كل يوم اختراع.. شوف حيلة التجار لرفع أسعار الفراخ في الاسواق

في عز ما الدولة حققت خطوات ملموسة في ملف انخفاض الاسعار واغلب السلع في الاسواق اسعارها انخفضت الا اللحوم والفراخ اسعارها لسه مرتفعة ولسه بتزيد، ياتري ايه الاسباب.. واشمعني الفراخ واللحوم اللي اسعارها بترتفع.. تعالوا نشوف إيه الحكاية في الفيديو ده.

 

النجاحات الاقتصادية اللي الدولة عملتها في ملف توفير التدفقات الاجنبية المباشرة لخزينة البنك المركزي واللي تبعها خطوات مكثفة للتعامل مع ملف الاسعار والسيطرة عليها خصوصا ان الدولة وصلت لمرحلة كانت شبة فقدت السيطرة تماما علي الاسعار في الاسواق وكان كل تاجر بيبع السلعة اللي عنده بمزاجه وبالسعر اللي يحدده، وكان التجار هدفهم الاساسي هو تعطيش السوق من السلع علشان يحصل فيها نقص وبالتالي الطلب عليها يزيد واسعارها ترتفع اكثر واكثر.

علي فترات طويلة والدولة بتحاول تسيطر علي ملف الاسعار، وعملت اكتر من اجتماع مع التجار والموردين وطالبتهم بالسيطرة علي الاسعار بالاسواق، وكان اهم الاجتماعات اللي عملتها الحكومة مع التجار الاجتماع اللي عمله الدكتور مصطفي مدبولي رئيس الوزراء مع التجار والموردين في شهر رمضان اللي فات واللي طالبهم فيه بنزول الاسعار بنسبة 30% علي الاسعار اللي موجوده عليها السلع في الاسواق، خصوصا ان الحكومة عملت اللي عليها ووفرت الدولار اللي التجار كانوا مش لاقيينه  في السوق السوداء.
صحيح الاجتماع اللي عمله رئيس مجلس الوزراء جاب نتيجة ونتيجة كويسة جدا كمان، وفعلا المواطن حس بنزول الاسعار بشكل كبير، خصوصا ان السوق المصري كان فيه شح من سلع كتيرة زي الزيت والسكر والأرز، واللي كان أن تلاقي كيلو واحد من السلع دي حلم، ولو لاقيته كان صعب جدا تقدر تشتريه.
علي الرغم من النجا ح الكبير اللي حققته الدولة في السيطرة علي الاسعار، الا انه ملف اللحوم والفراخ فضل برضوا خارج السيطرة والحكومة فشلت في السيطرة عليه، وطول الوقت فضل يرتفع كل يوم عن اللوم اللي قبله، وكان كل مرة التجار يطلعوا بحجة شكل غير الحجة اللي قبلها علشان يبرروا ارتفاع الاسعار مرة قالوا بسبب ارتفاع اسعار الاعلاف في الاسواق، ومرة بسبب ارتفاع نسبة النافق في تربية صغار الفراخ وغيرها وغيرها من الحجج اللي ملهاش اي مبرر، وفضل الحال علي ما هو عليه لحد ما الشعب عملات حملات مقاطعة للاسماك واللي بدأت من الاسماعيلية وانتشرت لاغلب محافظات الجمهورية، وبعدها انتقلت من الاسماك الي اللحوم والفراخ وفعلا الاسعار نزلت وبشكل كبير.
يا دوب الاسعار بدأت تنزل والمواطن لسه هياخذ نفسه، وهوب الاسعار ضربت في العالي مرة تانية، لكن الحجة المرة دي من التجار اختلفت عن كل مرة فاتت، والمرة دي قالوا ان خطة قطع الكهرباء علي المحافظات واللي الحكومة شغالة بيها هيا السبب خصوصا ان قطاع الكهرباء خلي اجهزة التربيد توقفت في مزارع تربية الفراخ وبالتالي نسبة الموت ارتفعت جدا عند المربيين، وده السبب الرئيسي في ارتفاع اسعار الفراخ في الاسواق واللي بسببها سعر كيلو الفراخ تعدي الـ100 جنيه حاليا في الاسواق.