غدار يادولار.. لو خايف من بكرة خليك في الدهب واستثمر صح
ياترى مين هيحسم معركة الدولار والدهب في الأيام الجاية وليه الدهب أمان والدولار غدار وإيه أفضل استثمار دلوقتي وبكرة وبعده.. تعالي هنقولك إيه بيجري في السوق
زي ما احنا عارفين الدهب والدولا ناقر ونقير مع بعض ولو حاجة فيهم طلعت التانية بتنزل على طول لكن الدهب بيفرق إنه استثمار وملاذ وحيطة ضد غدر الأيام وحماية في وقت الشدة وعشان كده بيسموه الاستثمار المضمون.
طيب ليه الأمور كلها رايحة ناحية الدهب.. عشان ببساطة الشهور والسنين اللي جاية كلها هي سنين الدهب ودي اللي بتقوله الدراسات والبيانات والمؤشرات الاقتصادية لأن العالم داخل على مرحلة صعبة اقتصاديا بسبب الأزمات الدولية وامتداد الصراعات لفترات طويلة بجانب التغيرات المناخية وتوتر خطوط التجارة العالمية وارتفاع أسعار السلع والخدمات دوليا.
كل المؤشرات بتقول إن الدهب هيقفز لمستويات تاريخية وده اللي سبق وقلناه كتير في بانكير وكمان في مصر الأسعار هترفع بشكل كبير جدا لأن متوقع الطلب هيزيد على الدهب بشكل كبير في الأيام والشهور الجاية بسبب المناسبات والتحوط ضد القرارات الاقتصادية الجديدة وكمان بعد كلام الحكومة عن رفع الدعم بشكل حزئي عن سلع وخدمات وده هيخلي الناس تلجأ لتشغيل أو حفظ مدخراتها في حاجة تعيش وتجيب فلوس أكتر من أي استثمار تاني.
كمان متوقع إن البنك المركزي هينزل الفايدة في الاجتماعات الجاية وده معناه إن شريحة كبيرة من أصحاب المدخرات هيلجأو لسوق الدهب وفيه حاجة تانية مهمة جدا هتحصل كمان وهي إن أصحاب الفلوس اللي تحت البلاطة واللي بيشيلوها بعيد عن البنوك والبريد ولا بيحطوها في مشروعات هيقرروا يخرجوها بقي ويشترو بييها دهب عشان يحافظوا على قيمة فلوسهم وفي نفس الوقت تزيد.
لعبة الدولار والدهب مش مضمونة في العموم لأن الدولار سعره بيتوقف على حاجات كتير زي العرض والطلب والتدفقات الدايمة للعملة وحجم السحب عليها وفي نفس الوقت الدهب بيشوف اللي بيحصل في الدولار وبناء عليه بتتحرك الصاغة وبتتحدد أسعار المعدن الأصفر، وفي النهاية والخلاصة واللي قلناه قبل كده إن ده أفضل وقت تشتري فيه دهب دلوقتي ولو معاك أي سيولة ياريت تحولها لدهب قبل فوات الأوان لأن الأسعار هترفع وده اللي بيقوله السوق وبتقوله التجارب والتوقعات كلها.
وخلي بالك وانت بتشتري دهب لأن المغشوش كتر أووي اليومين دول مع زيادة الطلب ومتشتريش غير من حد ثقة وخد منه فاتورة واتأكد إن الوزن مثبوت فيها صح وبنفس القيمة ولو هتشتري كمية كبيرة خد حد بيفهم في الدهب كويس جدا.
