قبل ما المواتير تتحرق… إزاي تحمي أجهزتك الكهربائية أثناء تخفيف الأحمال

يا ترى فيه طريقة تحمي بيها أجهزتك المنزلية خلال فترة تخفيف الأحمال؟ وايه الحاجات اللى ممكن تعملها عشان تمنع حرق مواتير التلاجة أو الغسالة أو غيرهم من الأجهزة الكهربائية؟ وهل الأفضل تشيل فيش الأجهزة أول ما النور يقطع ولا تسيبها زي ما هي شغالة؟

زي ما كلنا عارفين خلاص الموضوع بقا أمر واقع والحكومة بدأت في تبني سياسة زيادة تخفيف الأحمال الكهربائية كإجراء لمواجهة زيادة الطلب على الطاقة، وده بيتطلب بعض الإجراءات لحماية الأجهزة الكهربائية عشان ما تبوظش وشقا عمرك يضيع لأن أسعار الأجهزة حاليا نار وزادت أكتر من 5 أضعاف فى اخر سنيتين

وفى الفيديو ده هنقولك بعض النصايح لحماية الأجهزة الكهربائية المنزلية من الأضرار اللى بتنتج عن انقطاع الكهرباء وعودتها بشكل مفاجئ.. لأن تقلبات التيار الكهربائي ممكن ببساطة تحرق أى جهاز عندك فى البيت وطبعا ده هيتسبب فى خسارة مالية كبيرة يمكن ناس كتير حاليا ظروفها صعب تتحملها.

طب هو ليه أصلا قطع التيار بيؤدي الى اتلاف الأجهزة ؟

بص يا سيدي قطع التيار الكهربائي المفاجئ بيؤدي إلى تقلبات وارتفاع وانخفاض في الجهد وده بيساعد على  تلف المكونات الإلكترونية الحساسة في أجهزتك يعنى مثلا معظم الأجهزة الكهربائية فى مصر مصممة انها تشتغل ب 220 وات كهربا التيار لما بيفصل ويرجع بيرجع أحيان بنص الجهد وأحيانا بضعفه وده بيخلى الجهزة تتعرض لصدمات ماتقدرش تتعامل معاها والمواتير والمحركات بتاعتها بتتحرق على طول وأكيد حضرتك سمعت عن تلاجة قريبك او صاحبك او جارك اللى ماتورها اتحرق من شدة الكهربا

طب ايه أكتر أجهزة معرضة انها تبوظ بسبب قطع الكهربا؟

للأسف كل الأجهزة الكهربائية معرضة للخطر عند انقطاع التيار الكهربائي ولكن فيه أجهزة معينة أكتر عرضة للخطر من غيرها فالأجهزة الحساسة بشكل خاص زي الكمبيوتر والشاشات والتلاجات وغيرها من الأجهزة الإلكترونية معرضة لخطر التلف بشكل أكبر.

وبتتعرض للخطر كمان الأجهزة اللي بتعتمد على إمداد مستمر بالطاقة خلال انقطاع التيار الكهربائي زي مكيفات الهواء ومضخات المياه وكل الأجهزة دي ممكن تبوظ فى حال تكرار انقطاع التيار

ايوه طب نحمي الأجهزة دي كلها من التلف ازاى بقا؟

في حاجات كتير ممكن تعملها  لحماية الأجهزة الكهربائية من التلف أثناء تخفيف الأحمال الكهربائية أو مع التغيرات المناخية زي الأجهزة الإلكترونية الحساسة

كأجهزة الكمبيوتر وأجهزة التلفزيون والمعدات الصوتية  عند انقطاع التيار الكهربائي .. يعنى اول ما النور يقطع لازم تشيل فيش الأجهزة دي وتفصل عنها الكهربا تماما ولما النور يرجع تفضل حوالى 10 دقايق قبل ما تعيد تشغيلها وممكن كمان تستخدم أجهزة حماية التيار الزائد ودي أجهزة تم تصميمها لحماية أجهزتك الكهربائية ويُمكنها حماية أجهزتك من التلف لما ترجع الكهربا بعد انقطاع التيار

وممكن كمان تستخدم مصدر طاقة احتياطي زي انك تشترى مولد يشتغل فى فترات انقطاع الكهربا وده هيساعد على حماية الأجهزة الكهربائية عند انقطاع التيار الكهربائي ويمكن لمصدر الطاقة الاحتياطية أو UPS توفير مصدر طاقة مستمر لأجهزتك عند إيقاف تشغيل الطاقة دون مقاطعة عمل الجهاز.

وبالنسبة للمولد يُمكن برمجته للتشغيل بشكل تلقائي أو تشغيله يدويًا وبالتالي هيقطع مصدر الطاقة موقتًا لكنه هيعيد تشغيل الجهاز بمجرد تشغيله.