عودة الأموال الساخنة.. مصر تجمع 15 مليار دولار في 5 شهور
![الدولار]( /UploadCache/libfiles/5/5/600x338o/775.jpg)
يا ترى ايه حكاية عودة الأموال الساخنة الى مصر من جديد ؟ وهل ممكن الحكومة تغلط نفس الغلطة اللى حصلت فى 2022 ؟ وايه حجم الأموال اللى جمعتها مصر من أدوات الدين المحلية؟
في اخر 5 شهور رجعت من تانى تنشط ظاهرة الأموال الساخنة اللى كانت سبب من أسباب الأزمة الكبيرة اللى عاشتها مصر اخر سنتين وده بسبب تخارج اكتر من 20 مليار دولار من السوق بشكل مفاجئ بعد اندلاع الرب الروسية الاوكرانية
وشهدت التدفقات النقدية للمستثمرين الأجانب على سندات العملات المحلية للدول الناشئة ارتفاع ملحوظ في الفترة الأخيرة خصوصا مع ارتفاع الفائدة والتحولات الاقتصادية اللي بتعملها الحكومات فى الدول دي.
وبتعتبر مصر وتركيا هما أكبر مثال على النهج الجديد في المنطقة ويضاف إليهم كينيا ونيجيريا وباكستان والبرازيل كمان وبشكل أكبر الهند والصين.
وضخ المستثمرون الأجانب حوالى 15 مليار دولار في سندات مصر بالعملة المحلية من بداية العام وازداد التدفق ده بعد استثمار الإمارات 35 مليار دولار في مشروع رأس الحكمة، وتعويم الجنيه المصري وخفض قيمته بالاضافة الى زيادة قرض صندوق النقد الدولي من 3 الى 8 مليار دولار
وبتحاول الحكومة بكل الطرق انها تحدّ من حجم الأموال الساخنة اللى بتحاول الدخول سريعاً للاستفادة من التعويم الأخير، وتفادي اللى حصل قبل كده بعد اندلاع الحرب الروسية الاوكرانية مباشرة من خروج سريع للمستثمرين الأجانب والتسبب بهزة للاقتصاد
ومن بعد الخطوة المفاجئة للبنك المركزي المصري برفع الفايدة 6% واللى حصل بعدها من تراجع كبير في قيمة الجنيه المصري في البنوك وشركات الصرافة أصبحت مصر حاليا بتقدم واحد من أعلى العوائد على السندات بالعملة المحلية وده أعاد من جديد التوقعات حوالين عودة الأموال الساخنة الى مصر .. وده طبعا أعاد الى الأذهان الأزمة والورطة الكبيرة اللى وقعت فيها الحكومة لما خرج من مصر اكتر من 20 مليار دولار أموال ساخنة بعد أيام قليلة من اندلاع الحرب الروسية الاوكرانية .. والأموال الساخنة دي كانت دخلت مصر فى 2016 بعد قرار البنك المركزي فى نوفمبر بتعويم الجنيه
وطبعا تكرار سيناريو 2016 بيعتمد على تكرار سعر الجنيه وهل هيفضل ثابت ومستقر بعد تحرير سعر صرفه وده اللى بتتوقعوا معظم البنوك الدولية الفترة الجاية مع تدفق الاستثمارات والأموال من الخارج، وده اللى خلا مثلا مصرف كبير زي "جي بي مورجان" يوصي بشراء أذون الخزانة المصرية لأجل عام.
طب ايه مميزات وعيوب الأموال الساخنة ؟
زي ما الأموال الساخنة ليها بعض المميزات زي انها بتوفر سيولة دولارية تدعم الاحتياطي النقدي من العملات الأجنبية فى البنك المركزي لكن لأسف سلبياتها أكتر ومن اسمها كده تقدر تعرف انها اموال ممكن تخرج من البلد فى اى وقت والبنك المركزي وفقا للقوانين والاتفاقيات الدولية ملزم بتوفيرها للمستثمرين فى اى وقت يطلبوها فيه
وهل ممكن الحكومة تغلط نفس غلطة المرة اللى فاتت وتراهن وتعتمد على الاموال الساخنة تانى؟
فيه تصريحات قديمة لوزير المالية قالها بعد خروج اكتر من 20 مليار دولار أكد فيها ان الحكومة اتعلمت الدرس ومش هتعتمد تانى على الأموال الساخنة نظرا لخطورة الاعتماد عليها