قنبلة مدبولي.. مؤتمر صحفي عاجل للحكومة.. إيه اللي هيحصل بكرة

ليه الدكتور مصطفي مدبولي رئيس الحكومة هيعمل مؤتمر صحفي عالمي مهم بكرة في العاصمة الادارية.. وإيه علاقة المؤتمر ده بالساحل الشمالي.. وايه المفاجات اللي هتكون فيه.. التفاصيل كلها هنقولها في التقرير التالي.

النهاردة الدكتور مصطفي مدبولي رئيس الحكومة أعلن إنه هيعمل مؤتمر صحفي عالمي بكرة بمقر مجلس الوزراء بالعاصمة الإدارية الجديدة وده للإعلان عن مشروع شراكة استثمارية بين الدولة والقطاع الخاص على طول الساحل الشمالي وده ضمن تنفيذ وثيقة سياسة ملكية الدولة، وهي زيادة مشاركة القطاع الخاص في المشروعات بنسبة 65% خلال 3 سنين جاية.
ومن المفترض هيتم الإعلان خلال المؤتمر الصحفي عن كل التفاصيل وإجراءات دعم وتشجيع الحكومة للقطاع الخاص خلال الفترة المقبلة.,, يعني ايه الكلام ده بقي؟
شوف ياسيدي معناه إن مصر اقتصاديا ماشية صح وزي كتاب الاقتصاد ما بيقول إن القطاع الخاص هو اللي بيصنع الفارق في الاقتصاد والتنمية والتصدير والتجارة والرفاهية وإن الدولة عبارة عن مشرف عام على الاقتصاد الحر ودي اللي خلي امريكا وأوربا وكل الدول المتقدمة في رخاء اقتصادي دلوقتي بعد ثبوت فشل كل التجارب السابقة في الاقتصاد المدار أو اللي بيتحكم فيه الحكومات وكلنا شفنا تجربة القطاع العام في مصر واللي بدأت كويسة ولهدف انشاء قلاع صناعية لكن الحكاية قلبت فساد ورشاوي واختلاسات وحرق مخازن في اخر لسنة المالية عشان الحسابات تختفي غير إن خطوط الانتاج اتكهنت.

طيب ليه القطاع الخاص بيقود وينجح على عكس تجربة القطاع العام؟
عشان حضرتك القطاع الخاص كل همه يطور نفسه عشان مكسبه يزيد واللي معاه مصنع واحد بيخليه مجموعة مصانع وبيهتم ويطور الانتاج وبيجيب أحدث خطوط انتاج واحدث تكنولوجيا وبينافس دايما إنه يكون الافضل وبالتالي بيخلق بيئة صحية في الاقتصاد وانتعاش في الصناعة والنقل والتجارة والتصدير والاستيراد على عكس القطاع العام زي ماقلنا مش بيهتم لو ماكينة عطلت إنه يوقف خط انتاج بحاله وشفنا ده حصل كتير وانهارت صناعات كبيرة بسبب تحول المسئول لموظف عاوز يأمن نفسه قبل ما يسيب الكرسي ومن هنا انهارت نظرية الاقتصاد الموجه والمدار ومهما كانت محاولات السيطرة والرقابة عليه.
المهم نرجع موضوعنا وهو مهما قلنا عن الساحل الشمالي مش هنقدر نقدر حجم الاستثمارات اللي ممكن تكون فيه من العرييش لغاية مطروح وكل متر فيه بعتتبر ثروة لأنه بيعتبر أجمال سواحل العالم والأهم والأجمل في حوض المتوسط والمشروعات المنتظرة فيه هتقلب حرفيا شكل الاقتصاد المصري والمسشروعات دي طبعا هينفذها القطاع الخاص المعروف بسرعته ودقته وجودته زي مابيحصل دلوقتي في مشروعغ رأس الحكمة والعلمين الجديدة وجرجوب ولسه باقي الساحل واللي كل كيلو متر فيه هيجيب مليارات الدولارات... وبكرة الدكتور مدبولي هيكشف التفاصيل.