ضربة جديدة لمافيا الأسعار وأصحاب النفوذ.. إيه اللي بيحصل في وزارة التموين

وزارة التموين واللي الدولة اسستها بهدف توفير الموارد الاساسية وقوت المواطنين واضح انها شافت لها شغلانة جديدة غير الهدف الاساسي لسها.. حاليا في قضية فساد جديدة في الوزارة والتحقيقات هتجيب اسماء كبيرة من القيادات..يا تري اية اللي حصل في وزارة التموين.. واية قضية الفساد الجديدة اللي الجهات الرقابية بتحقق فيها ومين الاسماء المتهمة فيها

اي وزارة تموين في العالم معروف أن الهدف الاساسي لها هيا توفير السلع والموارد الاساسية والبضائع للمواطينين، والمراقبة علي الاسعار وتوفير السلع للناس، لكن المسئولين عن وزارة التموين عندنا واضح أن ليهم شغل تاني غير اللي الدنيا كلها تعرفة، والشغل الجديد بتاعهم هو انهم يستولوا علي السلع اللي الدولة اشترتها بملايين الجنيهات، والمفروض بتقدمها مدعمة للمواطن علشان تخفف عليه الاعباء الاقتصادية، ولكن المسئولين دول كان لهم راي تاني وقرروا انهم يستفادوا بالدعم ده ويبيعو السلع دي للغير.. المهم انهم يحققو مكاسب شخصية ليهم.
من حوالي كام شهر فات وتحديدا في ديسمبر اللي فات كان في قضية مشهورة قوي اتمسك فيها قيادات كتيرة من وزارة التموين، وهيا بتختص بحجب السلع الاساسية المدعمة عن المواطنين وبيعها للسلاسل التجارية والمحال، وتحقيق مكاسب شخصية ذاتية، وكان متهم فيها عدد كبير من المسؤولين بما فيهم  مستشار وزير التموين واكتشفتها الجهات والاجهزة الرقابية في الدولة، واترتب على علي الفضيحة دي صدور أحكام قضائية منهم  حكم على مستشار وزير التموين بالسجن المشدد لمدة 18 سنة وغرامة مالية كبيرة، ده غير عزله من منصبه ده غير الأحكام القضائية اللي صدرت لباقي المتهمين.
مفيش شهور علي قضية حجب السلع الاساسية عن المواطنين وظهرت قضية جديدة الجهات الرقابية بتحقق فيها الجهات الرقابية برضوا ومتهم فيها وكيل وزارة التموين والتجارة الداخلية في احد محافظات الصعيد والمتهم بصرف كميات كبيرة من الردة الخشنة بطرق غير قانونية وبيعها للقطاع الخاص لتحقيق مكاسب شخصية برضوا .

التحقيقات الاولية بتأكد أن المتهمين صرفوا كميات كبيرة من الردة الخشنة واللي بتحتاجها المخابز لتوفير رغيف العيش المدعم للمواطنين وقاموا باعادة بيعها بدون وجود أوراق الصرف للافران المدعمة وبدون أساس قانوني، ان الهدف الاساسي لهم هو تحقيق أرباح غير مشروعة لهم وكان تعاملهم في تجار كبار واسماء معروفة في السوق السودا.
الاسماء المتهمة في القضية بتضم كل من مسئول صرف الردة بشركة مطاحن مصر الوسطى، واكثر من 5 اسماء من مفتشو التموين، واللي صرفوا كميات كبيرة من الردة الخشنة من شركة مطاحن مصر الوسطى، باجمالي 212 طنا لغير المستحقين، وبالمخالفة للقانون  ودون أذون تسليم صادرة من مديرية التموين للمخابز، واللي باعوها في السوق السودا لحسابهم الخاص خصوصا ان حاطين في دماغهم انهم بعيد عن عيون الجهات الرقابية في الدولة، وان الجهات الرقابية عمرها ما هتفتش عن الردة وتوزيعها علي الافران، ولكن الحقيقة غير كده خالص، والجهات الرقابية رصدتهم وحاليا هما في انتظار اثبات التهم، وفي حالة اثباتها عليهم هيتم اتخاذ كل الاجراءات القانونية معاهم.