خبر طازة من سوق السيارات شوف التخفيضات الجديدة
![سوق السيارات]( /UploadCache/libfiles/5/5/600x338o/176.jpg)
نفسك في عربية زيرو ولا استعمال خفيف تقضي بيها مشاويرك وتغنيك عن الزحمة والتأخير ومستني السوق يريح شوية عشان تعرف تشتري.. شوف الفيديو دال للأخر قبل ما تروح سوق السيارات
سوق السيارات لسه مرجعش لحالته اللي كان عليها قبل أحداث فبراير 2022 وتحديدا قبل الحرب الروسية في أوكرانيا واللي حصل ساعتها في مصر بداية من أزمة الدولار الشديدة واللي ضربت السوق في مقتل لان قطاع السيارات تقريبا كله بيعتمد على الاستيراد من الخارج سواء للعربيات أو لقطع الغيار ولأن الحكومة ساعتها اعتبرت السيارات سلع ترفيهية وخلته في أخر قايمة الاستيراد وفق سياسة الأولويات وترشيد العملة.
وكانت نتيجة كل ده ارتفاع خيالي في أسعار السيارات واللي فرض أصحابها أوفر برايس عليها عشان يأمنو من غدر الدولار واللي كان كل ساعة بسعر في السوق الموازية.
المهم بعد صفقة رأس الحكمة ونهاية السوق السودا بدأت الأسواق ترتاح شوية شوية والأسعار ترجع عن مستواها ومن بينها أسعار السيارات واللي بدأت تشهد تحفيضات ضخمة تراوحت في البداية بين 15 و20 في المية بعد إلغاء الأوفر برايس.
الجديد بقي النهاردة هو اللي أعلنته رابطة تجار السيارات في الغرف التجارية حولين تراجع أسعار السيارات الجديدة المستوردة بنسبة تبدأ من 20%، أما بالنسبة للسيارات الجديدة المجمعة محليًا فبدأت نسب التراجع فيها بحوالي 25%، وده بعد استقرار سعر صرف الدولار في البنوك عند46 جنيهًا و77 قرش بحسب آخر تحديث للبنك المركزي المصري.
وبحسب الأسعار المعلنة من المعارض الكبيرة على المنصات الرسمية الصادرة، تراجعت أسعار السيارات خاصة موديل العام 2024 بنسب وصلت لـ 600 ألف جنيه، بالنسبة لسيارات سعة لترية 2000 سي سي وحتى 3600 سي سي، وقال منتصر زيتون، رئيس شعبة السيارات بكفر الشيخ، إن أسعار السيارات الحديثة تراجعت ما بين 300 لـ600 ألف جنيه، على حسب الموديل.
وحسب بيانات السوق كانت أكبر نسب انخفاض في أسعار السيارات هي السيارات الكورية محلية الصنع، عشان بتوفر مصاريف الشحن والتصدير وغيرها من الرسوم الجمركية التانية ودي سبب الانخفاضات الأخيرة، وعلى فكرة وزي ما احنا عارفين إن انخفاض أسعار الزيرو معناه انهيار أسعار السيارات المستعمل ودي سوق كبير جدا بيساهم في سد الطلب على السيارات بشكل عام وبالتالي نزول الأسعار أكتر من كده ودي على فكرة توقعات تجار السيارات واللي بياكدوا إن الأسعار لسه هتنزل بشكل كبير بسبب زيادة المعروض وامتصاص جزء كبير من الطلب على السيارات المتراكم.