ملايين الدولارات.. شركة عالمية تقتحم السوق المصري

 
 
الاستثمار المباشر هو مستقبل البلد دي وعشان كده الدولة والرئيس السيسي شخصيا اهتم بالملف ده وكمان خلاه تحت إشرافه المباشر ورأس المجلس الأعلى للاستثمار وبعدها بدأت مصر في التخلص من كل الروتين والبيروقراطية اللي كانت بتعطل الاستثمارات الأجنبية المباشرة واللي كانت عشان تعمل مشروع لازم تعدي على 100 شباك وتلف كعب داير على 100 موظف وفي الاخر المستثمرين كانوا بيطفشوا وبعد ما كل ده اتغير الاستثمار فتح على البحري لأن مصر من اكتر الأسواق الجاذبة في المنطقة لأسباب كتير جدا في عرف الاستثمار أولها رخص وتوافر الأيدي العاملة المدربة ومصر كنزها الحقيقي في شبابها وكمان انخفاض سعر الجنيه سبب مهم جدا في إقبال المستثمرين عشان ده بيزود مكاسبهم وكمان لأن السوق المصري بيمتاز بموقعه الجغرافي الفريد وتوسطه لقارات العالم وقربه من خطوط التجارة الدولية الرئيسية يعني تقدر تقول كده سوق مثالي للاستثمار.
طيب ايه اللي حصل في ملف الاستثمار ؟
مش هنقول كتير بس كفاية صفقة رأس الحكمة واللي بتعتبر اضخم صفقة استثمار في تاريخ مصر الحديث بإجمالي استثمارات 150 مليار دولار وبعدها بدأت الاستثمارات تهل على مصر من كل حتة وخاصة من الصين وروسيا والهند واللي ليها أو بتعمل مناطق صناعية ضخمة في مصر وده غير الشركات العالمية اللي قررت تتوطن في السوق المصري وآخرها شركة نوكيا العالمية لتصنيع الهواتف الذكية وأنظمة الاتصالات واللي أعلنت نيتها تحويل مصر لمركز عالمي في صناعة المحمول وكمان هتكون مركز لتصدير ملايين الهواتف الذكية سنوياً للسوق الإفريقية والأسيوية بسبب موقعها الجغرافي اللي قلنا عليه كمان فيه صفقات قوية ومن العيار التقيل بتتجهز من دول خليجية خاصة قطر والسعودية وأخيرا الكلام عن صفقات ضخمة مع البحرين هيتم الكشف عن تفاصيلها الايام الجايه.
طيب ايه الجديد تاني في ملف الاستثمار ؟
شوف حضرتك من ساعات كده أعلن المدير المالي لمجموعة "كاوسكو للشحن والخدمات اللوجيستية" " ودي شركة عالمية اعلنت ضخ 375 مليون دولار استثمارات جديدة خلال 2024 في مواني مصرية زي مينا العين السخنة على شاطيء خليج السويس وقال كمان إن  الاستثمارات الجديدة هتتوجه لرفع القدرة الاستيعابية لحاويات المجموعة بمختلف موانئ مصر.
وزي ما احنا عارفين  مصر بتنفذ خطة طموحة لتحديث ورفع كفاءة موانيها البحرية سواء على البحر المتوسط أو الأحمر ضمن هدف كبير وهو التحول لمركز تجاري إقليمي خاصة على الشواطئ الشمالية على البحر المتوسط واستغلال موقعها التجاري في قلب العالم لتعظيم التجارة مع الجارة الأوربية والامريكتين .
طيب ايه فوايد زيادة الاستثمارات في مصر ؟
اكيد طبعا ليه فوايد كتيرة أهمها استمرار التدفقات الدولارية وده معناه انخفاض مستمر في سعر الدولار الأمريكي واللي هو سبب كل الأزمات اللي بتعاني منها مصر وكمان ضخ اي شركه لاستثمارات ضخمة وجديدة هيغري باقي الشركات العالمية على الدخول في السوق المصري لأن سوق الاستثمار واسع وصخم جدا وفيه منافسة شرسة على الأسواق الإقليمية وهنا يجي دور مصر فى استقطاب أكبر قدر ممكن من الاستثمارات الأجنبية المباشرة.