لغز الهياكل العملاقة اللي بيبنيها السيسي في المحافظات.. وكواليس مفاوضات الحكومة وصندوق النقد.. وقصة كشف غاز هيقلب موازين السوق
![الرئيس عبدالفتاح]( /UploadCache/libfiles/5/5/600x338o/169.jpg)
متابعينا الكرام في كل مكان أهلا وسهلا بكم وتحليل جديد لأهم التقارير اللي قدمتها وحدة بانكير على مدار اليوم الأحد 26 مايو 2024..
منصات بانكير قدمت النهاردة عدد كبير من التقارير المهمة في عدد كبير من الموضوعات والبداية مع تقرير خاص عن اكتشاف ضخم للغاز في مصر
وقال التقرير إن مصر بتواجه أزمة في الاستهلاك الكبير من الغاز ولجأت للاستيراد الفترة اللي فاتت عشان تسد العجز وده سبب أزمة تخفيف الأحمال بالكهربا لحين الانتهاء من تطوير حقول ظهر الجديدة اللي حولين الحقل الأصلي اللي إنتاجه بدأ يقل بسبب عمليات السحب الكبيرة منه على مدار سنين وفي نفس الوقت مصر شغالة في عمليات التنقيب عن الغاز بقوة.
وشرح التقرير إنه في الساعات الأخيرة أعلنت شركة إنرجيان اكتشاف غاز في مصر بكميات "تفوق التوقعات" وده حسب بيان الشركة داخل حقل أبوقير قبالة سواحل غرب دلتا نهر النيل، وفق ما رصدته منصة الطاقة المتخصصة ومقرها واشنطن.
وبحسب تقديرات الشركة المُدرجة ببورصتي لندن وتل أبيب ومقرها أثينا في اليونان، من المتوقع دخول اكتشاف الغاز الطبيعي حيز الإنتاج في الربع الثالث من العام الجاري (2024)
الرئيس التنفيذي لشركة إنرجيان ماثيوس ريغاس علق على الاكتشاف الجديد للغاز في مصر وقال إن الكشف فاق التوقعات واكتشفنا 270 قدمًا من الطبقات الحاملة للغاز، وإن الشركة شغالة بوتيرة سريعة لاستخراج الغاز في اقرب فرصة.
التقرير التالي اللي معانا عن تحرك عاجل في ملف العملات الأجنبية
وأشار التقرير إنه في الأيام اللي فاتت طرحت عدد من البنوك المصرية حسابات توفير دولارية بفايدة تتراوح بين 3.5% و5%، وفقا لشريحة المدخرات.
وقال التقرير إن الخطوة دي بتيجي في اطار سعي البنوك لطرح حسابات توفير دولارية جديدة، ضمن خطة توفير قنوات مختلفة لاستقطاب مدخرات العملاء بالعملات الأجنبية وتعزيز مستويات السيولة الدولارية في القطاع المصرفي
وعلى الرغم من استمرار إتاحة البنوك الحكومية لشهادات دولارية بأسعار فائدة تتراوح بين 7و9% لكن حسابات التوفير بتتيح مرونة أكبر وسهولة في عمليات سحب وإيداع الدولار.
منصات بانكير قدمت تقرير مهم عن مطالب من صندوق النقد لمصر واللي بيحصل فى كواليس زيارة بعثة الصندوق للقاهرة.
وكشف التقرير إنه من ايام قليلة بدأ خبراء صندوق النقد الدولي إجراء المراجعة التالتة لبرنامج القرض المقدم لمصر والبالغ قيمته 8 مليار دولار.. وبتتركز المناقشات الجارية حاليا في القاهرة بين بعثة الصندوق والحكومة المصرية على استخدامات حصيلة صفقة رأس الحكمة وتنفيذ وثيقة سياسة ملكية الدولة
ومع نهاية المراجعة واجتيازها بنجاح من المنتظر تحصل مصر على الشريحة التالتة من القرض واللى قيمتها 820 مليون دولار
وبخصوص كواليس المناقشات قال التقرير إن بعثة الصندوق طلبت من الحكومة المصرية الاطلاع على استخدامات حصيلة صفقة رأس الحكمة ومدى توافقها مع أولويات الإنفاق الحكومي والأهداف المالية بما فيها خفض الدين العام والالتزام بوضع سقف للاستثمارات العامة وخفض عجز الموازنة.
بعثة الصندوق طلبت كمان مراجعة الإجراءات اللى خدتها الحكومة لتنفيذ وثيقة سياسة ملكية الدولة، وتقييم العروض المقدمة والتقدم اللى تم في بيع أصول مملوكة للدولة.. واطلعت البعثة على تدفقات الاستثمار الأجنبي المباشر والإجراءات اللى اتعملت من جانب مصر لتحسين مناخ الاستثمار.
وبالنسبة لبرنامج الطروحات الحكومية بتحقق بعثة الصندوق من الإجراءات الخاصة بالصفقات المرتقب تنفيذها
وحسب التقرير البعثة هتناقش كمان خطط مصر للحصول على تمويل طويل الأجل لمشروعات المناخ بقيمة 1.2 مليار دولار بتكلفة منخفضة من صندوق "المرونة والاستدامة" التابع لصندوق النقد الدولي.
النهاردة منصات بانكير قدمت بالتحليل تقرير مهم عن مشروع ضخم بيتنفذ تحت إشراف الرئيس السيسي شخصيا وليه علاقة مباشرة بالأمن القومي لمصر.
وقال التقرير إن الدولة شغالة في عمل مشروع ضخم وهو بناء مخازن عملاقة استراتيجية للأدوية والمستلزمات الطبية عبارة عن 6 مخازن في 6 محافظات وباستثمارات 8 مليار دولار وده بيورينا قد إيه المخازن دي عملاقة.
وقال التقرير إن هدف بناء الهياكل العملاقة دي تأمين الأمن القومي من الأدوية والمستلزمات الطبية والتحكم في منظومة من اخطر المنظومات اللي ممكن تمس حياة الشعوب وكلنا شفنا اللي حصل في جائحة كورونا والبلاد اللي ضاعت عشان مكنش عندها مخزون من الأدوية واللي متقلقش في أهميتها عن مخزون القمح والزيت والسكر لأنها تتعلق بحياة الناس.
وقال التقرير إن مصر فكرت تعمل مخازن استراتيجية ضخمة عشان ماتكونش تحت رحمة شركات الأدوية العالمية في أوقات الأزمات ولا تقعد تدور على لقاحات أو عقاقير في وقت الأوبئة ومصر من الأخر بتبني احتياطيات ضخمة الأدوية زي احتياطات الغاز والبترول والنقد الأجنبي اللي في البنك المركزي.
مفيش الشك إن المشروع هينظم ويحمي سوق الدواء المصرية وهيقضي على ظاهرة نقص الأصناف والزيادات المتتالية في الأسعار بسبب نقص المواد الخام اللازمة للإنتاج أو تكدسها بالموانئ وزي ما قلنا المشروع بيحظي باهتمام ومتابعة خاصة من الرئيس السيسي حسب المعلومات اللي حصلت عليها بانكير لأنه مشروع بيمثل تأمين مهم للشعب المصري.