صفقة الانقاذ الكبرى.. ورقة الحكومة الأخيرة لانقاذ مصر من الظلام

يا ترى ايه اللى بيحصل فى كواليس أزمة الكهربا فى مصر ؟وايه الاجرءات اللى الحكومة بدأت تاخدها على الأرض لحل الأزمة؟ وايه حكاية صفقة الغاز الضخمة اللى تم ابرامها فى الايام الأخيرة ؟ وليه المسئولين اتأخروا فى التعامل وايجاد حلول لواحدة من أخطر أزمات مصر مؤخرا؟

فى الأيام اللى فاتت مصر أبرمت واحدة من أكبر صفقات الغاز فى السنين الأخيرة فى محاولة للتغلب على أزمة نقص الوقود المطلوب لتشغيل محطات انتاج الكهربا واللى كان من نتايجه أزمة كهربا خانقة بتعانى منها البلد فى اخر كام شهر

ووفقا لعدد كبير من التسريبات اشترت الحكومة المصرية  17 شحنة غاز  للتسليم خلال شهور الصيف في خطوة ممكن تنهي نسبيا أزمة انقطاع الكهربا وتساعد في وقف العمل بخطة تخفيف الأحمال.

وحسب ما نقلته وكالته رويترز فازت مصر بعطاء ضخم هو الأكبر من سنين لشراء 17 شحنة من الغاز الطبيعي المسال وجاء السعر بزيادة من 1.6 إلى 1.9 دولار عن السعر القياسي لمنصة تجارة الغاز الهولندية.
وتم الاتفاق على أن يكون سداد السعر مؤجلا لمدة تصل إلى 6 شهور وطبعا  خيار تأجيل السداد وفقا لرويترز هو السبب وراء الزيادة فى السعر اللي هيتعين على مصر دفعها، كمان زيادة السعر عن سعر السوق بياتى  في ظل تنافس مصر على إمدادات كبيرة وسط زيادة الطلب في آسيا.

و طلبت الشركة القابضة للغازات الطبيعية (إيجاس) الشحنات الـ17 للتسليم بواقع 7 شحنات في يوليو و6 في أغسطس و4 في سبتمبر.. وبتخطط مصر كمان  للحصول على 3 شحنات غاز تانية للتسليم بين أغسطس وسبتمبرلتغطية الطلب المتزايد على الطاقة خلال فصل الصيف.

وبتتناقص إمدادات الغاز الطبيعي لمصر المطلوبة  في توليد الكهرباء مع ارتفاع الطلب على الطاقة في ظل العدد المتنامي للسكان  فضلا عن زيادة الاستهلاك خلال شهور الصيف اللى بتشهد موجات متعددة من الطقس السيء والحرارة المرتفعة غير المعتادة فى مصر.

ويأتي الكشف عن تفاصيل شحنات الغاز المسال اللي بتعتزم مصر استيرادها بالتزامن مع وصول سفينة إعادة تغويز  إلى العين السخنة فى اطار محاولات مختلفة بتبذلها الحكومة للحد من أزمة انقطاع الكهربا

وفى تصريحات رسمية وعد مؤخرا الدكتور مدبولى رئيس الحكومة بتقليل عدد ساعات انقطاع التيار الكهربائي الى ساعتين بدءا من الاسبوع المقبل وصولا الى وقف خطة تخفيف الأحمال بصورة شبه نهائية فى الاسبوع التالت من يوليو وقال ان الحكومة هتضخ حوالى مليار دولار لشراء كميات الغاز والسولار المطلوبة لتشغيل محطات الكهربا