رادار الأسعار.. أخر فرصة لمدبولي قبل الكارت الأحمر
دي أخر فرصة للحكومة والو مقدرتش تسيطر على الاسعار هيكون فيه كلام تاني.. ايه حكاية التحذيرات الأخيرة لحكومة مدبولي وإيه اللي هيحصل الفترة الجاية في الاسواق.. خليكم معانا للأخر هنعرف كل التفاصيل
من فبراير 2023 وتحديدا مع بداية الأزمة الروسية الأوكرانية واللي حصل بعدها في المنطقة حولينا والمصريين داخلين حرب من طرف واحد مع تجار الأزمات والسلع واللي قرروا يستغلوا الأوضاع ونقص الدولار ويخزنوا البضايع ويرفعوا الأسعار بطريقة جنونية ومن غير مبرر معقول وبدل الحاجة ماترفع جنيه كانوا بيرفعوا 100 جنيه عشان يضاعفوا مكاسبهم ويبيعو ويشتروا في الناس وظهرت السوق السودا في الدولار والسكر والبصل والطماطم والسجاير وكانت مهزلة الحقيقة.
رغم جهود الحكومة واللي قعدت مع مسئولي الشعب التجارية والتجار واصحاب المصانع وشركات التعبئة والتوزيع لكن في النهاية النتيجة صفر تقريبا والمواطن مشفش انخفاض حقيقي في أغلب السلع بالعكس لسه فيه سلع بتزيد وأخرها النهاردة السبت مع إعلان احدى شركات الشوكولاتة والحلويات رفع اسعار بعض منتجاتها.
طيب لغاية امتي الناس هتستحمل وإيه الفرصة الاخيرة للحكومة عشان تسيطر على الأسعار من تاني.. شوف ياسيدي المتحدث باسم جهاز حماية المستهلك في مصر، طلع من ساعات واتكلم على فكرة تطبيق حاجة اسمها رادار الأسعار وده أخر حيلة لجأ ليها الدكتور مصطفي مدبولي عشان يفرض سيطرة الحكومة على الأسعار ويفرض هيبة الحكومة على الأسواق ويعزز التنافسية.
متحدث حماية المستهلك واللي هو المفروض الجهة اللي بتابع بشكل مباشر حركة الاسعار في الاسواق ولو فيه اي غش أو تدليس أو مغالاة في الأسعار بياخد اجراءات فورية أكد إن تطبيق ردار الاسعار هيساعد المواطنين على إيجاد أقل سعر للسلعة في نطاق المناطق الموجدين بجانب تعزيز التنافسية بين الشركات والمنتجين والموردين لرغبتهم في بيع السلعة بأقل سعر ممكن.
طيب ايه أصلا رادار الأسعار.. شوف ياسيد دي فكرته إنه تطبيق الكتروني هيكون متاح على الموبايل اللي في ايديك وبيعرضلك أسعار السلعة الواحدة في أكتر من مكان وبيكون موصول بالسوبر ماركت والهايبر ماركت الكبير وبكده تعرف سعر السلعة في أكتر من مكان في النطاق اللي انت موجود فيه وقت ما بتفتح التطبيق كمان التطبيق هيتيح للمستخدم تحديد الموقع والمتجر وسعر السلعة وإرفاق صورة للسعر وتحديد الموقع الجغرافي اللي تم الشراء منه، كمان هيتيح البحث ومعرفة أسعار السلع فى النطاق الجغرافى حوله التي تم مشاركتها من مستخدمين آخرين.
طيب إزاي هنزل تطبيق رادار الاسعار.. شوف ياسيدي هتحمل التطبيق واسمه رادار الأسعار عن طريق تطبيق "بلاي ستور" من الهواتف، وبعد تحميله هيتم تشغيله وإنشاء حساب للمستخدم عليه وبعدها تقدر تدخل على التطبيق وتتعامل معاه وتبحث عن اسعار السلع في منطقتك.
