجات الخاصة وبعدها التجار بيشتروا خطاب الضمان من الشخص صاحب السيارة وبعدها يروح يبيعها في السوق ويستفاد من فرق السعر وطبعا هنا الدولة بتخسر مبالغ كبيرة وهي نظير الرسوم والجمارك وعشان كدا الوزارة وقفت الاستيراد لسيارات المعاقين لمدة 6 شهور لغاية ما تحد قواعد جديدة لاستيرادها وحددت 10 آلاف سيارة تدخل في الشهر بس وإن لكل شخص من ذوي الاحتياجات الخاصة عربية واحدة ونفس الأمر لو. فيه اكتر من معاق في الأسر وتشديد التأكد من عدم بيع السيارات دي لغير الأشخاص اللي استوردوها بسبب اعاقتهم.
