إيه العظمة اللي بتحصل في جرجوب.. مفاجآت بمليارات الدولارات
![الدولار]( /UploadCache/libfiles/5/4/600x338o/799.jpg)
هو ايه اللي بيحصل في منطقة جرجوب وايه حكاية مليارات الدولارات اللي هتضخ فيها وليه المنطقة دي بالذات وايه اللي هتعمله في الاقتصاد المصري وسر اهتمام الرئيس السيسي بالمنطقة دي تحديدا.. تعالوا نشوف التفاصيل.
من ساعات الفريق مهندس كامل الوزير، فجر مفاجآت عن منطقة جرجوب ومحدش خد باله منها أو ركز في التفاصيل لأنها جت في وقت كان فيه زحمة من الاخبار السارة من صفقة رأس الحكمة وتصريحات رئيس الحكومة الدكتور مصطفى مدبولي عن تحويلات المصريين بالخارج وتنازلات المصريين عن الدولار وبيانات البنك المركزي السارة عن التضخم والبطالة وغيرها من الاخبار الحلوة اللي صدرت امبارح وكلها ليها علاقة بتدفقات دولارية وتحسن المؤشرات الاقتصادية.. طيب ايه اللي قاله كامل الوزير ومهم للدرجة دي..
شوف حضرتك وزير النقل أعلن أنه هتم إنشاء أول مصنع للهيدروجين الأخضر باستثمارات 21.6 مليار دولار خلال 10 سنوات في منطقة جرجوب وزي ما سمعت كده المبلغ 21 مليار دولار يعني قد قرض صندوق النقد الدولي مرتين ونص تقريبا واستثمار مبلغ زي ده في السوق المصري معناه تدفقات جديده وضخمة في سوق الصرف وعلى فترة طويلة وده هيكون ليه تأثير كبير على سعر الدولار في السوق.
مش كده وبس ده كمان الوزير أعلن إنه تم طرح 635 فدان في المنطقة اللوجيستية بالسلوم للمستثمرين مصريين وليبيين تضم صناعات صغيرة وتخزين منتجات مصر المصدرة لليبيا وده كله جزء من مشروع متكامل بيتم هناك وبيهدف لتحويل المنطقة الغربية لمحور اقتصادي وصناعي وخدمي ضخم جدا وباستثمارات كبيرة ومن بين المشروعات اللي بتم هناك وهتغير شكل المنطقة مشروع إنشاء ممر لوجيستي من الإسكندرية/ جرجوب إلى السلوم، وكنان هيتم إنشاء منطقة اقتصادية لميناء جرجوب بواسطة الدولة المصرية وزي ما احنا عارفين الممرات اللوجستية ليها أهمية كبيرة في تنشيط حركة التجارة والنقل، وبتفتح شرايين جديدة في التنمية والاقتصاد وتشغيل الأيدي العاملة وضخ استثمارات جديدة وجذب مشروعات تانية من القطاع الخاص وبكده الصحرا هتتحول لمناطق مأهولة بالصناعة والتجارة والزراعة والمشروعات المختلفة.
وبخصوص تفاصيل الممر اللوجيستي الجديد فهو بيبدأ من 6 أكتوبر عبر القطار السريع، اللي بيربط المناطق الصناعية والتجارية من القاهرة والجيزة، وممر آخر صناعي سياحي يبدأ من أبوطرطور بالوادي الجديد، فضلاً عن ميناء سفاجا على البحر الأحمر مروراً بقنا .. ده طبعا بيكشف لينا حجم الشغل اللي بيتعمل هناك لخلق حياة جديدة ومتكاملة ومناطق صناعية جديدة وتجارية وده كان بتوجيهات مباشره من الرئيس السيسي واللي مهتم بالمنطقة دي تحديدا لقربها من المواني وبحجم الإمكانيات الاقتصادية فيها والثروات