بشاير بريكس.. الرئيس السيسي بيعمل إيه في الصين

هو الرئيس السيسي راح ليه دلوقتي الصين وإيه علاقة بريكس بالزيارة وسر قمة توسيع الآفاق بين مصر وبلاد التنين وإيه حكاية الاستثمارات الصينية الضخمة اللي هتيجي مصر.. يالا بينا نشوف التفاصيل في التقرير التالي.

النهاردة الرئيس السيسي زار الصين بدعوة خاصة لحضور قمة مؤتمر التعاون العربي الصيني واللي حضرها بردو رئيس الإمارات محمد بن زايد وملك البحرين والرئيس التونسي وحسب التصريحات الرسمية الصينية القمة بتعتبر لقاء خاص لتوسيع أفاق التعاون العربي الصيني لكن هنتكلم هنا عن الهدف من زيارة السيسي للصين في الوقت ده..
شوف ياسيدي كلها كام سنة والصين هتبقي الاقتصاد رقم واحد في العالم وده معروف ومش اختراع بسبب النمو الصيني الاقتصادي الرهيب في بلد عدد شعبه مليار و300 مليون بني أدم والحقيقة العلاقات الصينية المصرية ليها وضع خاص جدا لأن مصر كانت أول دولة تعترف بجمهورية الصين الشعبية ودي حاجة كبيرة جدا ولسه الصينيين فاكرينها وعشان كده حصل تعاون كبير بين البلدين في كل المجالات.
لكن مع تولي الرئيس السيسي العلاقات مع الصين خدت شكل تاني خالص وهو الشراكة الاستراتيجية على كل المستويات الاقتصادية والصين رحبت بانضمام مصر للبريكس وبنفكركم إن الصين دلوقتي بتحضر لمشروع في الساحل الشمالي أكبر من مشروع راس الحكمة وهيكون مشروع صناعي ترفيهي تجاري خدمي بحسب تصريحات سفير الصين في مصر وقريب أووي هيتم الإعلان عن التفاصيل كلها في مؤتمر صحفي
وبلغة الأرقام وصل الحجم التجاري بين مصر والصين 18 مليار دولار خلال 2022، ووصلت حجم الاستثمارات الصينية 8 مليار دولار، من خلال 2066 شركة ذات مساهمة صينية.. ود اللي موجود دلوقتي لكن اللي جاي حاجة تانية خالص لأن مصر والصين داخلين شراكات ضخمة وفيه خطة صينية كبيرة لتوسيع الاستثمارات في مصر بمشروعات بمليارات الدولارات وتحويل مصر لبوابة تصدير لأفريقيا كلها ومثلا لو مش فاكرين الصين دلوقتي 
بتعمل أكبر مصنع للسيارات في العالم داخل مصر وتحديدا في مدينة طربول بحسب تصريحات شريف حمودة المطور العقاري لمدينة طربول الصناعية وعشان تعرف قد إيه المصنع ضخم جدا كفاية نقولك إنه هينتج 15 مليون سيارة في السنة الواحدة حضرتك متخيل حجم الإنتاج وتأثيره على الاقتصاد المصري وحجم فرص العمل وإزاي هيخلي مصر مركز وسوق دولي للسيارات.
ومن بين التفاصيل اللي كشفها مسئول مدينة طربول إن الصين شغالة دلوقتي في بناء مجمع مصانع مكونات السيارات بنفس المكان وإن الاتفاق مع الصين كبير جدا والشركة ضخمة وهيتم الإعلان عن كل التفاصيل قريب جدا.
كل ده مش كفاية الرئيس السيسي كمان في دماغه إن يحقق أكبر استفادة من زعامة الصين في البريكس اللي انضمت ليها مصر في الفترة الأخيرة وتفعيل كمان برامج واتفاقيات تبادل التجارة بالعملات الوطنية واتفاق مبادلة العملات نفسها بدل الدولار وجذب مليارات جديدة صينية في السوق المصري في الفترة الجاية.