لغز صفقة مصرية قلبت سوق الغاز العالمي.. مفاجأة مستخبية

من كام سنة كده كانت مصر واحدة من اهم واكبر الدول المصدرة للغاز الطبيعي، ولكن مؤخرا خرجت اخبار ان مصر تعاقدت علي شراء كمية كبيرة من الغاز الطبيعي المسال، يا تري اية الحكاية وليه مصر تعاقدت علي شراء شحنات من الغاز الطبيعي المسال والصحف العالمية قالت إيه.. خليكم معانا وهتعرفوا التفاصيل 

الظروف الاستثنائية اللي اغلب دول العالم بتمر بيها ومصر واحدة منهم، فرضت علي الدول تحديدات كبيرة خصوصا بسبب الارتفاع الغير طبيعي لدرجات الحرارة واللي تتطلب زيادة الطاقة المستهلكة خاصة من الكهرباء واللي محتاجه كميات كبيرة من الغاز الطبيعي والوقود والمازوت اللي بتحتاجها محطات توليد الكهرباء علشان تشتغل وتدي الكهرباء الكافية لأنارة البيوت والشركات والمصانع.
مؤخرًا وكالة رويترز للأخبار أعلنت ترسية عطاء مصري لشراء 17 شحنة غاز طبيعي مسال للتسليم خلال الصيف، واللي بتعد أكبر عملية شراء للغاز الطبيعي المسال لمصر من فترات بعيدة وكانت حديث الصحافة العالمية وأسواق الطاقة بسبب حجمها لكن مصر قررت تشتريها لحل أزمة الانقطاع المتتالي للتيار الكهربائي واللي ادي الي توقف مؤقتاً لبعض مصانع الأسمدة عن العمل وحاليا بيهدد الانتاج واللي هيكون له تاثير مباشر علي اسعار الاسمدة في الاسواق.
طيب اية هيا حكاية توقف مصانع الاسمدة واية هيا اسباب توقفها عن العمل وتاثير ده علي اسعار الاسمدة في الاسواق؟.
من فترة أعلنت شركة أبوقير للاسمدة وكيما وموبكو أعلنوا توقف إنتاج المصانع نظرا لتوقف إمداد الغاز الطبيعي، وعلي فكرة مش دي المرة الأولي اللي مصانع الاسمدة تتوقف عن العمل بسبب توقف امدادات الغاز والكهرباء واللي بتحتاجها المصانع علشان التشغيل، وفي نصف شهر يونيو الجاري أعلنت وزارة البترول والثروة المعدنية تقليل إمدادات الغاز الطبيعي عن مصانع البتروكيماويات والأسمدة في مصر وبعدين رجعت وبدأت تزود أمدادات الغاز للمصانع مرة تانية .

طيب ليه مصر هتستورد غاز طبيعي وليه الكميات الكبيرة اللي تعاقدت عليها مصر دي ؟
علشان نكون عارفين ان مصر بتخطط لشراء من 15 إلى 20 شحنة من الغاز الطبيعي المسال علشان تغطي الطلب المتزايد للغاز الطبيعي والوقود من القطاعات المختلفة في الدولة المصرية وخصوصا قطاع الكهرباء في شهور الصيف خصوصات ان مصر حاليا بتمر بأزمة كبيرة جدا في موضوع قطع الكهرباء واللي وصلت لـ3 ساعات دلوقتي وفي حالة غضب كبيرة جدا في الشارع المصري بسبب الموضوع ده .
مش كده بس، ده مصر أعلنت كمان عن شراء 3 شحنات تانية من الغاز الطبيعي هيبدأ تسليمها في شهور أغسطس وسبتمبر اللي جايين .
الشركة القابضة للغاز الطبيعي في مصر (إيجاس) طلبت تسليم 17 شحنة من الغاز الطبيعي المسال منهم 7 شحنات هيوصلوا لمصر في شهر يوليو اللي جاي و 6 شحنات هيوصلوا في أغسطس و 4 شحنات هيكونوا في سبتمبر وهيكون الدفع بأقساط مؤجلة بتوصل لستة أشهر.
الهدف الرئيسي لمصر من شراء شحنات الغاز الطبيعي هو التغلب على التحديات اللي بتواجه قطاع الكهرباء في مصر وزيادة إمدادات الوقود للمحطات الكهربائية العاملة بالغاز علشان يكون عندنا زيادة في إنتاج الكهرباء وتغطية الطلب المتزايد علي الطاقة، ده غير تخفيف الأعباء المالية علي الحكومة خصوصا ان شراء الغاز بكميات كبيرة هيساعد في الحصول على أسعار تفضيلية وخفض تكاليف التشغيل والصيانة لمحطات الكهرباء .