يونيو الصعب.. تفاصيل أخطر 3 قرارات في تاريخ الحكومة

واضح ان شهر يوينو اللي جاي هيكون شهر مش سعيد خالص علي المصريين خصوصا ان هيشهد اقوي موجة من رفع اسعار الخدمات والسلع اللي بتقدمها الحكومة للمواطنين... يا تري اية حكاية رفع الدعم عن السلع والخدمات اللي بتقدمها الحكومة للمواطنين واية هيا الخدمات اللي اسعارها هترتفع في الايام اللي جاية.
 

من كام يوم فاتوا والحكومة والدولة كلها بتتكلم عن خطة رفع الدعم عن السلع والخدمات اللي بتقدمها الدولة للمواطنين خصوصا ان فاتورة الدعم ارتفعت بشكل كبير في الكام شهر اللي فاتوا بسبب الاحداث والحروب اللي موجودة في اغلب دول العالم واللي لها تاثير مباشر علي اسعار الطاقة العالمية وطبعا مصر واحدة من الدول اللي اتاثرت بالاحداث دي ,
مفيش يومين من كلام الحكومة علي خطة رفع الدعم بشكل تدريجي عن السلع والخدمات اللي بتقدمها الدولة للمواطنين، وخرجت الحكومة واعلنت عن رفع اسعار العيش المدعم اللي بتقدمه الحكومة علي بطاقات التموين من 5 قروش الي 20 قرش للرغيف الواحد، ودي اول زيادة لاسعار رغيف الخبز من 30 سنة.
زيادة رغيف الخبز كان له صدي جامد جدا في الشارع المصري خصوصا ان رغيف الخبز من اوائل السلع الخدمية واللي كل مواطن في الدولة ميقدرش يستغني عنه خصوصا الطبقات محدودة الدخل واللي الدولة اكدت اكتر من مرة أنه بتهدف لراحتهم في المقام الاول.
الحكومة اتكلمت عن خطة رفع الدعم عن رغيف الخبز وقالت ان تكلفته بتوصل علي الحكومة الي 125 قرش، والدولة كانت بتبيعه للمواطن بـ5 قروش، ودي خسارة كبيرة قوي علي الدولة وبالتالي جه الوقت لتحريك اسعار العيش، وعلي الرغم من التحرك ده الا ان الدولة هتفضل برضوا تدعم الخدمات اللي بتقدمها للمواطنين.
طيب اية هيا الحاجات التانية اللي اسعارها هترتفع في الايام اللي جاية؟.
علشان نكون عارفين ان الدولة حاليا مستهدفة رفع اسعار المواد البترولية واسعار شرائح الكهرباء ورفع الدعم التدريجي عن رغيف الخبز وده اللي حصل والحكومة خذت فيه القرار، وهيبدا تطبيقه من بعد بكرة السبت أول ايام شهر يونيو اللي جاي، وحاليا جه الدور علي المواد البترولية ولجنة تسعير المواد البترولية علي وشك الانعقاد لمناقشة تسعير المواد البترولية والمؤكد ان اللجنة هتوافق علي اعادة تسعير اسعار السولار والبنزين بكل انواعه بالاضافة الي اسعار انبوبة البوتاجاز.
وخلال ايام بعد الانتهاء من اعادة تسعير المواد البترولية الحكومة هتدخل علي اعادة تسعير شرائح الكهرباء خصوصا أن خطة تسعير شرائح الكهرباء اللي شغالين عليها حاليا هتنتهي مع نهاية شهر يونيو اللي جاي، هيتم البدء في العمل بخطة تسعير المواد البترولية الجديدة من اول ايام شهر يوليو اللي جاي.
مصادر بوزارة الكهرباء والطاقة المتجددة قالت ان الزيادة في اسعار شرائح الكهرباء اللي جاية هتكون اعلي تسعير حصل لها منذ بداية العمل بها خصوصا ان تكلفة الكيلو وات بتقع علي الدولة بـ2 جنية و23 قرش والدولة حاليا بتبيعه للمواطن بـ58 قرش، والتسعير ده جاي في وقت الدولة بتطبيق فيه خطة تخفيف الاحمال واللي شغاله بكل قوه علشان تنهي العمل بيها علي اول شهر نوفمبر أو ديسمبر اللي جاي علي اقصي تقدير.