وحش بريطاني جديد يدخل مصر.. إيه اللي بيحصل فى سوق البترول

 
 
مليارات واستثمارات حديدة وشركات عالمية دخلت البلد.. إيه اللي بيحصل في سوق البترول والغاز المصري وليه القطاع ده هيرجع يشد حيله من تاني ويأمن موارد مصر البترولية الضخمة وكمان هيدخل دولار زيادة.. تعالو نشوف إيه الحكاية 
 
مسألتش نفسك ليه شركات التنقيب العالمية عن البترول والغاز الطبيعي حريصة إنها تستغل في مصر وبتضخ على طول أموال بالدولار كل سنة.. احنا هنقولك لأن ببساطة الشركات العالمية دي مقتنعة أن مصر لسه مليانة كنوز من البترول والغاز وبتطلع كل ما اتطورت تكنولوجيا التنقيب ولأن مصر بتوقع وسط منطقة غنية جدا بالبترول الخليج في الشرق وليبيا في الغرب ومع نفس تكوين طبقات التربة في المناطق التلاتة مصر لسه فيها خير كتير والا الشركات العالمية مش هتضخ مليارات الدولارات كل سنة على. مفيش وعشان كده كل يوم فيه شركات عالمية جديدة بتدخل السوق المصري للتنقيب عن البترول والغاز والثروات.
مصر عندها خطة طموحة الاكتشافات البترولية في مناطق امتياز كتير وكل يوم البشاير بتظهر وكان آخرها اكتشافات البترول والغاز في أبو قير واللي فاقت التوقعات حسب بيان الشركة نفسها.. طيب ايه الجديد في قطاع البترول المصري.. شوف ياسيدي في الأول لازم تعرف إن  وزارة البترول المصرية يتنفذ حاليا برنامج بالتعاون مع كبرى الشركات العالمية زي (إيني الإيطالية وشيفرون وإكسون موبيل وشل وبي بي) لحفر 35 بئر استكشافية جديدة للغاز الطبيعي في البحر المتوسط ودلتا النيل خلال سنتين، بداية من العام الماضي وحتى يوليو  2025، بإجمالي استثمارات  1.8 مليار دولار وبردوا البشاير مفرحة .

الجديد بقي إن فيه لاعب عالمي جديد دخل مجال التنقيب عن البترول والغاز في مصر وهو شركة هاربور إنرجى البريطانية الشهيرة في المجال ده واللي استحوذت النهاردة على مناطق امتياز شركة فنترشال ديا الألمانية فى مصر ودخلت الشركة السوق المصرى لأول مرة من خلال استحواذها على مناطق امتياز فنترشال ديا الألمانية بدلتا النيل والبحر المتوسط.
والنهاردة استقبل طارق الملا وزير البترول والثروة المعدنية ليندا كووك الرئيس التنفيذى لشركة هاربور إنرجى واللي بتعتبر واحدة من أكبر الشركات البريطانية العاملة فى مجال البترول والغاز والطاقة بشكل عام.

واشادت الشركة البريطانية بإمكانيات قطاع البترول المصرى من بنية أساسية متطورة ومهارات وخبرات كوادر مصرية متميزة ، وتعهدت الشركة البريطانية بضخ استثمارات جديدة وتوفير تكنولوجيات متطورة في السوق المصري قريب جدا  وكمان اتعهدت الشركة البريطانية بالتوسع فى العمليات وأن تصبح من كبريات الشركات العاملة فى مجال الطاقة فى مصر.

وعلى هامش توقيع الاتفاقية الجديدة مع الشركة البريطانية قال وزير البترول إن فيه خطط لعدد من المشروعات الجديدة المتوقع دخولها مرحلة الإنتاج خلال العام المالي اللي جاي لزيادة إنتاج الغاز الطبيعي وإن إنتاج مصر من الغاز الطبيعي حالياً بيوصل 5.5 مليار قدم مكعبة يوميا وقال كمان إن بدء الحكومة المصرية بسداد مستحقات الشركاء الأجانب هيساهم في زيادة استثمارات الشركات العالمية في مصر خلال الفترة الجاية، و الإسراع في تنمية حقول النفط والغاز في مناطق البحر المتوسط والبحر الأحمر.

وبالارقام ارتفعت استثمارات شركات النفط الأجنبية في مصر خلال السنة المالية 2022-2023 بنسبة 7.82 في المية لتصل إلى 6.2 مليار دولار، مقابل 5.75 مليار دولار في السنة المالية السابق