هانت.. مفاجأة هتغير مصير الجنيه المصري يوم 23 مايو

ياترى إيه الخطوة المنتظرة من البنك المركزي يوم 23 مايو اللي جاي غير سعر الفايدة.. وليه هتكون مفاجأة كبيرة ونقلة نوعية للجنيه المصري وحياة المصريين بشكل عام.. خليكم معانا هنشوف التفاصيل

زي ماقلنا لجنة السياسة النقدية بالبنك المركزي هتجتمع يوم 23 مايو عشان تحسم مصير الفايدة ورغم الاختلاف علي القرار المنتظر لكن فيه إجماع على إن المركزي مش هيرفع الفايدة تاني والأمر محصور بين التثبيت والخفض.. لكن في نفس الوقت البنك المركزي ممكن يفاجئنا بقرارات تانية زي ما حصل كده في قرار تحرير سعر الجنيه ورفع الفايدة 600 نقطة أساس وخد أكتر من قرار جمب قرار سعر الفايدة.
طيب ايه المتوقع من البنك المركزي في الاجتماع الجاي.. فيه خبر حلو ممكن يتحقق وهو إنه هيتم في الاجتماع ده اطلاق الجنيه الرقمي ودي بعد خطوة المركزي بالموافقة على إطلاق بنك مصر لنسخته الرقمية لأول مرة في السوق المصرفي وده في طريق الرقمنة والشمول المالي وتحديث التكنولوجيا الرقمية والمالية.
طيب ايه هو الجنيه الرقمي وليه بيمثل نقلة نوعية في الاقتصاد وحياة الناس.. شوف حضرتك الجنيه الرقمي ده  نسخة طبق الاصل من الجنية الورقي التقليدي، لكن هيتم التعامل بيه علي أنظمة الدفع الإلكترونية، والشراء أون لاين أو باختصار أي حاجة كنت تدفع فيها فلوس كاش دلوقتي هتدفعا بالجنيه الرقمي وبشكل إلكتروني وهيتم التعامل بيه على محافظ الكاش على الموبايلات وكروت الدفع الالكتروني وأكيد عمليات الشراء والبيع..
طيب ايه فايدة الجنيه الرقمي.. طبعا ليه فوايد كبيرة جدا في التعاملات المالية لانه أولا هيمنع تماما عمليات السرقة والنصب والاحتيال والتزوير في العملة وكمان عملية تتبع عمليات الدفع الإلكتروني للجنيه الرقمي وفي نفس الوقت هتخفف هم إنك تشيل فلوس كتير ف جيبك أو في عربيته وتعرضها لخطر السرقة أو التلف وفي نفس الوقت هتوفر ورق الطباعة والأهم إن الجنيه الرقمي هينجز معاملاتك المالية والتجارية بشكل فوري ومش محتاج تروح البنك وتوقف في الطابور وتسحب مبلغ كبير عشان تروح تدفعه في أي حاجة ودي فايدة التكنلوجيا المالية الحديثة إنها بتستمثر في الوقت وبتوفر عليك حاجات كتير هتفرق معاك.
وعلى فكرة الجنيه الرقمي كان المفروض يظهر في 2030 لكن خبراء البنوك والاقتصاد قالوا إن هيطلع قريب جدا لأن الوقت بقي مناسب جدا مع تطور التكنولوجيا المالية في مصر وفي نفس الوقت حاجة السوق والناس للنسخة الرقمية للجنيه وكمان فيه توقعات كبيرة إنه يتم إطلاقه في الاجتماع الجاي للبنك المركزي وخاصة بعد صدور رخصة أول بنك رقمي في مصر واللي بتمهد لتطور مالي كبير على مستوى المدفوعات والتحويلات الالكترونية.