كنز جديد وبالدولار.. الدولة بتعمل إيه في 8 مدن جديدة

الحكومة في الفترة الاخيرة اعلنت عن موافقة هيئة المجتمعات العمرانية الجديدة لتخصيص قطع الأراضي لبعض الشركات بنظام البيع بالدولار الأمريكي.. يا تري اية انعكاسات القرار دي اية علي اسعار الشقق السكنية في مصر، وهل ممكن لاي حد حاليا يببع بيعته بالدولار لاي حد اجنبي ولا اية الحكاية

الفترة الرئاسية الجديدة حاليا هدفها الرئيسي والاساسي هو ترتيب الوضع الاقتصادي المصري واعاده ترتيبه مرة تانية علشان محصلش عندنا أزمة نقص عملات اجنبية مرة تانية زي ما حصل في مصر في الشهور اللي فاتت، ومن هنا الجولة بتحاول بكل الطرق علشان تنوع مصادر دخلها من العملات الاجنبية وخصوصا الدولار، بحيث يكون عندنا اكثر من مصدر دخل للدولار، وبالتالي الحصيلة الدولارية اللي بتدخل لمصر من العملات الاجنية هتكون كبيرة جدا.
وعلشان كده الحكومة وافقت علي مقترح هيئة المجتمعات العمرانية الجديدة  لتخصيص قطع الأراضي لبعض الشركات بنظام البيع بالدولار الأمريكي من الخارج، وده واحدة من القرارات اللي اخذتها الحكومة لجذب استثمارات أجنبية وتعزيز الموارد الاقتصادية للدولة من الدولار.
طيب الاراضي الجديدة اللي الحكومة وافقت علي تخصيصها دي هتكون فين؟.
قرار هيئة المجتمعات العمرانية بتخصيص قطع ارضي لبعض الشركات بنظام البيع بالدولار الأمريكي هيكون في مجموعة معينة من المدن الجديدة، وهتكون الأرضي دي مخصصة لتنفيذ مشاريع متنوعة تهدف لدفع عجلة التنمية العمرانية والاقتصادية في  مصر.
المدن اللي شملها قرار مجلس الوزراء لبيع ارضي للمستثمرين بالدولار الامريكي هيا القاهرة الجديدة ودمياط الجديدة وأكتوبر الجديدة وبدر والعبور والعاشر من رمضان والسويس الجديدة والشيخ زايد، وقرار مجلس الوزراء اشترط علي المستثمرين استخدام الاراضي دي لتنفيذ مشروعات سكنية وتجارية وإدارية وعمرانية متكاملة وبالاضافة الي المشروعات الترفيهية التجارية والفندقية والطبية ومشروعات الصناعات الغذائية ومشروعات الصناعية العامة والمخازن ومجمعات الورش، ومشروعات صناعات الملابس الجاهزة.
المستشار محمد الحمصاني، المتحدث باسم مجلس الوزراء، طلع واتكلم عن فوائد قرار الحكومة ببيع قطع أراضٍ بالدولار، وأن ده هيكون باب من ابواب جذب مزيد من الاستثمارات الأجنبية وتوفير فرص عمل جديدة، بالإضافة إلى تحسين البنية التحتية ودعم الاقتصاد الوطني.
المتحدث باسم مجلس الوزراء كمل كلامه وقال أن القرار الجديد لبيع ارضي للمستثمرين بالدولار هيكون في 8 مدن جديدة بس مش كل المدن ومش لاي جهة، ولكن هيكون لـ34 جهة أجنبية محدودة ومعروفة، وان الهدف الاساسي منه مش بيع ارضي الدولة وتمليكها للأجانب، لكن هدفه تعزيز موارد الدولة من العملة الأجنبية.
الحمصاني طمن الناس اللي قلقانة من القرار خصوصا ان ممكن يكون له انعكاسات علي اسعار الشقق السكنية وقال، أن القرار مش هيكون في اي اختلاف في أسعار الشقق بين الشركات العقارية المصرية والأجنبية، خصوصا ان أسعار الشقق بين الشركات العقارية بيخضغ لمعايير السوق ومش هيكون فيه اي اسعار مبالغ فيها من الشركات العقارية الاجنبية في البيع للمشتريين.
الحمصاني ختم كلامه وقال أن جزء كبير من الأراضي المباعة للأجانب هيتم تطويرها لإنشاء مصانع ومولات تجارية ودي هتكون وسيلة لتطوير البنية التحتية وتعزيز الاقتصاد المحلي .