مفاجأة في مصير الدولار بعد تولي الحكومة الجديدة.. ومعجزة الـ185 مليار دولار في الساحل الشمالي.. ولغز سحب المركزي التريليون جنيه من البنوك
متابعينا الكرام في كل مكان أهلا وسهلا بكم وتحليل جديد لاهم التقارير اللي قدمتها وحدة أبحاث بانكير على مدار الساعة النهاردة الأربعاء 3 يوليو 2024
البداية مع تقرير مهم عن مصير الدولار فى مصر بعد حلف الحكومة الجديدة لليمين الدستورية النهاردة امام الرئيس السيسي.
وزي ما احنا عارفين إنه تم تغيير كل الوزارت الاقتصادية في الحكومة الجديدة وده بيدلل على بداية مرحلة جديدة على الصعيد الاقتصادي.
وقال التقرير إنه مع بدء الحكومة الجديدة في عملها الأنظار كلها بتتجه ناحية سوق صرف العملات الأجنبية ومصير الدولار الأيام الجاية خصوصا ان أزمة نقص العملة الأجنبية أخطر أزمة واجهت الحكومة الراحلة ومعرفتش تلاقيلها حلول
وشرح التقرير إنه تغيير المسئولين معناه تغيير فى الأفكار والرؤى لأن الموضوع مش مجرد تغيير أسماء وخلاص وعشان كده فيه تفاؤل كبيرحاليا بعد تغيير كل وزراء المجموعة الاقتصادية لأن أكيد المجموعة الجديدة هتحاول تقدم أداء مختلف جدا عن الوزراء الراحلين.. كمان الوزراء الجدد ليهم باع طويل في الساحة الاقتصادية وليهم أفكار متطورة فى تحسين مناخ الاستثمار
وأضاف تقرير بانكير إن افكار الوزراء الجدد لو اتطبقت هيكون ليها تأثير على جذب الاستثمارات الأجنبية وعلى زيادة مشاركة القطاع الخاص فى الناتج المحلي وتسريع وتيرة برنامج الطروحات الحكومية وكل ده هيؤدي الى انفراجة كبيرة فى أزمة شح العملات الأجنبية وطبعا ده هيكون ليه تأثير على سعر صرف الدولار وهيقوى موقف الجنيه المصري امام باقى العملات الأجنبية.
منصات بانكير قدمت النهاردة تقرير مختلف حولين إزاي الساحل الشمالي جذب 185 مليار دولار في شهرين
وقال التقرير إنه من سنين طويلة كان معروف إن الساحل الشمالي هو ساحل الموت ومهجور ومزروع ألغام ومخلفات حرب عالمية مصر خدت سنين عشان تطهرها لكن محدش فكر يستغل الإمكانيات اللي في الساحل.
وكشف التقرير إن مع تولي الرئيس السيسي للمسئولية اكتشف أن مصر فيها كنز محدش واخد باله منه وهو الساحل الشمالي وإنه ممكن يكون بوابة للاستثمار والمليارات لكن مين هيستثمر من غير بنية تحتية قوية وايه فايدة الساحل من غير طرق حديثة ووسائل نقل متطورة ومطارات عالمية وصرف صحي ومياه نظيفة.
وأضاف بانكير إن البداية الصحيحة لاي استثمارات هي إنشاء بنية أساسية قوية على طول الساحل الشمالي وبدأت بالطرق والكهرباء والمحاور لكن السيسي كان تفكيره ابعد من كده وفكر يعمل حاجة يلفت بيها انتباه العالم فكانت مدينة العلمين الجديدة بكل سحرها وكان تفكير السيسي إنه يقدم نموذج لمدينة كاملة ذكية وترفيهية وفندقية وسكنية البحر المتوسط
وشرح التقرير إن الخطة نجحت والعالم كله شاف العلمين الجديدة واللي اتبنت في وقت قياسي وقبل ما تخلص بقت مش ملاحقة على السياح والمصريين وبقت كاملة العدد وقدرت المدينة تلفت انتباه المستثمرين في العالم كله ومن هنا جت صفقة رأس الحكمة واللي دفعت فيها الامارات 35 مليار دولار وهتوصل ل150 مليار دولار لما يخلص المشروع
وأضاف بانكير إنه مع الزخم الشديد اللي صاحب صفقة رأس الحكمة وقبلها مدينة العلمين الجديدة قررت مجموعة طلعت مصطفى أحد أكبر المطورين العقاريين في العالم إنها تستثمر في الساحل بإيرادات متوقعة 35 مليار دولار ولما تجمعهم مع ال150 مليار دولار بتوع رأس الحكمة المجموع هيكون 185 مليار دولار.
التقرير التالي للي قدمته وحدة أبحاث بانكير كان بخصوص الشروط الجديدة لاستيراد سيارات ذوي الاحتياجات الخاصة والاجرااءت للي بتحصل في الجمارك لوقف التلاعب بالتيسيرات اللي بتمنحها الحكومة لفئة ذوي الاحتياجات.
وقال التقرير إنه على مدار الأيام اللي فاتت كانت فيه أزمة كبيرة في سوق السيارات بسبب حجز الجمارك لحوالي 30 ألف سيارة وبعد الخناقة بين المالية وشعبة السيارات والتجار عن سبب تأخير الإفراج عن السيارات من المواني خاصه إن السوق بيعاني من نقص المعروض وده كان سبب في ارتفاع أسعار السيارات وعودة الأوفربرايس على بعض الطرازات ظهر إن الأزمة سببها السيارات المستوردة لصالح ذوي الاحتياجات الخاصة.
وضح التقرير إن وزارة المالية اكتشفت إن فيه تلاعب كبير في اجراءات استيراد سيارات ذوي الاحتياجات واللي بيتم اعفائها من رسوم الجمارك.
ولفت إن بانكير إنه في الساعات الاخيرة وزارة المالية ممثلة في مصلحة الجمارك، جهزت عدد من التوصيات للقضاء على جميع الثغرات الموجودة في ملف استيراد السيارات بشكل عام وسيارات ذوي الاحتياجات الخاصة بشكل خاص، وده للقضاء على ظاهرة بيع خطابات المعاقين وضمان وصول دعم الدولة لمستحقيه.
وعرض التقرير أهم توصيات الاجتماع ده واللي شاركت فيه مصلحة الجمارك ومنها ألا يتجاوز عدد السيارات المستوردة عن 10 آلاف سيارة تامة الصنع شهريًا كحد أقصى كمان تشمل التوصيات إيقاف الإفراج الجمركي أو التسجيل المسبق لكافة سيارات المعاقين لمدة 6 شهور ولغاية الانتهاء من وضع منظومة جديدة يراعى فيها التعديلات المطلوبة
ومن الشروط التانية لاستيراد السيارات إن يكون للمعاق الحق فى الحصول على سيارة واحدة باسمه كل 10 سنين ... ويخصص للأسرة الواحدة اللي عندها اكتر من طفل معاق سيارة واحدة فقط مع إجراء بحث اجتماعى عن الشخص المعاق المتقدم للحصول على سيارة للمعاقين يفيد بقدرته المالية على سداد المستحقات المطلوبة.
التقرير الأخير معانا في تحليل النهاردة كان عن تحرك جريء من البنك المركزي
وشرح بانكير إنه أي حد متابع اللى بيحصل فى القطاع المصرفي هيلاحظ ان البنك المركزي بيواصل فى آخر شهرين سحب فائض السيولة لدى البنوك المصرية وسحب المركزي سيولة بأكتر من تريليون جنيه في آخر عطاء يوم التلات اللى فات لعدد 31 بنك تقدموا بطلب لاستثمار فائض الأموال عندهم في الوديعة الأسبوعية بسعر فائدة مرتفع.
طب ايه هي الوديعة الأسبوعية؟
وفسر التقرير اتجاه المركزي لسحب فائض السيولة وبحسب عدد كبيرمن المصرفيين لمساعدة البنوك دي على تحقيق ربحية من فائض السيولة عندها وتخفيف ضغوط تكلفة الأموال المرتفعة بعد صعوبة توظيف الأموال في أدوات الدين الحكومية (أذون وسندات الخزانة) إلى انخفاض الفائدة.
وقال التقرير إن البنك المركزي بيسعى إلى ضبط وحسن إدارة مستويات السيولة بشكل عام داخل القطاع المصرفي بعد ما وجد من خلال مراقبته عزوف البنوك عن الاستثمار في أذون وسندات الخزانة.
