أسرار أزمة رئيس الحكومة مع وزير التموين بسبب الأسعار
![رئيس الوزراء ووزير]( /UploadCache/libfiles/5/5/600x338o/180.jpg)
كل التقارير بتأكد أن ايام الدكتور علي مصيلحي وزير التموين والتجارة الداخلية بقت معدودة وكل يوم بتقرب عن اليوم اللي قبله، وفي الايام الاخيرة حصلت حاجة خلصت علي دور وزير التموين والتجارة الداخلية بسبب الاسعار.. يا تري اية اللي حصل خلي الامور اتقلبت علي وزير التموين.. واية اللي جاي في وزارة التموين
من فترة طويلة، والحكومة فقدت الأمل في حاجة عندها اسمها وزارة التموين وحاليا مش عندنا اي دور لها، وبقي مجلس الوزراء هو اللي بيقوم بشلغها وده بان وظهر قوي في الاجتماع اللي عمله الدكتور مصطفي مدبولي رئيس مجلس الوزراء مع التجار والموردين في شهر رمضان اللي فات، وطالبهم والزمهم بوجود تخفيض حقيقي في الاسعار بنسبة مرضية خصوصا بعد الدولة ما وفرت الدولار اللي هيتاجه المستوردين والتجار علشان يشتروا السلع بتاعتهم من الخارج وكمان يقدروا يفرجوا عنها بمنتهي السهولة، خصوصا ان الموضوع ده كان بقالها فترة طويلة موجودة وملهاش حل..
الاجتماع اللي عمله رئيس مجلس الوزراء، وطلب من التجار والموردين بنزول الأسعار كان موجود فيه الدكتور علي مصيلحي وزير التموين والتجارة الداخلية واللي كان وجوده زي عدمه خصوصا أن الدكتور مصطفي مدبولي مطلبش منه التدخل في الأزمة من قريب ولا بعيد، وكانه بيقوله ان الوزارة انتهي دورها اللي هو المفروض الاساس بتاعها في وجودك، والكلام ده ظهور قوي بعد الدكتور مصطفي مدبولي قال للتجار أن هيكون في لجان من مجلس الوزراء هتراقب نزول الاسعار زي ما تم الاتفاق عليه، وكان المفروض يكون الكلام ان اللجان دي هتكون دي من وزارة التموين والتجارة الداخلية واللي هيا شغلها الأساسي مراقبة الالتزام بالتسعيرة اللي اقرتها الحكومة واللي المفروض الكل يلتزم بيها ويقول سمعنا وطاعة.
مشاكل الدكتور علي مصيلحي وزير التموين والتجارة الداخلية موقفتتش علي اجتماع مجلس الوزرا ء، خصوصا ان الحكومة طالبت من وزارة التموين بمراقبة التزام التجار بالتسعيرة اللي اقرتها في تطبيق اسعار العيش السياحي والعيش الفينو، وللاسف لان الوزارة فقدت الدور بتاعها، وكل كلامهم من خلال المكاتب في شكاوي كتير وصلت لبوابة الشكاوي الحكومية بمجلس الوزراء عن استمرار وجودة ازمة في تسعير السلع، وان لسه في اسعار كتيرة خارج الرقابة، وان رقابة وزير التموين علي الاسعار حبر علي ورق، وان الوزارة لا بتقدم ولا بتأخر، وان كل التقارير اللي بيرفعها وزير التموين والتجارة الداخلية لرئيس مجلس الوزراء مضروبة، وملهاش اي وجود علي الأرض.
من عادة الدكتور مصطفي مدبولي انه مش بياخذ قرار من خلال الورق، وعلشان كده الدكتور مصطفي مدبولي نزل بنفسه وراقب الاسعار واتأكد ان فعلا التقارير اللي بتوصل له من وزارة التموين مضروبة وانا الاسعار الموجودة في الورق ما هيا الا حبر علي ورق، وفعلا رئيس مجلس الوزراء عنف الدكتور علي مصيلحي وزير التموين والتجارة الداخلية علي التقارير اللي بيقدمها وقاله يا ريت يا دكتور تنزل بنفسك تشوف حقيقة التقارير دي علي الارض، والوزير قاله اننا بنراقب الاسعار كويس قوي وان الأماكن اللي حضرتك بتنزلها هيا أماكن راقية، وان الأنخفاض في الاسعار موجود في المناطق الفقيرة خصوصا ان الدولة بتستهدف تخفيض الاسعار للفئات محدودة الدخل .