مصر تتسلم 50 مليار دولار.. يا ترى الحكومة جابتهم منين؟
هو ايه حكاية ال 50 مليار دولار اللى مصر استلمتهم فى اخر 3 شهور؟ ويا ترى جابتهم منين زهيروحوا فين ؟ وايه علاقة الانتعاشة الدولارية الكبيرة دي بقرارات 6 مارس ؟
وسام فتوح، الأمين العام لاتحاد المصارف العربية أكد ان مصر استقبلت نحو 50 مليار دولار استثمارات وتدفقات دولارية خلال اخر 3 شهور بفضل إجراءات البنك المركزي فى الاجتماع الاستثنائي للجنة السياسة النقدية فى بداية شهر مارس اللى فات واللى ساهمت فى توحيد سعر الصرف وتهيئة المناخ لجذب تدفقات الاستثمار الأجنبى المباشر وغير المباشر.
الأمين العام لاتحاد المصارف العربيةاللى كان بيتكلم فى الملتقى السنوى لمدراء الالتزام بالمصارف العربية واللى ينظمه اتحاد المصارف العربية فى مدينة شرم الشيخ.. وأشاد بالجهود اللى عملتها الدولة فى الفترة الأخيرة لتحسين مناخ الاستثمار وتذليل أى عقبات بتواجه المستثمرين الأجانب وقال أن الإدارة المصرية نجحت فى تحقيق الرؤية المتكاملة للنهوض بالبنية التحتية المتطورة.. وكشف أن مصر نجحت فى تحقيق إنجازات مهمة خلال العقد الأخير وأثبتت القدرة على مواجهة التحديات الدولية والإقليمية وتحقيق معدلات نمو مهمة.
طب يا ترى ال 50 مليار دولار الحكومة جابتهم منين وهتصرفهم فى ايه ؟
بص يا سيدي من شهر فبراير اللى فات الحكومة بدأت تشتغل بشكل جدي على ملف نقص العملات الأجنبية وتقدر تقول كده ان الرئيس السيسي بنفسه اتدخل فى الملف ده وعمل تحركات مهمة ساهمت فى توقيع الصفقة الكبرى صفقة راس الحكمة مع الجانب الاماراتى وده لوحدها دخلت للبلد 35 مليار دولار بالاضافة الى 150 مليار دولار تانية هيتم ضخها خلال مراحل تنفيذ المشروعات مع كمان 35% من ايرادات المشروع
وايه تأثير الصفقة دي على سوق الصرف ؟
الصفقة دي كان ليها تاثير ايجابي كبير على سوق صرف العملات الأجنبية فى مصر ومن خلالها قدر البنك المركزي تيخد واحد من أهم القرارات وهو تحرير سعر صرف الجنيه أمام العملات الأجنبية وده القرار اللى وحد سعر صرف الدولار وقضى بشكل تام ونهائي على السوق السودا للعملات الأجنبية
كمان الصفقة دي كانت شهادة جدارة للاقتصاد المصري وقدرته على جذب استثمارات اجنبية بارقام ضخمة وده حسن موقف مصر التفاوضى مع مؤسسات التمويل الدولية وخلا مصر تزود قرض صندوق النقد من 3 الى 8 مليار دولار بالاضافة الى موافقة الاتحاد الوربي على تقديم دعم لمصر بقيمة 10 مليار دولار بالاضافة الى البنك الدولى ومؤسسات تمويل تانية كتيرة.
طب المليارات دي كلها هتروح فين ؟
بص يا سيدى الحكومة عليها التزامات خارجية خاصة بالديون وسداد الأقساط وكمان فيه شركات اجنبية شغالة فى مصر وتحديدا فى مجال البتول ليها مستحقات كبيرة متأخرة الدولة هتسددها وكمان فيه جزء البنك المركزي ضخه فى البنوك لتلبية طلبات المستوردين والشركات
