تفاصيل أخطر يوم في مصر.. ومفاجأة في تشكيل الحكومة الجديدة.. وتطور خطير في ملف الديون الخارجية.. وحدث يهز سوق السيارات
![خاص بانكير]( /UploadCache/libfiles/5/6/600x338o/240.jpg)
متابعينا الكرام في كل مكان أهلا وسهلا بكم وتحليل جديد لأهم الأحداث والتقارير اللي قدمتها وحدة أبحاث بانكير على مدار اليوم السبت 29 يونيو على منصاتنا الإلكترونية .
الحقيقة منصات بانكير قدمت النهاردة عدد من التقارير المهمة لاخبار سارة في يوم تاريخي في مسيرة الاستثمار والاقتصاد
والبداية من مؤتمر الاستثمار المصري الأوروبي المشترك، اللي بيُعقد في القاهرة النهاردة وبكرة وتحت رعاية وحضور الرئيس السيسي ورئيس المفوضية الأوروبية وتوقيع مصر 38 اتفاقية استثمارية بقيمة 70 مليار يورو
وقال التقرير إن أهم القطاعات اللي بتشملها الاتفاقيات هي الاستثمار والطاقة المتجددة والهيدروجين الأخضر والأمونيا الخضراء والاتصالات وتكنولوجيا المعلومات ودعم زيادة الصادرات، والتعاون في مجال تصنيع وتوطين صناعة السيارات والادوية والالكترونيات
واضاف التقرير إن صفقات مؤتمر الاستثمار الأوروبي هيكون ليها أثر فعال على سعر الدولار في البنوك الايام الجاية مع ضمان تدفقات دولارية ضخمة بخلاف عودة الثقة في سوق الاستثمار المصري.
ووضح التقرير ا الاتحاد الأوروبي سبق وأعلن في مارس اللي فات، عن حزمة تمويل ضخمة لمصر تبلغ قيمتها 7.4 مليار يورو، منها 5 مليارات يورو على هيئة قروض ميسرة، ونحو 1.8 مليار يورو استثمارات، و600 مليون يورو منح، يُخصص منها 200 مليون يورو لإدارة ملف المهاجرين.
ولفت بانكير إن إجمالي التمويلات الأوروبية التي تلقتها مصر في آخر 4 سنين وصلت إلى 12.8 مليار دولار، بحسب وزارة التعاون الدولي المصرية، واستحوذ بنك الاستثمار الأوروبي على الحصة الأكبر من تلك التمويلات بنسبة بلغت 37%، بينما بلغت حصة البنك الأوروبي لإعادة البناء والتنمية نحو 27% من إجمالي التمويلات الأوروبية المقدمة لمصر منذ مطلع العقد الحالي.
التقرير التالي إللي قدمته منصات بانكير النهاردة كان بخصوص ملف التشكيل الوزراى الجديد.. وده بعد اللي كشفه النهاردة مصدر حكومي إنه هيام الانتهاء من التشكيل الوزاري والمحافظين ومراسم حلف اليمين خلال أيام قليلة.
واضاف التقرير على لسان المسؤول إنه تم الاستعانة بالكفاءات الوطنية والخبرات الدولية بالتشكيل الوزاري والمحافظين، وأكد ان معايير الكفاءة والخبرة وتقييم التجارب السابقة في مقدمة معايير الاختيار
وأوضح أن رئيس الوزراء المكلف مصطفى مدبولي أجرى أكتر من 65 لقاء واجتماع على مدار 25 يوما للوصول إلى أفضل تشكيل حكومي يتناسب مع حجم التحديات الحالية.
من الاخبار السارة اللي قدمتها وحدة أبحاث بانكير النهاردة كان بخصوص الجديد في ملف ديون مصر الخارجية
وقال بانكير إن تقرير صادر عن معهد التمويل الدولي أكد ان مصر سددت 25 مليار دولار من دينها العام المحلي والخارجي خلال النص الأول من 2024 وبعدها بساعات نشرت وزارة التخطيط بيانات مستندة لإحصاءات البنك المركزي أكدت فيها تراجع ديون مصر الخارجية خلال الربع الأول من عام 2024 بنسبة 4.4% ليسجل 160,607 مليار دولار، مقابل 168,034 مليار دولار خلال الربع الأخير من 2023 بانخفاض قدره 7,427 مليار دولار.
وعن الفرق بين كلام وارقام معهد التمويل وبيبن بيانات وزارة التخطيط.. شرح بانكير إن تقرير معهد التمويل الدولى بيتكلم عن ديون مصر بشكل عام ديون داخلية وديون خارجية وتشمل كل الفلوس اللى مصر واخداها من مؤسسات تمويل دولية والفلوس اللى الحكومة مقترضاها من الداخل من خلال اذون الخزانة والسندات اللى بيطرحها البنك المركزي نيابة عن وزارة المالية ودي أدوات دين داخلية بتشتريها مؤسسات وأفراد وبتلجأ ليها الحكومة لسد العجز وتوفير سيولة مالية .. ودي التزمات وديون على الحكومة بتسددها باتنظام طول السنين اللى فاتت.. وده يفسرلك التضارب فى الارقام يعنى لو حسبتها على حسبة معهد التميول فالمفروض مصر سددت 25 مليار دولار من 168 مليار فيكون اللى باقي 143 مليار دولار مش 160 مليار دولار .
منصات بانكير قدمت تقرير مختلف النهاردة عن التحركات الجديدة في مجموعة بريكس
وشرح التقرير إنه في الوقت الحالي فيه تنسيق كبير بيتم بين البنوك المركزية ووزارات المالية فى دول بريكس للتوافق على الخطوات اللى هتتم الفترة الجاية والى جانب كده فى تفكير فى مشروعات ضخمة ومهمة زي المشروع اللى كشفت عنه روسيا على لسان وزيرة الزراعة الروسية، واللى كشفت ان دول مجموعة بريكس بتدعم مبادرة لتأسيس بورصة للحبوب.
واضاف التقرير إنه وفقا للمعلومات اللى تم الكشف عنها بخصوص المشروع الجديد فبورصة الحبوب هتسمح للمشترين بالشراء مباشرة من المنتجين، وبيحظي المقترح بدعم الرئيس الروسي فلاديمير بوتين قبل قمة دول بريكس اللي تنعقد في روسيا في أكتوبر.
والأهم كمان ان اى دولة هتشترى حبوب من البورصة الجديدة هتدفع التمن بالعملات المحلية مش بالدولار .. يعنى مثلا مصر باعتبارها أكبر مستورد للقمح فى العالم لو خدت قمح من روسيا او الهند او اى بلد تانية موجودة فى بريكس هتدفع تمنها بالعملات المحلية مش بالدولار
وهتعرف أهمي البورصة دي أكتر لما تعرف ان مصر بتستورد سنويا قمح بحوالى 4 ونص مليار دور والرقم ده بيتزايد سنويا مع زيادة الطلب على الحبوب عالميا.
التقرير الأخير معانا في لايف اليوم حولين موضوع مهم جدا وهو آخر تطورات سوق السيارات ...
وشرح التقرير إن بانكير كانت أول منصة تتكلم عن أزمة احتجاز السيارات في المواني بسبب عطل في سيستم تسجيل الدخول وقلنا إن فيه 13 الف سيارة محجوزة في عدد من المواني لنفس السبب وبعدها طلع عضو في شعبة السيارات وقال إن فيه كمان 10 آلاف سيارة تم التعاقد عليها ومش عارفة تدخل لتعطل السيستم أو منظومة التسجيل المسبق للشحنات "ACI" .
ولفت التقرير إنه في الساعات الأخيرة حصلت انفراجة كبيرة في الازمة وأكد عدد من وكلاء السيارات في مصر بدء الإفراج عن السيارات المتراكمة في المواني وفتح نظام التسجيل المسبق للشحنات للسيارات سواء المستوردة للاستخدام الشخصي أو التجاري ودي بعد تراكم العدد الكبير من السيارات واللي اتسبب في ارتفاع الأسعار وعودة الأوفربرايس من تاني نتيجة نقص المعروض من طرازات معينة .
وكشف التقرير على لسان التجار خلال اجتماع جمع وكلاء السيارات مع وزير التجارة والصناعة أحمد سمير ومسؤولي الجمارك، إن فتح نظام التسجيل المسبق للشحنات بالنسبة للسيارات هيكون للمركبات الموجودة في المواني فقط، لكن وزير التجارة والصناعة طلب من الوكلاء تحديد عدد السيارات اللي هيتم استيرادها اعتبارا من أول يوليو ولغاية اخر السنة.
وقال التقرير إنه مع بداية دخول السيارات السوق من تاني اكيد هيكون ليه تأثير مباشر على استقرار الأسعار ونزولها الفترة الجاية.