إيه حكاية القرض الجديد من صندوق النقد ..وليه؟

هو ليه مصر بتتفاوض على قرض جديد من صندوق النقد وهيكون كام وهتصرفه في إيه.. خليكم معانا وهنعرف التفاصيل كلها

زي ما احنا عارفين إن مصر وصلت لاتفاق مع صندوق النقد هتحصل قصاده على 8 مليار دولار وده بعد سنة من المفاوضات والشد والجذب وتجميد الاتفاق القديم لقرض ب3 مليار قبل ما تم زيادته ل8 مليار دولار وتبدأ مصر تصرف شرايحه ولغاية هنا الكلام سكت لغاية اللي حصل من ساعات وهو إن مصر بتتفاوض على قرض جديد.. ايه الحكاية.. يالا نشوف مع بعض.
في الكام الساعة اللي فاتت ياسمين فؤاد وزيرة البيئة أعلنت إنها عقدت اجتماع موسع مع بعثة صندوق النقد الدولى للمرونة والاستدامة، وده كان في مقر وزارة البيئة بالعاصمة الادارية، لبدء مفاوضات لحصول مصر على 1.2 مليار دولار للبيئة ضمن حزم الدعم الخاصة لصندوق النقد الدولي.
وخلي بالك من كلمة دعم مش قرض بالمعني المفهوم لأن الصندوق عامل زي مبادرة كده لتحفيز الدول على تبني مشروعات تحسن المناخ وتستبدل المشروعات بطاقة نظيفة ضمن مباردات قمة المناخ اللي تم اقرارها في قمة شرم الشيخ وغالبا الدعم ده بيكون مرتبط بتقدم الدولة في مشروعات تحسين المناخ والبيئة وساعتها الصندوق وفيه جهات مالية تانية بتقدم الدعم للدول في نفس الملف ولغاية دلوقتي مفيش تفاصيل حولين ألية صرف الدعم وهل هو منحة ولا هيكون بدون فايدة أو هيكون مجاني وده هنعرفه بعد انتهاء المفاوضات وإعلان التفاصيل وغالبا الدعم ده بيكون بتسهيلات كبيرة من الصندوق.

الاجتماع حسب الوزيرة حضره ايفانا فلدكوفا هولار، رئيس البعثة وممثلي بعثة صندوق النقد الدولي، وأحمد كوجاك نائب وزير المالية للسياسات المالية والسفير محمد نصر مدير إدارة المناخ والبيئة والتنمية بوزارة الخارجية وإن الاجتماع ضمن اجتماعات ثنائية مع الصندوق والاجتماعات الوطنية بين الحكومة المصرية، واللي بدأت خلال الفترة اللي فاتت، لبحث التنسيق والتعاون لتعزيز السياسات البيئية والمناخية في مصر، ضمن مسارها نحو الأخضر وتحقيق الاستدامة.
رئيس بعثة صندوق النقد الدولي أشادت بالإجراءات الطموحة اللي بتتخذها الحكومة المصرية في ملف المناخ وطنيا، ومنها الاستراتيجية الوطنية للمناخ، وقالت إن تعاون الصندوق  مع الدول اللي عندها أهداف للاستدامة في المشرعات الخضراء وبيساعد الصندوق على تقديم الدعم في مجالات محددة لمساعدة الدول على تنفيذ اجندتها المناخية، والاستفادة من خبراء الصندوق، وإن الصندوق بيتعاون مع مصر لتقديم  الدعم في تطوير القدرات لتنفيذ الاستراتيجية الوطنية للمناخ 2050 والبحث عن آليات التمويل المناسبة.. يعني كده الدعم هيكون مادي وفني كمان في مشروعات المناخ في مصر.

.