أسرار عالم التريليونات.. ثورة الذكاء الاصطناعي تقلب موازين صناعة المحمول

اللي بيحصل في سوق صناعة المحمول دا مش طبيعي ياترى الثورة التكنولوجية الجديدة رايحة على فين وإيه اسرار سوق بيدور فيه تريليونات الدولارات على مستوى العالم ومصر فين من ده.. هنعرف كل التفاصيل هنا

تعرف إن حجم استثمارات شركة واحدة في صناعة المحمول في العالم بيتخطي موازنات دول كتيرة مجتمعة وتعرف إن القيمة السوقية للعملاق الامريكي أبل اللي بتصنع الأيفوت عدت ال 3 تريليون دولار حضرتك والقيمة السوقية لشاومي وصلت 434 مليار دولار والقيمة السوقية لسامسونج وصلت 345 مليار دولار وأقل شركة فيهم بتبيع بـ50 مليار دولار تليفوانات محمول  في 3 شهور بس.. هو ده العالم الغريب وعالم التريليونات اللي هنتكلم عليه النهاردة لأنه بيشهد تحول غير عادي.
طيب ايه اللي بيحصل في صناعة المحمول وخلتها تجذب تريليونات الاستثمارات؟
تقدر تقول كده إن فيه ثورة تكنولوجية هتقلب خريطة صناعة المحمول في العالم كله وبقي فيه صراعات عنيفة ومنافسة شرسة جدا بين شركات تصنيع المحمول الكبيرة للاستحواذ على التكنولوجيا الجديدة والتطبيقات اللي هتعمل ثورة في امكانيات التليفون للي حضرتك ماسكه في ايده واللي بتعتمد بشكل اساسي على تكنولوجيا وتطبيقات الذكا الاصطناعي.

وعلى سبيل المثال كشفت شركة آبل عن استراتيجية كاملة للذكاء الاصطناعي واللي طال انتظارها وبتعتمد على دمج أدوات تستند إلى تكنولوجيا جديدة اسمها "آبل إنتلجنس" من خلال مجموعة تطبيقاتها بما فيها المساعد الصوتي سيري.

بعد إعلان آبل عن التكنولوجيا الجديدة حصل زي انقلاب على مواقع التواصل الاجتماعي في الساعات الأخيرة، لأن بعدها على طول الملياردير والمدير التنفيذي لتسلا إيلون ماسك هدد بحظر أجهزة "آبل" في شركته إذا قامت أبل بدمج "أوبن إيه آي" ، على مستوى نظام التشغيل، مش قلنا لحضراكم دي حرب ومنافسة مفهاش رحمة.

لكن بعيد عن صراع شركات المحمول خلونا نقول لحضراتكم إن إعلان شركة آبل الأخير بيعتبر تدشين لعصر جديد للشركة وهو عصر الذكاء الاصطناعي حسب وصف خبراء الاتصالات في العالم وإن ده هيكون سبب في نقلة نوعية في قطاع صناعات الاتصال ومستوى جديد خالص بامكانيات ملهاش حدود زي مثلا إن ابل دخلت مؤثرات جديدة في تطبيقات الصوت عندها هتخليك تحس إن اللي بتكلمه ده قاعد معاك على المكتب أو في البيت.
طيب مصر فين من ده كله؟
لو متابعين معانا امبارح شرحنا بالتفصيل إزاي مصر دخلت مجال صناعة المحمول بقوة وازاي جذبت شركات عالمية لتوطين صناعة المحمول الذكي في مصر زي سامسونج وأخرها شركة نوكيا اللي أعلنت عن خططها لتحويل مصر لمركز اقلييمي لتصنيع وتصدير هواتفها في المنطقة وزيادة نسبة المكون المحلي وطبعا نقل التكنولوجيا الحديثة.