شوف مصر بتعمل إيه علشان توفر استخدام البترول في تشغيل محطات توليد الكهرباء
مصر مش هتحتاج بترول تاني لتشغيل محطات توليد الكهرباء.. والبيوت والشوراع والمصانع كلها هتكون شغالة بطاقة نظيفة المحطات انتجتها من استغلال طاقات الشمس والرياح... ياتري الحكومة هتعمل الخطة دي ازاي.. وهل مصر هتقدر تستغني عن محطات التوليد العادية.
مصر عندها خطط كبيرة أنها تكون القوي الأكبر في العالم، الخطط دي قايمة علي فكرة تحويل مصر لمركز تجارية عالمي وكمان مركز اقليمي لتبادل الطاقة مع دول العالم، وعلشان نوصل لتحقيق الحلم ده، فالحكومة بدأت تعظم انتاجها من الطاقات الجديدة والمتجددة واللي بتكون انتاجها غالبا من استغلال طاقات الشمس والرياح، واللي بتعد طاقات نظيفة ومستمرة علي المدي البعيد وبيوصل العمر التشغيلي لمحطات التوليد اللي من النوع ده لأكثر من 25 سنة.
في الفترة اللي فاتت الحكومة انتهت من تخطيط الاستراتيجية الوطنية للطاقة 2040، واللي بتهدف للوصول بنسبة الطاقة الجديدة والمتجددة لـ42% من الطاقة المستهلكة في 2030 وكمان بنستهدف الوصول لـ 65% من الطاقة المستهدفة في 2040، وعلشان الحكومة توصل لتحقيق الخطة دي، فالدولة قدمت تسهيلات كبيرة جدا لشركات القطاع الخاص للدخول والاستثمار في انتاج الطاقة الجديدة والمتجددة من خلال تقديم تسهيلات كبيرة في تخصيص الأراضي لاقامة وبناء محطات توليد التيار من الشمس او الرياح، ده غير أن العقود اللي بتوقعها الحكومة مع شركات القطاع الخاص بيكون فيها بند بقيام الحكومة بشراء الطاقة اللي هتنتجها الشركات وبيكون فيها جزء بالدولار والجزء التاني بيكون بالجنية المصري.
طيب ازاي الحكومة هتوصل لخطة وقف تشغيل محطات توليد الكهرباء العادية؟.
وزارة الكهرباء والطاقة المتجددة حاليا بتستهدف زيادة قدراتها المولدة من الطاقة الشمسية وطاقة الرياح وده بالتعاون مع شركات القطاع الخاص المحلي والأجنبي، وبنهاية عام 2026 هتوصل القدرات الجديدة المولدة من مصادر الطاقة الجديدة والمتجددة لـ 12 الف ميجاوات ده غير استهداف انتاج 3350 ميجاوات بطاريات تخزين.
الاستراتيجية الوطنية للطاقة 2040 واللي مصر شغاله حاليا علي تنفيذ بنودها بتستهدف الوصول إلى 20 الف ميجاوات من الطاقات المتجددة في 2029، ده غير أنتاج 3600 ميجاوات من الطاقة النووية النظيفة، وانتاج 2400 ميجاوات من الضخ والتخزين عن طريق بطاريات التخزين، وكل المشاريع دي الهدف منها خفض انبعاثات الكربون وخلق فرص عمل جديدة للشباب ودفع عجلة النمو الاقتصادي وتحقيق مستهدف الدولة لخفض الاعتماد على الوقود الأحفوري، وخفض الانبعاثات وتحقيق رؤية مصر 2030.
الاستراتيجية الوطنية للطاقة بتستهدف كمان أن مصر تتحول لمركز إقليمي لتبادل الطاقة يربط بين أسواق الطاقة في أفريقيا وأوروبا والشرق الأوسط بفضل الموقع الإستراتيجي ومشروعات البنية التحتية الأساسية لكصر، وفعلا مصر بدأت تنفذ خطة الربط الكهربائي لربط قارات أفريقيا وآسيا وأوروبا ببناء خطوط ربط كهربائي مع السودان وليبيا في قارة أفريقيا والأردن والسعودية في قارة أسيا، وقبرص واليونان في قارة أوروبا.
