مشروع عظمة لقفل باب الاستيراد بالضفة والمفتاح

 

لازم ننتج ونصدر وغير كده هتفضل تحت رحمة الدولار والأزمة ممكن ترجع تاني .. دي معادلة اقتصادية مفيهاش فصال ياننتج ونصنع ونصدر يانموت.. ايه اللي بيحصل في ملف التصنيع في مصر وايه الجديد وايه هي المفاجأة اللي السيسي بيحضرها للدولار.. خليكم معانا لاخر التقرير وهنعرف التفاصيل 
 
مصر من أهم خططها دلوقتي زي ما احنا عارفين هي توطين الصناعة وتقليل الاعتماد على الاستيراد في المرحلة الأولى وفي المرحلة التانية هتبدأ مرحلة التصدير الواسع وبارقام ضخمة متقلقش عن 200 مليار دولار في السنة زي اقرب دول لينا في المنطقة وده مش صعب والسيسي بدأ بدري في ملف الصناعة وشفنا مشروعات صناعية ضخمة تم افتتاحها لكن التقيل لسه مجاش وفيه عشرات المشروعات الصناعية الضخمة الجديدة اللي هيتم افتتاحها قريب زي المدينة الصناعية في طربول ودي بيتعمل فيها 10 ألاف مصنع وغير المناطق الصناعية في اقتصادية قناة السويس ومناطق الصناعة في الصعيد والبحر الأحمر.
طيب ايه الجديد في ملف الصناعة وايه حكاية المشروع الضخم اللي بيتعمل عشان مصر تجري في ملف التصنيع والتصدير.. شوف حضرتك في خطوة استراتيجية الدولة بتنفذها دلوقتي بتهدف  لتعزيز البيئة الاستثمارية، وبتعتمد على إضافة  11 منطقة حرة جديدة ضمن خطة مضاعفة عدد المناطق الحرة العامة، خلال السنتين اللي جايين حسب ما أعلنت هيئة المجتمعات العمرانية وده كلام رسمي ومخطط توصل 20 منطقة صناعية ضخمة.

طيب يعني ايه المناطق الصناعية الحرة وبتختلف إيه عن باقي المناطق الصناعية.. شوف حضرتك المناطق الصناعية الخاصة بتكون مناطق بتتمتع بمزايا كتيرة وخاصة وقانون خاص عشان تسهل الإجراءات وتقدم حوافز كبيرة واستثنائية للمصنعين ومفيش فيها تعقيدات ولا روتين والحكومة بتوفرلها كل البنية الأساسية المطلوبة في وقت قياسي وبيتم التعامل في هذه المناطق وفقاً لأنظمة ضريبية وجمركية ونقدية خاصة بها عشان تتحول لمراكز صناعية ضخمة في وقت قصير.
ودلوقتي المناطق الحرة دي بتصدر 25% تقريبًا من إجمالي حجم الصادرات السنوية لمصر يعني الربع بالظبط .. والمعلومات بتقول إن مساحة المناطق الحرة الجديدة 150 فدانًا لكل منطقة، وهيتم تنفيذها بنظام الشراكة بين هيئة المجتمعات العمرانية وهيئة الاستثمار والمناطق الحرة و المناطق الحرة بتعتبر كمان نموذج استثماري خاص وليها تأثير ايجابي كبير على الأداء الاقتصادي للبلاد. 
ومن مزايا المناطق الصناعية الحرة انا بتُعفى صادرات وواردات المشروع من الرسوم والضرائب، و المشروعات فيها مش بتلتزم بالقوانين الضريبية والجمركية المحلية طوال فترة نشاطه وكمان لا تخضع واردات وصادرات المشروعات في المناطق الصناعية الحرة لأي إجراءات جمركية داخلية أو قواعد استيرادية عادية كمان بيتم إعفاء واردات المشروع من السوق المحلي من ضرايب القيمة المضافة، ويُسمح بترانزيت البضائع دون دفع رسوم بشرط أن تكون البضائع داخل الدائرة الجمركية ومحددة الوجهة بوثيقة الشحن.

وزي ما قلنا في مصر دلوقتي تسع مناطق حرة عامة في مختلف أنحاء الجمهورية، وتحديدا في الإسكندرية، القاهرة، بورسعيد، السويس، الإسماعيلية، دمياط، شبين الكوم، مدينة الإنتاج الإعلامي، وقنا وتم تزويد المناطق بالبنية التحتية الضرورية زي الطرق والكهرباء ومحطات الصرف الصحي وشبكات المياه والاتصالات، بالإضافة إلى وحدات جمركية وشرطة أمن موانئ شغالة على مدار الساعة وتم اختيار مواقع  المناطق الصناعية الحرة بعناية في كناطف توافر العمالة والموارد، وقربها من الموانئ البحرية والجوية.

ومن أهم المشروعات الاستراتيجية في المناطق الصناعية الحرة  ֺتصنيع البترول وصناعة الأسمدة والحديد والصلب وتصنيع وتسييل ونقل الغاز الطبيعي  و الصناعات كثيفة استخدام الطاقة وباقي الصناعات الضخمة وهدف المناطق دي زي ماقلنا هو توفير بيئة مناسبة لتوسيع عملية التصنيع والتصدير وتقليل الاستيراد لأقصى قدر ممكن وده معناه توفي الدولار من الاستيراد من ناحية ومن ناحية تانية ضمان موارد جديدة وكثيفة من العملة الصعبة.