مؤتمر المفاجآت الكبرى.. إيه اللي هيحصل غداً في العاصمة الادارية؟
يا ترى ايه اللى هيحصل اليوم فى العاصمة الادارية؟ وايه الشراكة الاستثمارية اللي هيتم الاعلان عنها ؟ وهل ممكن نشوف راسحكمة جديدة؟ وليه الدولة اهتمت فجأة بالقطاع الخاص؟
من ساعات أعلن مجلس الوزراء، برئاسة الدكتور مصطفى مدبولي عقد مؤتمر صحفي عالمي اليوم التلات بمقر مجلس الوزراء بالعاصمة الإدارية الجديدة من أجل الإعلان عن مشروع شراكة استثمارية بين الدولة والقطاع الخاص بالساحل الشمالي.
وبمجرد نشر الخبر الناس كلها بقت قاعدة مستنية تعرف ايه تفاصيل الشراكة الكبيرة اللى هيتم الاعلان عنها وهتكون مع مين وايه حجم الاستثمارات اللي هيتم تنفيذها وهتكون فين فى الساحل
ورغم ان لسه لحد دلوقتى مفيش أى معلومات متاحة عن الاتفاق الجديد الا انه بيأتى فى اطارحرص الدولة على تعظيم دور القطاع الخاص وزيادة نسبة مساهمته فى الناتج المحلى وده كان واحدمن أهم بنود وثيقة سياسة ملكية الدولة اللى تم الاعلان عنها فى بداية السنة وبتتضمن تخارج الدولة من عدد كبيرمن القطاعات لصالح القطاع الخاص
والدولة حاليا مهتمة بتطوير منطقة الساحل وصفقة راس الحكمة الكبرى مع الامارات بقيمة 35 مليار دولاركانت البداية فى الملف ده وفيه صفقات تانية كبيرة هيتم الاعلان عنها تباعا منها صفقات ضخمة مع دول عربية بيتم التفاوض معاها حاليا على تطوير مشروعات زي مشروع راس جميلة اللى السعودية مهتمة جدا بالاستثمار فيه وبمجرد الاتفاق على كل التفاصيل هيتم الاعلان عن المشروع الجديد
وخلال مشاركته الأخيرة فى مؤتمر الاستثمار الاوربي فى مصر أكد رئيس الوزراء مصطفى مدبولي ان الحكومة ملتزمة بالاستمرار في تنفيذ الإصلاحات الاقتصادية اللي بتتبناها وقال انه هتستمر في التزامها نحو دعم القطاع الخاص وتشجيع جذب المزيد من الاستثمارات مع التأكيد على الإبقاء على العمل وفقًا لنظام سعر الصرف المرن وخفض معدلات الدين والمضي قدمًا في العمل على زيادة مساهمة القطاع الخاص في النشاط الاقتصادي إلى نحو 65% خلال الـ 3 سنين الجاية .. وقال ان ده بيتطلب دعم القطاع الخاص في تيسير الحصول على التمويلات اللازمة لمشروعاته
